ລັດຖະມົນຕີຕ່າງປະເທດ ສປປ.ລາວ ຈະຂຶ້ນຖະແຫຼງໃນເວທີ UN, 28 ກັນຍາ 2019 ນີ້

ລາຍງານ 28 ກັນຍາ 2019, ອີງຕາມການລາຍງານຂອງກະຊວງການຕ່າງປະເທດໃຫ້ຮູ້ວ່າ: ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດຂອງ ສປປ.ລາວ ຈະຂຶ້ນກ່າວຖະແຫຼງໃນພາກອະພິປາຍທົ່ວໄປ ຂອງກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ໃນຕອບບ່າຍຂອງວັນທີ 28 ກັນຍາ 2019 ນີ້ ຕາມເວລາທ້ອງຖິ່ນ ແລະ ກອງປະຊຸມດັ່ງກ່າວຈະສືບຕໍ່ດຳເນີນໄປຈົນເຖິງວັນທີ 30 ກັນຍາ 2019.

ກອງປະຊຸມສະມັດຊາໃຫຍ່ຄັ້ງນີ້ ໄດ້ດຳເນີນໄປພາຍໃຕ້ຫົວຂໍ້ “ການເພີ່ມທະວີຄວາມພະຍາຍາມໃນການຮ່ວມມືຫຼາຍຝ່າຍ ເພື່ອລົບລ້າງຄວາມທຸກຍາກ, ການສຶກສາທີ່ມີຄຸນນະພາບ, ການຮັບມືການປ່ຽນແປງສະພາບດິນຟ້າອາກາດ ແລະ ການມີສ່ວນຮ່ວມຢ່າງທົ່ວເຖິງ”, ເຊິ່ງເປັນເວທີສຳລັບຜູ້ນຳຂັ້ນສູງຈາກປະເທດຕ່າງໆ ຖະແຫຼງທັດສະນະຂອງປະເທດຕົນຕໍ່ກັບບັນຫາສຳຄັນຕ່າງໆຂອງໂລກ.

ໃນໂອກາດເຂົ້າຮ່ວມກອງປະຊຸມສະມັດຊາໃຫຍ່ຄັ້ງນີ້, ຄະນະຜູ້ແທນ ສປປ.ລາວ ຍັງໄດ້ເຂົ້າຮ່ວມກອງປະຊຸມປິ່ນອ້ອມຈຳນວນໜຶ່ງເຊັ່ນ: ກອງປະຊຸມສຸດຍອດ ເພື່ອທົບທວນຄືນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ, ກອງປະຊຸມປຶກສາຫາລືລະດັບສູງ ວ່າດ້ວຍການເງິນເພື່ອການພັດທະນາ, ກອງປະຊຸມສຸດຍອດ ວ່າດ້ວຍການປ່ຽນແປງສະພາບດິນຟ້າອາກາດ ເຊິ່ງເປັນກົນໄກທົບທວນຄົບຮອບ 4 ປີ ພາຍຫຼັງທີ່ໄດ້ຮັບຮອງເອົາວາລະ 2030 ເພື່ອການພັດທະນາແບບຍືນຍົງ ໂດຍປະເທດສະມາຊິກ UN ໃນປີ 2015.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube