ສປປ.ລາວ ຈະລົງເລືອກຕັ້ງ ເພື່ອເປັນສະມາຊິກສະພາເສດຖະກິດ ແລະ ສັງຄົມ UN ສົກປີ 2023-2025

ລາຍງານ 1 ຕຸລາ 2019, ອີງຕາມການລາຍງານຂອງກະຊວງການຕ່າງປະເທດໃຫ້ຮູ້ວ່າ: ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ເມື່ອວັນທີ 28 ກັນຍາ 2019 ທີ່ຜ່ານມາ ໂດຍຢໍ້າຄືນເຖິງເຈດຕະນາລົມ ແລະ ຄວາມໝາຍໝັ້ນທາງດ້ານການເມືອງຂອງລັດຖະບານ ສປປ.ລາວ ເພື່ອຮ່ວມກັບວົງຄະນາຍາດສາກົນ ໃນການຮັບມື ແລະ ແກ້ໄຂບັນດາສິ່ງທ້າທາຍທີ່ພວມເກີດຂຶ້ນຢູ່ໃນພາກພື້ນ ແລະ ສາກົນ ໂດຍສະເພາະຄວາມຈໍາເປັນພື້ນຖານ ໃນການສ້າງສະພາບແວດລ້ອມແຫ່ງສັນຕິພາບ ທີ່ເອື້ອອໍານວຍໃຫ້ແກ່ການພັດທະນາປະເທດ ແລະ ການປັບປຸງຊີວິດການເປັນຢູ່ຂອງປະຊາຊົນໃນຂອບເຂດທົ່ວໂລກ.

ສປປ.ລາວ ຍາມໃດກໍ່ກຽມພ້ອມໃຫ້ການຮ່ວມມື ແລະ ສະໜັບສະຫນູນຄວາມພະຍາຍາມຂອງວົງຄະນາຍາດສາກົນ ເພື່ອແກ້ໄຂຂໍ້ຂັດແຍ່ງຕ່າງໆໂດຍສັນຕິວິທີ. ນອກນັ້ນ, ຍັງໄດ້ແຈ້ງສະພາບດ້ານການພັດທະນາເສດຖະກິດ-ສັງຄົມ, ການແກ້ໄຂບັນຫາຄວາມທຸກຍາກ ແລະ ບັນຫາສິ່ງທ້າທ້າຍອື່ນໆ ທີ່ ສປປ.ລາວ ກຳລັງປະເຊີນໜ້າ ໂດຍສະເພາະການປ່ຽນແປງດິນຟ້າອາກາດ ແລະ ໄພພິບັດຕ່າງໆ ເຊິ່ງໄດ້ສ້າງຄວາມເສຍຫາຍຢ່າງໜັກໜ່ວງ ຕໍ່ພື້ນຖານໂຄງລ່າງ, ກະສິກໍາ ແລະ ຊີວິດການເປັນຢູ່ຂອງປະຊາຊົນ. ບົນຈິດໃຈດັ່ງກ່າວ, ລັດຖະບານລາວ ໄດ້ເອົາໃຈໃສ່ ແລະ ໃຫ້ຄວາມສໍາຄັນຕໍ່ການຈັດຕັ້ງປະຕິບັດສັນຍາປາຣີ ໂດຍໄດ້ເຊື່ອມສານເຂົ້າໃນແຜນປະຕິບັດງານແຫ່ງຊາດ, ຮັບຮອງເອົາກົດໝາຍວ່າດ້ວຍ ການຄວບຄຸມໄພພິບັດ. ນອກຈາກກົນໄກແຫ່ງຊາດທີ່ມີຢູ່ແລ້ວ, ສປປ.ລາວ ຍັງໄດ້ສົ່ງເສີມການຮ່ວມມືກັບພາກພື້ນ ແລະ ສາກົນ ໂດຍສະເພາະພາຍໃຕ້ຂອບອາຊຽນ ແລະ ອົງການສະຫະປະຊາຊາດ ໃນການແກ້ໄຂຜົນກະທົບ ແລະ ສິ່ງທ້າທາຍທີ່ພວມເກີດຂຶ້ນ.

ລັດຖະບານ ສປປ.ລາວ ມີຄວາມມຸ່ງໝັ້ນຢ່າງສູງ ໃນການຈັດຕັ້ງປະຕິບັດ ວາລະ 2030 ໂດຍມີເປົ້າໝາຍເພື່ອຊຸກຍູ້ການພັດທະນາເສດຖະກິດ-ສັງຄົມ ແລະ ໃຫ້ສາມາດຫຼຸດຜ່ອນຄວາມແຕກໂຕນດ້ານການພັດທະນາຢູ່ພາຍໃນປະເທດ. ເພື່ອສືບຕໍ່ຍົກສູງບົດບາດ ແລະ ການປະກອບສ່ວນຂອງຕົນໃນເວທີສາກົນ ສປປ.ລາວ ໄດ້ປະກາດລົງສະໝັກເລືອກຕັ້ງ ເພື່ອເຂົ້າເປັນສະມາຊິກສະພາເສດຖະກິດ ແລະ ສັງຄົມ ແຫ່ງສະຫະປະຊາຊາດ (ECOSOC) ສໍາລັບສົກປີ 2023 – 2025, ເຊິ່ງເປັນຄັ້ງທໍາອິດຂອງ ສປປ.ລາວ ໃນຖານະເປັນປະເທດສະມາຊິກຂອງທັງສອງກຸ່ມປະເທດທີ່ມີຄວາມຈຳເປັນພິເສດ ຄືປະເທດດ້ອຍພັດທະນາ ແລະ ທັງເປັນປະເທດກໍາລັງພັດທະນາທີ່ບໍ່ມີຊາຍແດນຕິດທະເລ, ເຊິ່ງສະພາເສດຖະກິດ ແລະ ສັງຄົມ ແຫ່ງສະຫະປະຊາຊາດ ເປັນໜຶ່ງໃນບັນດາອົງກອນຫຼັກທີ່ສໍາຄັນຂອງອົງການສະຫະປະຊາຊາດ ທີ່ເປັນເວທີຊຸກຍູ້ການພັດທະນາເສດຖະກິດ-ສັງຄົມໃນໂລກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube