ອິນເດຍ-ປາກິດສະຖານ ດວນວາຈາກາງກອງປະຊຸມ UN ຕໍ່ກັບບັນຫາຄວາມຂັດແຍ່ງແຄສເມຍ

ລາຍງານ 28 ກັນຍາ 2019, ທ່ານ ນະເຣນທຣາ ໂມດີ ນາຍົກລັດຖະມົນຕີອິນເດຍ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ເມື່ອວັນສຸກ 27 ກັນຍາ ທີ່ຜ່ານມາ ວ່າອິນເດຍມີຈຸດຢືນຊັດເຈນໃນການດຳເນີນນະໂຍບາຍຕໍ່ຕ້ານການກໍ່ການຮ້າຍ ແລະ ເຄືອຂ່າຍທັງໝົດທີ່ກ່ຽວຂ້ອງ ດ້ວຍຄວາມຈິງຈັງ ແລະ ເດັດຂາດ, ມາດຕະການດັ່ງກ່າວຈຳເປັນຕ້ອງເກີດຂຶ້ນ ແລະ ດຳເນີນການຢ່າງຕໍ່ເນື່ອງ ເພາະອິນເດຍເປັນຊົນຊາດທີ່ຮັກຫອມສັນຕິ, ເຊິ່ງການກ່າວຂອງນາຍົກລັດຖະມົນຕີອິນເດຍຕໍ່ບັນຫາການຕໍ່ຕ້ານການກໍ່ການຮ້າຍນັ້ນ ບໍ່ໄດ້ເອີຍໂດຍກົງເຖິງສະຖານະການໃນພູມມິພາກແຄສເມຍ ເຊິ່ງເປັນພື້ນທີ່ຂັດແຍ່ງກັບລັດຖະບານປາກິດສະຖານ ນັບຕັ້ງແຕ່ທັງສອງປະເທດເປັນເອກະລາດຈາກອັງກິດ ເມື່ອປີ 1947.

ເຖິງຢ່າງໃດກໍ່ຕາມ, ທ່ານ ອິມຣານ ຂ່ານ ນາຍົກລັດຖະມົນຕີປາກິດສະຖານ ທີ່ຂຶ້ນເວທີຕໍ່ຈາກນາຍົກລັດຖະມົນຕີອິນເດຍ ກ່າວເຖິງສະຖານະການໃນແຄສເມຍໂດຍກົງວ່າ ເປັນຄວາມຂັດແຍ່ງທີ່ຮຸນແຮງເຖິງຂັ້ນສາມາດບານປາຍເປັນສົງຄາມໄດ້ ແລະ ກ່າວວ່າການທີ່ລັດຖະບານອິນເດຍຖອດສະຖານະພິເສດຂອງລັດຈຳມູ ແລະ ແຄສເມຍ ຫຼື ພູມມິພາກແຄສເມຍຝັ່ງອິນເດຍ ເມື່ອວັນທີ 5 ສິງຫາ ທີ່ຜ່ານມາ ຈະເປັນຊະນວນເຫດຂອງການນອງເລືອດບົນພື້ນແຜ່ນດິນແຫ່ງນີ້, ຂະນະດຽວກັນ ຜູ້ນຳປາກິດສະຖານຍັງກ່າວວ່າອິນເດຍກຽມການຂ້າລ້າງເຜົ່າພັນ ກຸ່ມຊົນຊາດຕ່າງສາສະໜາໃນແຄສເມຍ ໂດຍອາໄສຂໍ້ສົມມຸດຕິຖານທີ່ວ່າ ເພາະເຫດໃດລັດຖະບານອິນເດຍ ຈຶ່ງເດີນໜ້າເສີມກຳລັງທະຫານເຂົ້າໄປໃນພື້ນທີ່ດັ່ງກ່າວກວ່າ 900,000 ຄົນ.

ເຊິ່ງນັບຕັ້ງແຕ່ປະກາດຍົກເລີກສະຖານະເຂດປົກຄອງຕົນເອງຂອງລັດຈຳມູ ແລະ ແຄສເມຍ ລັດຖະບານອິນເດຍປະກາດພາວະສຸກເສີນ ແລະ ເສີມກຳລັງທະຫານໃນພື້ນທີ່ຈິງ ເພື່ອປາບປາມ ແລະ ຮັກສາຄວາມສະຫງົບ ຈາກກຸ່ມຕິດອາວຸດທີ່ລັດຖະບານປາກິດສະຖານສະໜັບສະໜູນ ແລະ ຂ້າມແດນມາຈາກປາກິດສະຖານ, ແຕ່ບໍ່ເຄີຍເປີດເຜີຍຈຳນວນທີ່ຊັດເຈນ ເຊິ່ງຫາກຄຳກ່າວອ້າງຂອງຜູ້ນຳປາກິດສະຖານເປັນຈິງ ຈຳນວນນັ້ນຖືວ່າກວມເອົາ 2 ສ່ວນ 3 ຂອງທະຫານອິນເດຍທັງປະເທດ.

ເຊິ່ງການກ່າວຖະແຫຼງຂອງນາຍົກລັດຖະມົນຕີທັງສອງ ໃນກອງປະຊຸມສະມັດຊາໃຫຍ່ສະຫະປະຊາຊາດ ເກີດຂຶ້ນທ່າມກາງການໂຮມຊຸມນຸມປະທ້ວງຢ່າງໜັກຢູ່ດ້ານນອກຂອງຕຶກ UN ໂດຍມີການລວມຕົວກັນຂອງທັງຝ່າຍສະໜັບສະໜູນ ແລະ ຝ່າຍຕໍ່ຕ້ານຜູ້ນຳທັງສອງປະເທດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube