ຜູ້ນຳຮົງກົງກ່າວ ຫາກການປະທ້ວງຍັງຮຸນແຮງຈົນເກີນຄວບຄຸມ ຈຳເປັນຕ້ອງຂໍໃຫ້ກອງທັບຈີນຊ່ວຍ

ລາຍງານ 8 ຕຸລາ 2019, ທ່ານ ນາງ ແຄຣີ ແລມ ຫົວໜ້າຄະນະຜູ້ບໍລິການຮົງກົງ ຖະແຫຼງໃນມື້ນີ້ວ່າ ເຖິງແມ່ນວ່າຕົນ ແລະ ຄະນະຜູ້ບໍລິການຍັງບໍ່ມີແຜນໃຊ້ອຳນາດພິເສດ ຕາມກົດໝາຍຄຸ້ມຄອງຄວາມສະຫງົບໃນສະຖານະການສຸກເສີນ ເຊິ່ງເປັນກົດໝາຍທີ່ສ້າງຂຶ້ນໃນປີ 1922 ໃນສະໄໝທີ່ຮົງກົງຢູ່ພາຍໃຕ້ການປົກຄອງຂອງອັງກິດ ບັງຄັບໃຊ້ມາດຕະການອື່ນໃດເພີ່ມອີກ ພາຍລັງທີ່ໄດ້ອອກຄຳສັ່ງພິເສດເປັນຄັ້ງທຳອິດ ໃນຮອບ 52 ປີ ຫ້າມບໍ່ໃຫ້ໃສ່ໜ້າກາກ ແລະ ສິ່ງອຳພາງໃບໜ້າທຸກປະເພດ ໃນລະຫວ່າງການເຂົ້າຮ່ວມໂຮມຊຸມນຸມທາງການເມືອງ ຕະຫຼອດຮອດການຫ້າມບໍ່ໃຫ້ແຕ້ມສີໃສ່ໜ້າ, ແຕ່ຄຳສັ່ງດັ່ງກ່າວ ຜັດຍິ່ງເປັນການເຕີມເຊື້ອໄຟໃຫ້ສະຖານະການທະວີຄວາມຮຸນແຮງຂຶ້ນຕື່ມ ແລະ ໜຶ່ງໃນທີ່ປຶກສາຂອງທ່ານ ນາງ ສະເໜີໃຫ້ມີການຄວບຄຸມການໃຊ້ອິນເຕີເນັດ.

ທ່ານ ນາງ ແຄຣີ ແລມ ຢືນຢັນວ່າ ໃນຂະນະນີ້ທຸກໜ່ວຍງານຝ່າຍຄວາມໝັ້ນຄົງທີ່ກ່ຽວຂ້ອງ ໂດຍສະເພາະຕຳຫຼວດຮົງກົງ ຍັງສາມາດຄວບຄຸມສະຖານະການໄດ້, ເຖິງຢ່າງໃດກໍ່ຕາມ ເມື່ອໃດຫາກການປະທ້ວງຍັງມີທິດທາງທະວີຄວາມຮຸນແຮງຕໍ່ເນື່ອງ ຈົນສົ່ງຜົນໃຫ້ສະຖານະເກີນກວ່າທີ່ຄະນະຜູ້ບໍລິການຮົງກົງ ແລະ ຕຳຫຼວດຮົງກົງຈະແກ້ໄຂເອງໄດ້ອີກຕໍ່ໄປ ແມ່ນບໍ່ມີທາງເລືອກອື່ນ ນອກເໜືອຈາກການຂໍຄວາມຊ່ວຍເຫຼືອຈາກກອງທັບປົດປ່ອຍປະຊາຊົນຈີນ ແຕ່ກໍ່ຫວັງວ່າຮົງກົງຈະຍັງສະແຫວງຫາທາງອອກອື່ນທີ່ສັນຕິໄດ້.

ເຖິງຢ່າງໃດກໍ່ຕາມ, ທ່ານ ນາງ ແຄຣີ ແລມ ຍັງໄດ້ກ່າວຕອບໂຕ້ລັດຖະບານຫຼາຍປະເທດ ແລະ ສື່ຕາເວັນຕົກຫຼາຍແຫ່ງ ວ່າການປະທ້ວງຕໍ່ຕ້ານລັດຖະບານທີ່ແກ້ຍາວມາກວ່າ 4 ເດືອນນັ້ນ ບໍ່ແມ່ນການເຄື່ອນໄຫວຢ່າງສັນຕິ ເພື່ອຮຽກຮ້ອງປະຊາທິປະໄຕອີກຕໍ່ໄປ ແລະ ຢ້ຳວ່າຫາກກອງທັບປົດປ່ອຍປະຊາຊົນຈີນປາກົດຕົວຢ່າງເປັນທາງການຕາມຖະໜົນຫົນທາງໃນຮົງກົງ ການເຄື່ອນໄຫວນັ້ນແມ່ນເປັນໄປຕາມກົດໝາຍຂອງຮົງກົງທຸກປະການ ນັ້ນຄືຕາມມາດຕາ 14 ຂອງກົດໝາຍພື້ນຖານຮົງກົງ, ແຕ່ທ່ານ ນາງ ຍັງສະຫງວນທ່າທີໃນການກ່າວເຖິງມາດຕາ 18 ທີ່ຫຼາຍຝ່າຍຕີລາຄາວ່າ ເປັນໄມ້ຕາຍ ແລະ ອາດຈະໃຊ້ຄູ່ກັບມາດຕາ 14 ນັ້ນຄືການຮ້ອງຂໍໃຫ້ສະພາປະຊາຊົນແຫ່ງຊາດຈີນ ໃນນະຄອນຫຼວງປັກກິ່ງ ພິຈາລະນາປະກາດສະຖານະການສຸກເສີນ ຫຼືບໍ່ກໍ່ປະກາດກົດໄອຍະການເສິກ.

ການຖະແຫຼງຂອງທ່ານ ນາງ ແຄຣີ ແລມ ເກີດຂຶ້ນພາຍຫຼັງບັນຍາກາດຄວາມເຄັ່ງຕຶງ ຢູ່ຖານປະຈຳການກອງທັບປະຊາຊົນຈີນ ທາງພາກຕາເວັນອອກຂອງຝັ່ງເກົາລູນ ເມື່ອຄືນວັນອາທິດ ທີ່ຜ່ານມາ ເມື່ອເຈົ້າໜ້າທີ່ກອງທັບປະຊາຊົນຈີນໃນເຄື່ອງແບບ 5 ຄົນ ປາກົດຕົວເທິງດາດຟ້າຂອງອາຄານ ໂດຍມີທະຫານໜຶ່ງຄົນຍົກປ້າຍສີເຫຼືອງ ເຊິ່ງເປັນຄຳເຕືອນລະດັບຕ່ຳສຸດ ບອກກຸ່ມຜູ້ປະທ້ວງວ່າ ກຳລັງເຮັດຜິດກົດໝາຍ ແລະ ອາດຖືກດຳເນີນຄະດີ, ຈາກການໃຊ້ແສງເລເຊີຍິງລົບກວນເຂົ້າໄປໃນອາຄານຂອງກອງທັບປະຊາຊົນຈີນ, ໃນເວລາດຽວກັນ ເຈົ້າໜ້າທີ່ອີກຄົນໜຶ່ງປະກາດເຕືອນຜ່ານໂທລະໂຄ່ງ ໂດຍເວົ້າເປັນພາສາກວາງຕຸ້ງ, ສ່ວນທະຫານທີ່ເຫຼືອໃຊ້ກ້ອງສ່ອງທາງໄກຕິດຕາມສະຖານະການ ຖືເປັນຄັ້ງທຳອິດທີ່ເຈົ້າໜ້າທີ່ຂອງກອງທັບປະຊາຊົນຈີນໃນຮົງກົງ ມີປະຕິກິລິຍາຕອບສະໜອງຕໍ່ການປະທ້ວງຄັ້ງນີ້ຢ່າງເປີດເຜີຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube