ຫວຽດນາມ ກ່າວວ່າບັນຫາທະເລຈີນໃຕ້ມີຄວາມຊັບຊ້ອນຫຼາຍ ຂໍໃຫ້ທຸກຝ່າຍຢ່າກະທຳຕາມລຳພັງໃຈຕົນ

ລາຍງານ 29 ກັນຍາ 2019, ທ່ານ ຟ້າມ ບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ເມື່ອວັນເສົາ 28 ກັນຍາ ທີ່ຜ່ານມາ ມີເນື້ອໃນສຳຄັນວ່າ ທຸກຄັ້ງທີ່ມີໂອກາດໄດ້ເຂົ້າຮ່ວມກອງປະຊຸມລະຫວ່າງປະເທດ ຫວຽດນາມຈະໃຊ້ໂອກາດດັ່ງກ່າວ ສະແດງຄວາມເປັນຫ່ວງ ຕໍ່ກັບສະຖານະການໃນທະເລຈີນໃຕ້ ທີ່ມີພັດທະນາການອັນຊັບຊ້ອນເປັນຢ່າງຍິ່ງ ເຊິ່ງລວມເຖິງການຖົມທະເລ ເພື່ອຂະຫຍາຍອານາເຂດຂອງຄູ່ກໍລະນີ ແລະ ຫຼາຍເຫດການທີ່ເຖິງແມ່ນວ່າລັດຖະບານຫວຽດນາມບໍ່ໄດ້ມີສ່ວນຮ່ວມໂດຍກົງ ແຕ່ໄດ້ຮັບຜົນກະທົບໃນດ້ານອະທິປະໄຕ ແລະ ພື້ນແຜ່ນດິນອັນຄົບຖ້ວນ.

ດ້ວຍເຫດນີ້, ລັດຖະບານຫວຽດນາມຈຶ່ງຮຽກຮ້ອງໃຫ້ທຸກປະເທດ ທີ່ເປັນຄູ່ຂັດແຍ່ງໃນເລື່ອງທະເລຈີນໃຕ້ ເພີ່ມຄວາມອົດທົນອົດກັ້ນ ແລະ ຫຼີກລ້ຽງການກະທຳໃດໆກໍ່ຕາມທີ່ເປັນການໃຊ້ອຳນາດພຽງຝ່າຍດຽວ ເຊິ່ງຈະຍິ່ງເພີ່ມຄວາມຫຍຸ້ງຍາກຊັບຊ້ອນໃຫ້ກັບສະຖານະການທີ່ເຄັ່ງຕຶງຫຼາຍຢູ່ແລ້ວ ແລະ ອາດຈະຍົກລະດັບຄວາມເຄັ່ງຕຶງໃຫ້ກັບສາຍພົວພັນລະຫວ່າງກຸ່ມປະເທດທີ່ກຳລັງຂັດແຍ່ງກັນໃນບັນຫານີ້ ເຊິ່ງຈະສົ່ງຜົນກະທົບໃຫ້ການສະແຫວງຫາທາງອອກຮ່ວມກັນຢ່າງສັນຕິເປັນໄປໄດ້ຍາກຂຶ້ນ.

ລັດຖະມົນຕີກະຊວງການຕ່າງປະເທດຫວຽດນາມ ກ່າວຖະແຫຼງໂດຍບໍ່ໄດ້ພາດພິງເຖິງຈີນໂດຍກົງແມ່ນແຕ່ຄຳເວົ້າດຽວ, ເຊິ່ງຈີນຖືເປັນປະເທດເພື່ອນບ້ານທີ່ຫວຽດນາມມີຊາຍແດນຕິດຈອດຢູ່ທາງພາກເໜືອ ປະກາດອ້າງກຳມະສິດເໜືອພື້ນທີ່ເກືອບທັງໝົດໃນທະເລຈີນໃຕ້ ອັນໄດ້ສ້າງຄວາມບໍ່ພໍໃຈໃຫ້ກັບຫຼາຍປະເທດໃນພູມມິພາກອາຊີຕາເວັນອອກສຽງໃຕ້ ທີ່ນອກຈາກຫວຽດນາມແລ້ວ ຍັງມີຟິລິບປິນ, ມາເລເຊຍ ແລະ ບຣູໄນ ເຊິ່ງເປັນຄູ່ຂັດແຍ່ງໂດຍກົງກັບລັດຖະບານຈີນຕໍ່ກັບບັນຫາດັ່ງກ່າວ ແຕ່ເມື່ອເຖິງກອງປະຊຸມຮ່ວມກັນເອງຂອງສະມາຊິກອາຊຽນ ການປຶກສາຫາລືຕໍ່ບັນຫາທະເລຈີນໃຕ້ ຕ້ອງພົບກັບທາງຕັນເກືອບທຸກຄັ້ງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube