ເກົາຫຼີເໜືອ ກ່າວວ່າການປົດນິວເຄຼຍ ເກືອບບໍ່ມີຄວາມຄືບໜ້າຫຍັງ ເພາະພຶດຕິກຳຂອງ ສ.ອາເມຣິກາ

ລາຍງານ 1 ຕຸລາ 2019, ທ່ານ ຄິມ ຊອງ ເອກອັກຄະລັດຖະທູດເກົາຫຼີເໜືອປະຈຳສະຫະປະຊາຊາດ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ເມື່ອວັນຈັນ 30 ກັນຍາ ທີ່ຜ່ານມາ ມີເນື້ອໃນສຳຄັນວ່ານັບຕັ້ງແຕ່ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ພົບປະຫາລືກັບທ່ານ ໂດໂນ ທຣຳ ປະທານປະເທດ ສ.ອາເມຣິກາ ທີ່ສິງກະໂປ ເມື່ອເດືອນມິຖຸນາ ປີທີ່ຜ່ານມາ ການຮ່ວມມືໃນການປົດນິວເຄຼຍລະຫວ່າງສອງປະເທດນັບແຕ່ນັ້ນມາ ເກືອບບໍ່ມີຄວາມຄືບໜ້າຫຍັງ ສົ່ງຜົນໃຫ້ສະຖານະການຢູ່ແຫຼມເກົາຫຼີຍັງບໍ່ມີທິດທາງວ່າຈະຫຼຸດພົ້ນຈາກວົງຈອນອຸບາດໄດ້ຢ່າງແທ້ຈິງ ແຕ່ບັນຍາກາດກັບຍິ່ງເຄັ່ງຕຶງຂຶ້ນ ດ້ວຍຍຸດທະສາດແບບດັ້ງເດີມຂອງລັດຖະບານ ສ.ອາເມຣິກາ ທີ່ຍັງຄົງໃຊ້ການຂົ່ມຂູ່ຄຸກຄາມດ້ວຍການຂວໍ້າບາດ ແລະ ການຊ້ອມຮົບທາງທະຫານຢູ່ແຫຼມເກົາຫຼີ.

ເຊິ່ງທ່ານ ຄິມ ຊອງ ກ່າວອີກວ່າ ເກົາຫຼີເໜືອສະແດງຄວາມພ້ອມສຳລັບການເລີ່ມເຈລະຈາຄັ້ງໃໝ່ກັບ ສ.ອາເມຣິກາ ເມື່ອທ້າຍເດືອນກັນຍາ ທີ່ຜ່ານມາ, ເຖິງຢ່າງໃດກໍ່ຕາມ ໃນເວລາດຽວກັນລັດຖະບານ ສ.ອາເມຣິກາ ຜັດຍັງເພີ່ມມາດຕະການຂວ້ຳບາດຕໍ່ລັດຖະບານເກົາຫຼີເໜືອ ເສັ້ນທາງຂອງສາຍພົວພັນ ແລະ ການຮ່ວມມືລະຫວ່າງທັງສອງປະເທດຕໍ່ຈາກນີ້ຂຶ້ນຢູ່ກັບຝ່າຍ ສ.ອາເມຣິກາ ວ່າຕ້ອງການແບບໃດ.

ຂະນະດຽວກັນ ທ່ານ ຄິມ ຊອງ ໄດ້ກ່າວເຖິງປະເທດເພື່ອນບ້ານທາງໃຕ້ອີກວ່າ ມີພຶດຕະກຳສອງໜ້າ ເຊິ່ງໝາຍເຖິງການທີ່ເກົາຫຼີໃຕ້ຍັງຄົງຊ້ອມຮົບຮ່ວມກັບ ສ.ອາເມຣິກາ ເຖິງແມ່ນວ່າທັງເກົາຫຼີໃຕ້ ແລະ ສ.ອາເມຣິກາຕ່າງກໍ່ຢືນຢັນວ່າໄດ້ຫຼຸດລະດັບລົງຫຼາຍແລ້ວກໍ່ຕາມ, ດັ່ງນັ້ນ, ສາຍພົວພັນລະຫວ່າງເກົາຫຼີຈະດີຂຶ້ນກວ່ານີ້ອີກຫຼືບໍ່ ຫຼື ຖອຍກັບສູ່ຈຸດເດີມ ຂຶ້ນຢູ່ກັບການດຳເນີນນະໂຍບາຍຂອງລັດຖະບານເກົາຫຼີໃຕ້ເຊັ່ນກັນ ວ່າຈະຍົກເລີກນະໂຍບາຍຕ່າງປະເທດຕາມຄຳສັ່ງມະຫາອຳນາດ ແລ້ວປັບຈຸດຢືນດ້ານນະໂຍບາຍໃຫ້ເປັນອັນສະເພາະຫຼາຍຂຶ້ນໄດ້ພຽງໃດ.

ນອກຈາກນີ້, ທ່ານ ຄິມ ຊອງ ກໍ່ໄດ້ກ່າວເຖິງການສະໜັບສະໜູນຂອງລັດຖະບານເກົາຫຼີເໜືອຕໍ່ຊີຣີ, ກູບາ ແລະ ເວເນຊູເອລາ ຈາກການກົດຂີ່ຂອງມະຫາອຳນາດ ແລະ ປິດທ້າຍດ້ວຍການໃຫ້ຄຳໝັ້ນວ່າເກົາຫຼີເໜືອພະຍາຍາມຢ່າງສຸດຄວາມສາມາດ ໃນການຍຶດໝັ້ນ ແລະ ປະຕິບັດຕາມເປົ້າໝາຍການພັດທະນາແບບຍືນຍົງ (SDG) 17 ຂໍ້ຂອງສະຫະປະຊາຊາດ ສະບັບປີ 2030.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube