ຊີຣີກາຍເປັນແຫຼ່ງລົງທຶນໃສ່ການກໍ່ການຮ້າຍ ແລະ ບໍ່ຈຳເປັນບອກຊື່ຜູ້ສະໜັບສະໜູນຫຼັກ ເພາະທຸກຄົນຮູ້ດີ

ລາຍງານ 29 ກັນຍາ 2019, ທ່ານ ວາລິດ ອັນ-ມູອັນເລມ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຊີຣີ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ເມື່ອວັນເສົາ 28 ກັນຍາ ທີ່ຜ່ານມາ ມີເນື້ອໃນສຳຄັນໃນຕອນໜຶ່ງ ວ່າບໍ່ມີປະເທດໃດໃນໂລກນີ້ ຕ້ອງການໃຫ້ມີການກໍ່ການຮ້າຍເກີດຂຶ້ນກັບບ້ານເມືອງຂອງຕົນເອງ ແຕ່ສົງຄາມຊີຣີທີ່ແກ່ຍາວມາກວ່າ 8 ປີແລ້ວນັ້ນ ຄືຕົວຢ່າງອັນຊັດເຈນທີ່ສຸດ ວ່າຊີຣີກາຍເປັນແຫຼ່ງລົງທຶນຈາກພາຍນອກເພື່ອການກໍ່ການຮ້າຍ ໂດຍສະຖານະການສູ້ຮົບໃນຊີຣີທີ່ຊັບຊ້ອນຢູ່ແລ້ວ ຍິ່ງຕ້ອງມາປະເຊີນກັບຄວາມຫຍຸ້ງຍາກຕື່ມອີກ ເມື່ອບັນດານາຍທຶນທີ່ພາກັນສົ່ງອອກ ແລະ ນຳເຂົ້ານັກຮົບກໍ່ການຮ້າຍຈາກທົ່ວທຸກສາລະທິດໃຫ້ເດີນທາງມາຍັງຊີຣີ ເຊິ່ງຜູ້ສະໜັບສະໜູນລາຍໃຫຍ່ນັ້ນເປັນປະເທດທີ່ທຸກຝ່າຍຮັບຮູ້ດີຢູ່ແລ້ວ ຈຶ່ງບໍ່ຈຳເປັນຕ້ອງເອີ່ຍຊື່.

ເຖິງຢ່າງໃດກໍ່ຕາມ, ຍິ່ງໄປກວ່ານັ້ນ ບັນດາປະເທດທີ່ລັກລອບນຳເຂົ້າຜູ້ກໍ່ການຮ້າຍເຂົ້າມາໃນຊີຣີ ຜັດຍັງປະຕິເສດໜັກແໜ້ນທີ່ຈະຮຽກກຸ່ມຄົນເຫຼົ່ານັ້ນວ່າຜູ້ກໍ່ການຮ້າຍ ແຕ່ໄດ້ປະດິດຄຳເວົ້າໃໝ່ວ່າ “ນັກຮົບເພື່ອເສລີພາບ”, “ກອງກຳລັງຕິດອາວຸດເພື່ອປະຊາທິປະໄຕຊີຣີ” ຫຼື “ກຸ່ມກະບົດສາຍກາງ” ສຸດແລ້ວແຕ່ຈະຮຽກກັນ, ເຊິ່ງລັດຖະບານຊີຣີ ແລະ ພັນທະມິດໄດ້ພະຍາຍາມຢ່າງສຸດຄວາມສາມາດມາໂດຍຕະຫຼອດ ເພື່ອກວາດລ້າງກຸ່ມຜູ້ຮຸກຮານເຫຼົ່ານີ້ ຈົນຕອນນີ້ສາມາດຕ້ອນໃຫ້ໄປລວມກັນຢູ່ໃນພື້ນທີ່ແຫ່ງດຽວແລ້ວ ຄືແຂວງອິດລິບທີ່ຢູ່ທາງພາກຕາເວັນຕົກສຽງເໜືອຂອງປະເທດ ເຊິ່ງປັດຈຸບັນສາມາດຮຽກໄດ້ວ່າ ເປັນສະຖານທີ່ລວມຕົວຂອງກຸ່ມກໍ່ການຮ້າຍທີ່ໃຫຍ່ທີ່ສຸດໃນໂລກ.

ເຊິ່ງໃນຂະນະທີ່ການສູ້ຮົບທາງທະຫານຢູ່ຊີຣີຍັງຄົງຕ້ອງດຳເນີນຕໍ່ໄປຢູ່, ລັດຖະມົນຕີກະຊວງການຕ່າງປະເທດຊີຣີ ກ່າວວ່າລັດຖະບານຊີຣີພາຍໃຕ້ການນຳຂອງທ່ານ ບາຊາ ອັນ-ອັສຊາດ ໄດ້ໃຫ້ຄວາມສຳຄັນກັບການຫຼຸດຜ່ອນຄວາມຂັດແຍ່ງຕາມແນວທາງການທູດໃຫ້ຫຼາຍທີ່ສຸດ ທີ່ລວມເຖິງການກຳນົດເຂດປອດຄວາມຮຸນແຮງ ຕາມຂໍ້ຕົກລົງຮ່ວມກັບລັດເຊຍ ແລະ ຕວັກກີ ແຕ່ກໍ່ຍັງມີຫຼາຍຄັ້ງທີ່ລັດຖະບານຕວັກກີບໍ່ສາມາດຢຶດໝັ້ນຕາມຂໍ້ຕົກລົງໄດ້ ໂດຍຍັງຄົງໃຫ້ການສະໜັບສະໜູນກຸ່ມກໍ່ການຮ້າຍ ໃນສັງກັດຂອງຕົນເອງ ເຮັດໃຫ້ການແກ້ໄຂສະຖານະການໃນແຂວງອິດລິບຍິ່ງຫຍຸ້ງຍາກ.

ຂະນະດຽວກັນ, ລັດຖະມົນຕີກະຊວງການຕ່າງປະເທດຊີຣີ ກໍ່ໄດ້ກ່າວເຖິງການທີ່ທ່ານ ອັນໂຕນິໂອ ກູເຕເຣສ ເລຂາທິການໃຫຍ່ສະຫະປະຊາຊາດ ທີ່ກ່າວເຖິງ ພັດທະນາການສຳຄັນເພື່ອເລີ່ມຕົ້ນ ສູ່ສັນຕິພາບໃນຊີຣີ ດ້ວຍການທີ່ລັດຖະບານ ແລະ ຝ່າຍຄ້ານບັນລຸຂໍ້ຕົກລົງຈັດຕັ້ງຄະນະຮ່າງລັດຖະທຳມະນູນຮ່ວມກັນ ຈຳນວນ 450 ຄົນ ທີ່ມາຈາກລັດຖະບານ, ຝ່າຍຕໍ່ຕ້ານ ແລະ ສະຫະປະຊາຊາດ ຝ່າຍລະ 150 ຄົນ ວ່າບັນຫານີ້ ຍັງເປັນສິ່ງທີ່ລະອຽດອ່ອນ ແລະ ໃຜກໍ່ຕາມບໍ່ຄວນກົດດັນ ຫຼື ແຊກແຊງການປະຕິບັດງານຂອງຄະນະກຳມະການຊຸດນີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube