ການປະທ້ວງຂັບໄລ່ລັດຖະບານອິຣັກ ດຸເດືອດທີ່ສຸດຈາກບັນຫາໄພວ່າງງານ ແລະ ການສໍ້ລາດບັງຫຼວງ

ລາຍງານ 5 ຕຸລາ 2019, ສະຖານະການການປະທ້ວງຂັບໄລ່ລັດຖະບານອິຣັກ ທີ່ເກີດຂຶ້ນໃນຂອບເຂດທົ່ວປະເທດຕັ້ງແຕ່ກາງອາທິດນີ້ ຍັງບໍ່ມີທິດທາງວ່າຈະຜ່ອນຄາຍໄດ້ໂດຍງ່າຍ ເຖິງແມ່ນວ່າລັດຖະບານໄດ້ປະກາດພາວະສຸກເສີນໂດຍບໍ່ມີກຳນົດ ໃນນະຄອນຫຼວງແບກແດດ ຕັ້ງແຕ່ວັນພະຫັດ 3 ກັນຍາ ທີ່ຜ່ານມາ ແຕ່ປະຊາຊົນຈຳນວນຫຼາຍຍັງອອກມາເຄື່ອນໄດ້ຕາມຖະໜົນຫົນທາງ ແລະ ປະທະກັບເຈົ້າໜ້າທີ່ຝ່າຍຄວາມໝັ້ນຄົງ ທີ່ໃຊ້ມາດຕະການເດັດຂາດ ໃນການຄວບຄຸມຜູ້ປະທ້ວງ ໂດຍມີການໃຊ້ທັງແກັດນ້ຳຕາ ແລະ ລູກປືນແທ້, ເຖິງແມ່ນວ່າພາກລັດຍັງບໍ່ເປີດເຜີຍຂໍ້ມູນກ່ຽວກັບຄວາມເສຍຫາຍ ລວມເຖິງຈຳນວນຜູ້ເສຍຊີວິດ ແຕ່ຄະນະກຳມະການສິດທິມະນຸດອິຣັກ ລາຍງານຈຳນວນຜູ້ເສຍຊີວິດເພີ່ມເປັນຢ່າງໜ້ອຍ 65 ຄົນ ແລະ ໄດ້ຮັບບາດເຈັບ 1,600 ຄົນ.

ເຊິ່ງມີການວິເຄາະໄປໃນທິດທາງດຽວກັນວ່າ ຊະນວນເຫດຂອງການປະທ້ວງ ມາຈາກຄວາມຄັບແຄ້ນໃຈ ແລະ ໝົດຫວັງຂອງປະຊາຊົນ ຕໍ່ກັບຄວາມບໍ່ພໍໃຈທີ່ພາກລັດຍັງບໍ່ສາມາດແກ້ໄຂບັນຫາເສດຖະກິດທີ່ຖົດຖອຍມາດົນ ສົ່ງຜົນໃຫ້ອັດຕາການວ່າງງານຍັງຄົງສູງ ໂດຍສະເພາະໃນກຸ່ມໄວໜຸ່ມ ແລະ ລະບົບພື້ນຖານໂຄງລ່າງໃນດ້ານຕ່າງໆທີ່ຂາດການພັດທະນາ ແລະ ປົວແປງ ເນື່ອງຈາກການສໍ້ລາດບັງຫຼວງຂອງເຈົ້າໜ້າທີ່ລັດ.

ຂະນະທີ່ທ່ານ ແກຣນ ຢາຕອນເລາະ ອາລີ ຊິສຕານີ ຜູ້ນຳທາງຈິດວິນຍານຂອງອິຣັກ ຮຽກຮ້ອງລັດຖະບານ ພາຍໃຕ້ການນຳຂອງທ່ານນາຍົກລັດຖະມົນຕີ ອັບເດວ ມາດີ ທີ່ເຂົ້າມາບໍລິຫານປະເທດເມື່ອເດືອນຕຸລາ ປີທີ່ຜ່ານມາ ຕອບສະໜອງຢ່າງເປັນຮູບປະທຳຫຼາຍກວ່ານີ້ ເພື່ອຫຼຸດຜ່ອນຄວາມຄັບແຄ້ນໃຈ ແລະ ຄວາມໝົດຫວັງຂອງປະຊາຊົນ ຖ້າບໍ່ດັ່ງນັ້ນ ສະຖານະການຍິ່ງຈະເພີ່ມທະວີຄວາມຮຸນແຮງ, ຕໍ່ມາພັນທະມິດນັກປະຕິວັດເພື່ອການປະຕູຮູບ ທີ່ເປັນການລວມຕົວລະຫວ່າງພັກປະຊານິຍົມຝ່າຍຂວາ ກັບ ພັກຄອມມູນິດ ພາຍໃຕ້ການນຳຂອງທ່ານ ມຸກຕາດາ ອັນ-ຊາດ ນັກສາສະໜາສາຍປະຕິຮູບ ທີ່ຄອງສຽງສ່ວນໃຫຍ່ໃນສະພາປະຊາຊົນອິຣັກ (ສະພາລ່າງ) ອອກຖະແຫຼງການຄ້າຍຄືກັນ ແຕ່ເພີ່ມຂໍ້ຮຽກຮ້ອງໃຫ້ລັດຖະບານລາອອກ ຫາກຍັງບໍ່ສາມາດສະເໜີແຜນແກ້ໄຂເສດຖະກິດ ແລະ ການສໍ້ລາດບັງຫຼວງຢ່າງເລັ່ງດ່ວນໄດ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube