ເຈົ້າໜ້າທີ່ກັກຕົວ ຜູ້ກ່ຽວຂ້ອງລະເບີດຫິນໂຮງງານຊີມັງຫຼວງພະບາງ ພ້ອມເລັ່ງປະເມີນຄວາມເສຍຫາຍ

ລາຍງານ 8 ຕຸລາ 2019, ຈາກກໍລະນີການລະເບີດຫິນ ເພື່ອເອົາຫິນປູນເຂົ້າເປັນວັດຖຸດິບ ຂອງໂຮງງານຊີມັງຫຼວງພະບາງ ຈຳກັດ ຕັ້ງຢູ່ເຂດພັດທະນານ້ຳຖ້ວມ ເມືອງນ້ຳບາກ ແຂວງຫຼວພະບາງ ວັນທີ 5 ຕຸລາ ທີ່ຜ່ານມາ, ທີ່ສ້າງຜົນກະທົບຕໍ່ຊີວິດ ແລະ ຊັບສິນຂອງປະຊາຊົນບໍລິເວນໃກ້ຄຽງ.

ຫຼ້າສຸດໂດຍອີງຕາມແຫຼ່ງຂ່າວສຳນັກຂ່າວສານປະເທດລາວ (KPL) ສື່ທາງການໃຫ້ຮູ້ວ່າ: ອາດຍ້ອນວິຊາການຜູ້ຮັບເໝົາ ທ້າວ ລາວເຈົ່າ ບໍ່ປະຕິບັດຕາມຫຼັກການເຕັກນິກ-ວິຊາການ ຢ່າງເຂັ້ມງວດ ອັນໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນຂອງປະຊາຊົນ ຢູ່ບ້ານໂພນມະນີ, ມີເຮືອນເປ່ເພ 81 ຫຼັງ ແລະ 2 ຫຼັງ ໄດ້ຮັບຄວາມເສຍຫາຍໜັກ, ບາດເຈັບສົມຄວນ 23 ຄົນ, ບາດເຈັບສາຫັດ 8 ຄົນ ແລະ ເສຍຊີວິດ 1 ຄົນ.

ເຊິ່ງການລາຍງານດັ່ງກ່າວຂອງ KPL ຖືວ່າຈຳນວນຜູ້ເສຍຊີວິດແມ່ນມີຄວາມຄາດເຄື່ອນຈາກການລາຍງານຂອງປະຊາຊົນຜ່ານສື່ອອນລາຍກ່ອນໜ້ານີ້ ທີ່ລະບຸວ່າ ມີຜູ້ເສຍຊີວິດ 3 ຄົນ ແລະ ບາງແຫຼ່ງຂ່າວກໍ່ວ່າເສຍຊີວິດ 2 ຄົນ, ແຕ່ການລາຍງານຂອງ KPL ກໍ່ຖືວ່າເປັນການຢືນຢັນຕົວເລກຢ່າງເປັນທາງການໃນເບື້ອງຕົ້ນ.

ໃນດ້ານຂອງ ທ່ານ ຄຳວອນ ແກ້ວລຸນໜູນ ຮອງເຈົ້າເມືອງນ້ຳບາກ ໄດ້ໃຫ້ສຳພາດວ່າ: ທຸກຄັ້ງກ່ອນຈະມີການລະເບີດຫີນ ອົງການປົກຄອງເມືອງ ໄດ້ແຕ່ງຕັ້ງຄະນະຮັບຜິດຊອບ ເພື່ອລົງຕິດຕາມ-ກວດກາ ຢ່າງໃກ້ຊິດ ທັງໄດ້ຊີ້ນຳໃຫ້ມີການປະກອບພິທາງສາສະໜາທຸກຄັ້ງ ກ່ອນການລະເບີດຫີນ, ຕາມປົກກະຕິຄວາມແຮງຂອງລະເບີດ ຈະບໍ່ມີຜົນກະທົບມາຮອດເຮືອນປະຊາຊົນ ເຖິງວ່າຈະໃຊ້ດິນລະເບີດຄັ້ງລະ 10-20 ໂຕນ, ແຕ່ເທື່ອນີ້ ອາດມີຄວາມຜິດພາດດ້ານເຕັກນິກ ເພາະເຂົາເຈົ້າໄດ້ໃຊ້ດິນລະເບີດປະມານ 14 ໂຕນ ປະກົດວ່າລະເບີີດມີຄວາມຮຸນແຮງກວ່າທຸກຄັ້ງ ແລະ ໄດ້ທະລຸອອກທາງຂ້າງຂອງໜ້າຜາຫີນ ແລະ ຟົ້ງມາຮອດບ້ານຂອງປະຊາຊົນ ເຊິ່ງໄດ້ສົ່ງຜົນກະທົບ ແລະ ສ້າງຄວາມເສຍຫາຍດັ່ງກ່າວຫຼາຍສົມຄວນ.

ທ່ານ ຄຳວອນ ແກ້ວລຸນໜູນ ຍັງໃຫ້ຮູ້ຕື່ມວ່າ: ຕໍ່ກັບບັນຫາດັງກ່າວ, ເຈົ້າໜ້າທີ່ໄດ້ກັກຕົວຜູ້ສ້າງຄວາມເສຍຫາຍ ແລະ ດຳເນີນການສືບສວນ-ສອບສວນ ຕາມກົດໝາຍ. ພ້ອມທັງເລັ່ງເກັບກຳຂໍ້ມູນຜົນເສຍຫາຍຕົວຈິງ ເພື່ອຊອກວິທາງແກ້ໄຂ ທັງວາງມາດຕະການໃຫ້ເຂັ້ມງວດຕື່ມ ເພື່ອບໍ່ໃຫ້ເຫດການທີ່ສ້າງຄວາມເສຍຫາຍເກີດຂຶ້ນອີກ. ສ່ວນປະຊາຊົນຜູ້ໄດ້ຮັບເຄາະຮ້າຍເສຍຊີວິດ ແລະ ບາດເຈັບ ທາງເມືອງໄດ້ມອບໃຫ້ໂຮງງານຊີມັງ ເປັນຜູ້ຮັບຜິດຊອບໃນການໃຊ້ຈ່າຍ ຈົນກວ່າຈະສຳເລັດຂະບວນຍຸຕິທຳ ຕາມລະບຽບກົດໝາຍຂອງ ສປປ.ລາວ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube