ສປ.ຈີນ ສະຫຼອງວັນຊາດ 70 ປີ ຢ່າງຍິ່ງໃຫຍ່, ພ້ອມປະກາດກ້ອງທຸກຢາດເຫື່ອ ເພື່ອປະຊາຊົນ

ລາຍງານ 1 ຕຸລາ 2019, ທ່ານ ສີ ຈິ້ນຜິງ ປະທານປະເທດຈີນ ເປັນປະທານໃນພິທີສວນສະໜາມ ແລະ ສະແດງແສນຍານຸພາບຂອງກອງທັບປົດປ່ອຍປະຊາຊົນຈີນ ທີ່ຈັດຕຸລັດທຽນອານເໝິນ ໃຈກາງນະຄອນຫຼວງປັກກິ່ງ  ເນື່ອງໃນໂອກາດການສະເຫຼີມສະຫຼອງຢ່າງຍິ່ງໃຫຍ່ ຄົບຮອບ 70 ປີ ແຫ່ງການສະຖາປະນາສາທາລະນະລັດ ປະຊາຊົນຈີນ ຫຼື ວັນຊາດຈີນ.

ທ່ານ ສີ ຈິ້ນຜິງ ໄດ້ກ່າວເປີດງານໂດຍມີເນື້ອໃນສຳຄັນລະບຸວ່າ: ກອງທັບປົດປ່ອຍປະຊາຊົນຈີນ ແມ່ນກອງກຳລັງທີ່ມີພາລະກິດອັນຫຍິ່ງໃຫຍ່ສຳຄັນ ນັ້ນກໍ່ຄືການປົກປັກຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ ສປ.ຈີນ, ຄວາມໝັ້ນຄົງຂອງຊາດ, ສະໜັບສະໜູນການພັດທະນາ ແລະ ມີສ່ວນຮ່ວມໃນຂະບວນການຮັກສາສັນຕິພາບໂລກ…, ກ່ອນຈະປິດທ້າຍການກ່າວເປີດງານດ້ວຍຄຳເວົ້າທີ່ວ່າ “ປະຊາຊົນຈົ່ງຈະເລີນ”, ຫຼັງຈາກນັ້ນໄດ້ຂຶ້ນລົດເປີດຫຼັງຄາເພື່ອກວດແຖວທະຫານກອງກຽດຕິຍົດ ແລະ ກອງກຳລັງຈາກທຸກໜ່ວຍງານສັງກັດກອງທັບປົດປ່ອຍປະຊາຊົນຈີນ ພ້ອມກ່າວຖາມເປັນໄລຍະໆວ່າ “ບັນດາສະຫາຍຍາກລຳບາກບໍ່?” ຫຼັງຈາກນັ້ນກໍ່ມີສຽງຕອບຢ່າງພ້ອມພຽງດັ່ງສະນັ່ນກ້ອງວ່າ “ເພື່ອປະຊາຊົນ”.

ຂະນະດຽວກັນ, ຜູ້ນຳຈີນກ່າວວ່າ ບໍ່ມີກອງກຳລັງໃດສາມາດສັ່ນຄອນສະຖານະຂອງຈີນ ຫຼື ຢຸດຢັ້ງການພັດທະນາຂອງຈີນໄດ້, ນອກຈາກນີ້ ສປ.ຈີນ ຈະຮັກສາໄວ້ເຊິ່ງສັນຕິພາບດ້ານຄວາມໝັ້ນຄົງ, ຄວາມປອດໄພ ແລະ ຄວາມຈະເລີນຮຸ່ງເຮືອງໃຫ້ກັບຮົງກົງ ແລະ ມາເກົ້າ ຕະຫຼອດຮອດການສົ່ງເສີມສາຍພົວພັນຂ້າມຊ່ອງແຄບ ທີ່ໝາຍເຖິງໄຕ້ຫວັນ ໂດຍຄວາມມຸ່ງໝັ້ນທັງໝົດຄືຄວາມພະຍາຍາມສູ່ເປົ້າໝາຍສຳຄັນຂອງການລວມຊາດຈີນໃຫ້ເປັນໜຶ່ງດຽວ.

ໃນພິທີສວນສະໜາມຄັ້ງນີ້ ນອກຈາກການເດີນຂະບວນຢ່າງພ້ອມພຽງຂອງເຈົ້າໜ້າທີ່ໃນທຸກເຫຼົ່າທັບ ແລະ ທຸກສັງກັດຂອງກອງທັບປົດປ່ອຍປະຊາຊົນຈີນແລ້ວ ຫຼາຍຝ່າຍຍັງຕິດຕາມຢ່າງໃກ້ຊິດໄປຍັງບັນດາອາວຸດຊະນິດໃໝ່ ທີ່ຈີນນຳອອກມາຮ່ວມຂະບວນສະແດງແສນຍານຸພາບໃນຄັ້ງນີ້ ທີ່ລວມຍົນສອດແນມ ແລະ ຂີປະນາວຸດຂ້າມທະວີບຄວາມໄວເໜືອສຽງ ທີ່ມີການວິເຄາະວ່າສາມາດຜ່ານລະບົບປ້ອງກັນຂອງ ສ.ອາເມຣິກາ ໄດ້ອີກດ້ວຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube