ທາງການຮົງກົງໃຊ້ອຳນາດພິເສດ ສັ່ງຫ້າມບໍ່ໃຫ້ຜູ້ປະທ້ວງໃສ່ໜ້າກາກ ແລະ ສິ່ງປົກປິດໃບໜ້າ

ລາຍງານ 5 ກັນຍາ 2019, ທ່ານ ນາງ ແຄຣີ ແລມ ຫົວໜ້າຄະນະຜູ້ບໍລິຫານຮົງກົງ ພ້ອມຄະນະ 16 ທ່ານ ໄດ້ຖະແຫຼງການຮ່ວມກັນ ເມື່ອວັນສຸກ 4 ກັນຍາ ທີ່ຜ່ານມາ ປະກາດໃຊ້ອຳນາດຕາມກົດໝາຍຄວບຄຸມຄວາມສະຫງົບໃນສະຖານະການສຸກເສີນ ເຊິ່ງເປັນກົດໝາຍທີ່ສ້າງຂຶ້ນເມື່ອປີ 1922 ໃນສະໄໝທີ່ຮົງກົງຍັງຢູ່ພາຍໃຕ້ການປົກຄອງຂອງອັງກິດ, ຫ້າມໃສ່ໜ້າກາກ ແລະ ເຄື່ອງອຳພາງໃບໜ້າທຸກປະເພດ ລະຫວ່າງເຂົ້າຮ່ວມການໂຮມຊຸມນຸມປະທ້ວງທາງການເມືອງ ຕະຫຼອດຮອດການແຕ້ມສີໃສ່ໜ້າ, ໂດຍມາດຕະການດັ່ງກ່າວຈະມີຜົນຕັ້ງແຕ່ເວລາ 00:01 ໂມງຂອງວັນທີ 5 ກັນຍານີ້ ຕາມເວລາທ້ອງຖິ່ນ ຈົນກວ່າຈະມີການປ່ຽນແປງ ແລະ ມາດຕະການດັ່ງກ່າວບໍ່ຕ້ອງຜ່ານການລົງມະຕິຂອງສະພາ.

ເຊິ່ງທ່ານ ນາງ ແຄຣີ ແລມ ກ່າວວ່າເປັນການຕັດສິນໃຈທີ່ບໍ່ງ່າຍ ແຕ່ຈຳເປັນ ພ້ອມທັງຢ້ຳວ່າມາດຕະການທີ່ບັງຄັບໃຊ້ນີ້ ບໍ່ໄດ້ໝາຍຄວາມວ່າຮົງກົງຢູ່ພາຍໃຕ້ສະຖານະການສຸກເສີນ, ເຖິງຢ່າງໃດກໍ່ຕາມ ຕະຫຼອດໄລຍະເວລາກວ່າ 4 ເດືອນທີ່ຜ່ານມາ ກຸ່ມຜູ້ປະທ້ວງຕໍ່ຕ້ານລັດຖະບານບໍ່ເຄີຍປະຕິບັດຕາມຄຳຮ້ອງຂໍ ແລະ ຄຳສັ່ງຂອງເຈົ້າໜ້າທີ່ລັດທຸກລະດັບ, ທ່ານ ນາງ ແລະ ຄະນະຫວັງເປັນຢ່າງຍິ່ງວ່າມາດຕະການນີ້ຈະຊ່ວຍຫຼຸດຜ່ອນຄວາມເຄັ່ງຕຶງຂອງສະຖານະການໄດ້ ໂດຍຜູ້ໃດກໍ່ຕາມທີ່ລະເມີດອາດຕ້ອງຮັບໂທດຕັດອິດສະຫຼະພາບສູງສຸດ 1 ປີ ຫຼື ປັບໃໝ 25,000 ໂດລາຮົງກົງ.

ເຖິງຢ່າງໃດກໍ່ຕາມ, ການໃສ່ໜ້າກາກອະນຸຍາດສະເພາະບຸກຄົນທີ່ບໍ່ສະບາຍ, ການໃສ່ໜ້າກາກ ແລະ ແຕ້ມສີໃສ່ໜ້າລະຫວ່າງການປະກອບພິທີທາງສາສະໜາ, ເຈົ້າໜ້າທີ່ຝ່າຍຄວາມໝັ້ນຄົງ ແລະ ນັກຂ່າວ ທີ່ປະຕິບັດໜ້າທີ່ໃນພາກສະໜາມລະຫວ່າງເຫດການທີ່ມີການປະທະເທົ່ານັ້ນ, ມາດຕະການດັ່ງກ່າວຈຶ່ງບໍ່ອາດຮຽກໄດ້ວ່າ ເປັນການລະເມີດສິດທິມະນຸດ ແລະ ບໍ່ແມ່ນການລະເມີດເສລີພາບປະຊາຊົນ ແຕ່ເປັນມາດຕະການເບື້ອງຕົ້ນໃນການຟື້ນຟູຄວາມສະຫງົບຮຽບຮ້ອຍໃຫ້ກັບຄືນສູ່ສັງຄົມ ແລະ ເພື່ອຫຼຸດຜ່ອນຄວາມເປັນຫ່ວງເປັນໃຍຂອງປະຊາຊົນສ່ວນໃຫຍ່.

ຂະນະດຽວກັນ, ທ່ານ ນາງ ແຄຣີ ແລມ ກ່າວອີກວ່າ ການຮຽກຮ້ອງໃຫ້ຕົນລາອອກ ບໍ່ວ່າຈະມາຈາກຝ່າຍໃດກໍ່ຕາມ ກໍ່ບໍ່ແມ່ນແນວທາງທີ່ຈະແກ້ໄຂບັນຫາໄດ້ ແລະ ຢ້ຳວ່າຕາບໃດທີ່ຜູ້ປະທ້ວງບໍ່ກໍ່ຈະລາຈົນ ເຈົ້າໜ້າທີ່ກໍ່ຈະບໍ່ມີທາງໃຊ້ກຳລັງ, ຕໍ່ມາພັກເສລີນິຍົມ ໜຶ່ງໃນພັກຝ່າຍຄ້ານປະນາມການໃຊ້ອຳນາດພິເສດຂອງຄະນະຜູ້ບໍລິຫານຮົງກົງ ວ່າເປັນຄວາມຜິດພາດອັນຮ້າຍແຮງ, ໃນດ້ານຂອງທ່ານ ເລສເຕີ ຊຸມ ໜຶ່ງໃນແກນນຳພັກເດໂມຊິສໂຕ ແກນນຳຄົນສຳຄັນຂອງຝ່າຍຕໍ່ຕ້ານລັດຖະບານ ປະກາດກຽມຍື່ນອຸທອນ.

ການເຄື່ອນໄຫວດັ່ງກ່າວຂອງລັດຖະບານຮົງກົງ ຖືເປັນຄັ້ງທຳອິດ ນັບຕັ້ງແຕ່ປີ 1967 ເມື່ອເຊີເດວິດ ເທຣນ ເຈົ້າຄອງຮົງກົງໃນເວລານັ້ນ ໃຊ້ອຳນາດສຸກເສີນ ເພື່ອສະຫຼາຍການຈະລາຈົນຂອງກຸ່ມຜູ້ປະທ້ວງຝ່າຍຊ້າຍ ໂດຍການປະທ້ວງ ແລະ ປະທະກັນທີ່ຍາວນານກວ່າເຄິ່ງປີ ສົ່ງຜົນໃຫ້ມີເສຍຊີວິດຢ່າງໜ້ອຍ 51 ຄົນ.

HTML tutorial