ຕຳຫຼວດຮົງກົງ ຮຽກຮ້ອງທາງການປະກາດພາວະສຸກເສີນ ເພື່ອໃຊ້ທຸກກຳລັງປາບການປະທ້ວງຫົວຮຸນແຮງ

ລາຍງານ 3 ຕຸລາ 2019, ສະມາຄົມຕຳຫຼວດຮົງກົງ ອອກຖະແຫຼງການເມື່ອວັນພຸດ 2 ຕຸລາ ທີ່ຜ່ານມາ ຮຽກຮ້ອງໃຫ້ທ່ານ ນາງ ແຄຣີ ແລມ ຫົວໜ້າຄະນະຜູ້ບໍລິຫານຮົງກົງ ປະກາດຄຳສັ່ງພາວະສຸກເສີນ ແລະ ໃຊ້ກົດໝາຍດ້ານຄວາມໝັ້ນຄົງທັງໝົດທີ່ຈຳເປັນ ຕະຫຼອດຮອດອຳນາດພິເສດຂອງລັດ ໃນດ້ານການຮັກສາສະຖຽນລະພາບດ້ານຄວາມໝັ້ນຄົງ ແລະ ຄວາມປອດໄພ ພາຍລັງທີ່ສະຖານະການການຊຸມນຸມປະທ້ວງຕໍ່ຕ້ານລັດຖະບານຮົງກົງ ແລະ ສປ.ຈີນ ໄດ້ທະວີຄວາມຮຸນແຮງຂຶ້ນເກີນຄວາມຄາດໝາຍ ເມື່ອວັນອັງຄານ 1 ຕຸລາ ທີ່ຜ່ານມາ ເຊິ່ງກົງກັບວັນຊາດຈີນ ທີ່ຜິດຈາກການຄາດການຂອງຫຼາຍຝ່າຍວ່າ ຈະເປັນວັນທີ່ສະຖານະການຍຸຕິ, ເມື່ອເກີດເຫດກຸ່ມຜູ້ປທະວ້ງຫົວຮຸນແຮງແຖວໜ້າຈຳນວນໜຶ່ງປິດລ້ອມລົດຕຳຫຼວດ ແລະ ພະຍາຍາມທຳຮ້າຍເຈົ້າໜ້າທີ່ ອັນໄດ້ກົດດັນໃຫ້ຕຳຫຼວດຈຳເປັນຕ້ອງຍິ່ງປືນທີ່ບັນຈຸລູກປືນແທ້ໃສ່ຜູ້ປະທ້ວງ ເຊິ່ງສຳນັກງານຕຳຫຼວດຮົງກົງຢືນຢັນວ່າ ເປັນການປົກປ້ອງກັນຕົນເອງຕາມຫຼັກກົດໝາຍສາກົນ.

ຖະແຫຼງການຂອງສະມາຄົມຕຳຫຼວດຮົງກົງລະບຸອີກວ່າ ເຈົ້າໜ້າທີ່ທຸກຄົນປະຕິບັດໜ້າທີ່ພາຍໃຕ້ແຮງກົດດັນຢ່າງໜັກ ທ່າມກາງສະຖານະການທີ່ສ່ຽງອັນຕະລາຍເຖິງແກ່ຊີວິດ ຕະຫຼອດໄລຍະ 4 ເດືອນທີ່ຜ່ານມາ ແລະ ເປັນໜ່ວຍງານດຽວທີ່ຢູ່ແດນໜ້າໃນພາກສະໜາມ ແຕ່ຜັດມີອຳນາດຈຳກັດໃນຫຼາຍດ້ານ ຂໍໃຫ້ຜູ້ບໍລິຫານລະດັບສູງເພີ່ມການສະໜັບສະໜູນແກ່ເຈົ້າໜ້າທີ່ທຸກຄົນດ້ວຍ.

ຂະນະທີ່ກຸ່ມຜູ້ປະທ້ວງຫົວຮຸນແຮງຈຳນວນໜຶ່ງ ໄດ້ທຳລາຍຊັບສິນ ແລະ ກໍ່ເຫດວຸ້ນວາຍຕາມສະຖານທີ່ຫຼາຍແຫ່ງຕະຫຼອດຄືນວັນພຸດ ທີ່ຜ່ານມາ ແລະ ມີການປະທະກັບຕຳຫຼວດປາບຈະລາຈົນ ເມື່ອຕອນເຊົ້າມືດຂອງວັນພະຫັດນີ້ ເພື່ອຕອບໂຕ້ມາດຕະການການໃຊ້ລູກປືນແທ້ຂອງເຈົ້າໜ້າທີ່ ແຕ່ມີລາຍງານວ່າເຫດຮຸນແຮງຄັ້ງນີ້ຍັງບໍ່ຂະຫຍາຍວົງກວ້າງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube