ຜູ້ນຳຍີ່ປຸ່ນປະກາດວ່າ ຕ້ອງການເຈລະຈາກັບຜູ້ນຳເກົາຫຼີເໜືອ ແບບບໍ່ມີເງື່ອນໄຂ ເພື່ອຟື້ນຟູສາຍພົວພັນ

ລາຍງານ 6 ຕຸລາ 2019, ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ຖະແຫຼງຕໍ່ກອງປະຊຸມສະພາປະຊາຊົນ ເມື່ອວັນສຸກ 4 ຕຸລາ ທີ່ຜ່ານມາ ວ່າຕົນມີຄວາມມຸ່ງໝັ້ນສູງສຸດ ໃນການສະແຫວງຫາໂອກາດ ເພື່ອປຶກສາຫາລືແບບພົບໜ້າກັບທ່ານ ຄິມ ຈອງ-ອຶນ ຜູ້ນຳສູງສຸດເກົາຫຼີເໜືອ ພ້ອມທັງຢືນຢັນວ່າ ຫາກໄດ້ຮັບໂອກາດນັ້ນ ຍີ່ປຸ່ນບໍ່ຕັ້ງເງື່ອນໄຂລ່ວງໜ້າກັບລັດຖະບານເກົາຫຼີເໜືອ ເພື່ອສ້າງບັນຍາກາດການເຈລະຈາຟື້ນຟູສາຍພົວພັນຢ່າງເປັນມິດ ທີ່ລັດຖະບານຍີ່ປຸ່ນມີຫຼາຍບັນຫາທີ່ຕ້ອງການປຶກສາຫາລືກັບເກົາຫຼີເໜືອ ໂດຍສະເພາະບັນຫາທີ່ເຈົ້າໜ້າທີ່ຂອງເກົາຫຼີເໜືອລັກພາຕົວພົນລະເມືອງຍີ່ປຸ່ນ 17 ຄົນ, ແຕ່ລັດຖະບານເກົາຫຼີເໜືອຍອມຮັບຄັ້ງດຽວ ເມື່ອປີ 2002 ວ່າມີການລັກພາຕົວຄົນຍີ່ປຸ່ນຈິງ ແຕ່ມີຈຳນວນ 13 ຄົນເທົ່ານັ້ນ ໂດຍ 8 ຄົນເສຍຊີວິດແລ້ວ ແລະ ອີກ 4 ຄົນເຖິງແມ່ນວ່າຖືກລັກພາຕົວ ແຕ່ບໍ່ໄດ້ມີການນຳຕົວເຂົ້າມາໃນເກົາຫຼີເໜືອ ແລະ ເຫດການທັງໝົດເກີດຂຶ້ນເມື່ອຫຼາຍທົດສະວັດກ່ອນໜ້ານີ້.

ເຖິງຢ່າງໃດກໍ່ຕາມ, ການອອກມາສະແດງທ່າທີຂອງທ່ານ ຊິນໂຊ ອາເບະ ເກີດຂຶ້ນພຽງບໍ່ພໍເທົ່າໃດວັນ ພາຍຫຼັງທີ່ເກົາຫຼີເໜືອປະກາດຄວາມສຳເລັດໃນການທົດລອງປະສິດທິພາບຂີປະນາວຸດແບບຍິງຈາກເຮືອດຳນ້ຳ ລຸ້ນຫຼ້າສຸດ “ປຸກກຸກຊອງ-3” ຢູ່ອ່າວວອນຊານ ທາງທິດຕາເວັນອອກສຽງໃຕ້ຂອງເກົາຫຼີເໜືອ ໂດຍຈະຫຼວດໄດ້ແຕກອອກເປັນ 2 ສ່ວນ ແລະ ສ່ວນໜຶ່ງຕົກລົງໃນນ່ານນ້ຳທີ່ຖືເປັນເຂດເສດຖະກິດສະເພາະ (EEC) ຂອງຍີ່ປຸ່ນ, ແຕ່ເປັນທີ່ໜ້າສັງເກດວ່າ ຜູ້ນຳຍີ່ປຸ່ນບໍ່ກ່າວເຖິງບັນຫານີ້ ໃນລະຫວ່າງການຖະແຫຼງຈຸດຢືນ ເພື່ອຂໍພົບປະກັບຜູ້ນຳເກົາຫຼີເໜືອ ແລະ ບໍ່ໄດ້ກ່າວເຖິງເກົາຫຼີໃຕ້ໃນເລື່ອງການຜ່ອນຄາຍຄວາມເຄັ່ງຕຶງຢູ່ແຫຼມເກົາຫຼີ, ໂດຍນາຍົກລັດຖະມົນຕີຍີ່ປຸ່ນ ກ່າວພຽງວ່າ ເກົາຫຼີໃຕ້ຕ້ອງຢຸດຕິການຟື້ນຟູບັນຫາແຮງງານທາດສະໄໝສົງຄາມ ທີ່ຍີ່ປຸ່ນໄດ້ຊົດເຊີຍໃຫ້ຄົບຖ້ວນຕາມຂໍ້ຕົກລົງແລ້ວ ເຊິ່ງບັນຫາດັ່ງກ່າວກຳລັງສ້າງຄວາມເຄັ່ງຕຶງໃຫ້ກັບສາຍພົວພັນທາງການຄ້າລະຫວ່າງສອງປະເທດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube