ຂະບວນປະທ້ວງລັດຖະບານອີຣັກ ເສຍຊີວິດກວ່າ 100 ຄົນແລ້ວ, UN ຮຽກຮ້ອງໃຫ້ຢຸດຕິຄວາມຮຸນແຮງ

ລາຍງານ 6 ຕຸລາ 2019, ສະຫະປະຊາຊາດ (UN) ເຜີຍແຜ່ຖະແຫຼງການຂອງທ່ານ ນາງ ເຈນີນ ເຮນນິສ-ພລາສແຊດ ຫົວໜ້າສຳນັກງານ UN ປະຈຳອິຣັກ ເມື່ອວັນເສົາ 5 ຕຸລາ ທີ່ຜ່ານມາ ວ່າສະຖານະການການປະທ້ວງທີ່ຮຸນແຮງໃນອິຣັກ ໄດ້ສ້າງຄວາມສູນເສຍແກ່ຊີວິດໂດຍບໍ່ຈຳເປັນ ນອກຈາກຜູ້ທີ່ຢູ່ເບື້ອງຫຼັງຕ້ອງຮັບຜິດຊອບຂັ້ນສູງສຸດຕາມກົດໝາຍແລ້ວ ຜູ້ແທນລະດັບສູງຂອງ UN ໃນອິຣັກຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງຢຸດຕິການໃຊ້ຄວາມຮຸນແຮງ ແລະ ຫັນໜ້າເຂົ້າຫາກັນ ເພື່ອຫາທາງອອກທີ່ເໝາະສົມໃຫ້ປະຊາຊົນຫຼຸດພົ້ນຈາກຄວາມແຄບແຄ້ນ ແລະ ໝົດຫວັງຕໍ່ລັດຖະບານ ທີ່ບໍ່ສາມາດແກ້ໄຂບັນຫາເສດຖະກິດ ອັນສົ່ງຜົນໃຫ້ເກີດໄພວ່າງງານ ໂດຍສະເພາະໃນກຸ່ມຄົນໄວໜຸ່ມ ແລະ ລະບົບພື້ນຖານໂຄງລ່າງທີ່ຂາດການພັດທະນາ ແລະ ປົວແປງ ອັນສະທ້ອນເຖິງບັນຫາການສໍ້ລາດບັງຫຼວງໃນພາກລັດ.

ເຊິ່ງອີງຕາມການລາຍງານຂອງຄະນະກຳມາທິການສິດທິມະນຸດ ປະຈຳສະພາອິຣັກລະບຸຈຳນວນຜູ້ເສຍຊີວິດຈາກການປະທ້ວງຕໍ່ຕ້ານລັດຖະບານ ທີ່ເລີ່ມກໍ່ຕົວຂຶ້ນມາແຕ່ອາທິດທີ່ຜ່ານມາ ມີບໍ່ຕ່ຳກວ່າ 100 ຄົນ ແລະ ໄດ້ຮັບບາດເຈັບຫຼາຍກວ່າ 4,000 ຄົນ, ເຊິ່ງການປະທ້ວງເລີ່ມຂຶ້ນທີ່ນະຄອນຫຼວງແບກແດດ ກ່ອນທີ່ຈະລຸກລາມຂະຫຍາຍກວ້າງອອກໄປທົ່ວປະເທດຢ່າງໄວວາ, ເຖິງຢ່າງໃດກໍ່ຕາມ, ອົງກອນສິດທິມະນຸດຫຼາຍແຫ່ງ ຄາດການຈຳນວນຜູ້ເສຍຊີວິດ ແລະ ໄດ້ຮັບບາດເຈັບທີ່ແທ້ຈິງອາດມີຫຼາຍກວ່ານັ້ນ ເນື່ອງຈາກເຈົ້າໜ້າທີ່ຝ່າຍຄວາມໝັ້ນຄົງໃຊ້ມາດຕະການຂັ້ນເດັດຂາດ ຄວບຄຸມສະຖານະການ ທີ່ລວມເຖິງການໃຊ້ລູກປືນແທ້ ໄດ້ຄຽງຄູ່ກັບການໃຊ້ແກັດນ້ຳຕາ ໂດຍຜູ້ເສຍຊີວິດ ແລະ ບາດເຈັບສ່ວນໃຫຍ່ເປັນຜູ້ປະທ້ວງ.

ເຖິງຢ່າງໃດກໍ່ຕາມ, ລັດຖະບານອິຣັກ ໄດ້ຕັດສິນໃຈຍົກເລີກສະຖານະການສຸກເສີນໃນນະຄອນຫຼວງ ພາຍຫຼັງປະກາດໃຊ້ຕັ້ງແຕ່ວັນພະຫັດ 3 ຕຸລາ ທີ່ຜ່ານມາ ໂດຍໃຫ້ເຫດຜົນວ່າ ເພື່ອໃຫ້ປະຊາຊົນໄດ້ກັບມາໃຊ້ຊີວິດຕາມປົກກະຕິ, ເຊິ່ງຮ້ານຄ້າບາງສ່ວນກໍ່ໄດ້ເລີ່ມກັບມາເປີດບໍລິການ ແລະ ປະຊາຊົນເລີ່ມອອກມາສັນຈອນແນ່ແລ້ວ, ໃນດ້ານຂອງສະພາຜູ້ແທນປະຊາຊົນອິຣັກ (ສະພາລ່າງ) ໄດ້ເປີດປະຊຸມວາລະສຸກເສີນກ່ຽວກັບສະຖານະການຄວາມຮຸນແຮງທີ່ເກີດຂຶ້ນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube