ການເຈລະຈາຂອງຜູ້ແທນລະດັບສູງ ສ.ອາເມຣິກາ-ເກົາຫຼີເໜືອ ທີ່ຊູແອດ ສຽງແຕກໄປຄົນລະທາງ

ລາຍງານ 6 ຕຸລາ 2019, ທ່ານ ຄິມ ມະຢອງ-ກິວ ຫົວໜ້າຄະນະຜູ້ແທນເຈລະຈາຂອງເກົາຫຼີເໜືອ ກ່າວເມື່ອວັນເສົາ 5 ຕຸລາ ທີ່ຜ່ານມາ ພາຍຫຼັງສຳເລັດການເຈລະຈາກັບຄະນະຜູ້ແທນເຈລະຈາຂອງສະຫະລັດ ອາເມຣິກາ ທີ່ນຳໂດຍທ່ານ ສະຕີເຟນ ບີກັນ ທີ່ຫໍປະຊຸມເກາະລິດິນໂກ ຝັ່ງຕາເວັນອອກສຽງເໜືອຂອງນະຄອນຫຼວງສະຕັອກໂຮມ ປະເທດຊູແອດ (ສະວີເດນ) ວ່າເປັນການປຶກສາຫາລືທີ່ບໍ່ມີໝາກຜົນຫຍັງ ບໍ່ມີເຈົ້າໜ້າທີ່ຄົນໃດຂອງລັດຖະບານເກົາຫຼີເໜືອ ທີ່ຮ່ວມໂຕະເຈລະຈາຄັ້ງນີ້ມີຄວາມເພິ່ງພໍໃຈຕໍ່ຄູ່ເຈລະຈາ ທີ່ນອກຈາກບໍ່ມີຄວາມຫົດຢືດ ແລະ ປະນີປະນອມແລ້ວ ທ່າທີຂອງຄະນະລັດຖະບານ ສ.ອາເມຣິກາ ຍັງບົ່ງບອກໄດ້ຢ່າງຊັດເຈນວ່າ ບໍ່ມີການກຽມຕົວມາກ່ອນ ຖືວ່າບໍ່ມີຄວາມຈິງໃຈ, ບັນຍາກາດ ແລະ ບັນຫາຂອງການປຶກສາຫາລືໃນຄັ້ງນີ້ ຜິດຈາກທີ່ລັດຖະບານເກົາຫຼີເໜືອຄາດໝາຍໄວ້ຫຼາຍ.

ໃນດ້ານຂອງທ່ານ ສະຕີເຟນ ບີກັນ ປະຕິເສດໃຫ້ສຳພາດພາຍຫຼັງຈົບການປຶກສາຫາລື ໂດຍກະຊວງການຕ່າງປະເທດ ສ.ອາເມຣິກາ ອອກຖະແຫຼງການວ່າ ຄຳວິຈານຂອງທ່ານ ຄິມ ມະຢອງ-ກິວ ບໍ່ສອດຄ່ອງກັບຄວາມມຸ່ງໝັ້ນ ແລະ ຄວາມພະຍາຍາມຢ່າງສຸດຄວາມສາມາດຂອງຄະນະຜູ້ແທນເຈລະຈາ ສ.ອາເມຣິກາ ໃນການພົບປະຫາລືກັບຄະນະຜູ້ແທນເກົາຫຼີເໜືອ ເປັນເວລາເຖິງ 8 ຊົ່ວໂມງເຄິ່ງ ທີ່ຊູແອດແມ່ນແຕ່ໜ້ອຍດຽວ, ທ່ານ ສະຕີເຟນ ບີກັນ ແລະ ຄະນະນຳສະເໜີແນວທາງທີ່ສ້າງສັນ ແລະ ບັນຍາກາດການປຶກສາຫາລືເປັນໄປດ້ວຍມິດໄມຕີ, ເຖິງຢ່າງໃດກໍ່ຕາມ ການພົບປະຫາລືກັນພຽງວັນດຽວ ແລະ ບໍ່ພໍເທົ່າໃດຊົ່ວໂມງ ຍັງບໍ່ສາມາດຕັດສິນອະນາຄົດໄດ້ ອັນເປັນການສົ່ງສັນຍານວ່າ ຈະມີການເຈລະຈາອີກຄັ້ງໃໝ່ ແຕ່ຝ່າຍເກົາຫຼີເໜືອ ຍັງບໍ່ໄດ້ກ່າວເຖິງເລື່ອງນີ້.

ຂະນະທີ່ກະຊວງການຕ່າງປະເທດຊູແອດ ຍັງບໍ່ສະແດງທ່າທີ່ ວ່າຈະມີການເຈລະຈາຄັ້ງໃໝ່ລະຫວ່າງ ສ.ອາເມຣິກາ ກັບ ເກົາຫຼີເໜືອຫຼືບໍ່ ແລະ ທ່າທີ່ທີ່ແທ້ຈິງຂອງທັງສອງຝ່າຍແມ່ນແນວໃດ, ເຊິ່ງຊູແອດເປັນພຽງບໍ່ພໍເທົ່າໃດປະເທດໃນເອີຣົບ ທີ່ເປັນສະຖານທີ່ຕັ້ງຂອງສະຖານເອກອັກຄະລັດຖະທູດເກົາຫຼີເໜືອ ແລະ ຍັງມີສະຖານເອກອັກຄະລັດຖະທູດຊູແອດ ປະຈຳນະຄອນຫຼວງປຽງຢາງອີກດ້ວຍ.

ການພົບປະຫາລືລະຫວ່າງ ສ.ອາເມຣິກາ ແລະ ເກົາຫຼີເໜືອໃນຄັ້ງນີ້ ເກີດຂຶ້ນພາຍຫຼັງການພົບກັນທີ່ເຂດປອດທະຫານແຫຼມເກົາຫຼີ ລະຫວ່າງທ່ານ ໂດໂນ ທຣຳ ປະທານປະເທດ ສ.ອາເມຣິກາ ແລະ ທ່ານ ຄິມ ຈອງ-ອຶນ ຜູ້ນຳສູງສຸດເກົາຫຼີເໜືອ ເມື່ອເດືອນມິຖຸນາ ທີ່່ຜານມາ, ນອກຈາກນີ້ ຜູ້ນຳ ສ.ອາເມຣິກາ ແລະ ເກົາຫຼີເໜືອ ຍັງໄດ້ລົງນາມຮ່ວມກັນໃນເອກະສານ ພາຍຫຼັງກອງປະຊຸມສຸດຍອດ ຄັ້ງປະຫວັດສາດ ທີ່ສິງກະໂປ ເມື່ອເດືອນມິຖຸນາ 2018 ທີ່ມີເນື້ອໃນກ່ຽວກັບການປົດນິວເຄຼຍ ແຕ່ກໍ່ບໍ່ມີຫຍັງຄືບໜ້າເປັນຮູບປະທຳ ແລະ ລັດຖະບານເກົາຫຼີເໜືອໄດ້ທົດລອງຂີປະນາວຸດແລ້ວ 9 ຄັ້ງ ນັບຕັ້ງແຕ່ວັນທີ 25 ກໍລະກົດ ທີ່ຜ່ານມາ, ຄັ້ງຫຼ້າສຸດເກີດຂຶ້ນເມື່ອອາທິດ ທີ່ຜ່ານມາ ເປັນຂີປະນາວຸດແບບຍິງຈາກເຮືອດຳນ້ຳ ລຸ້ນຫຼ້າສຸດ ປຸກກຸກຊອງ-3.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube