ຕວັກກີເປີດບັ້ນຮົບ ບຸກເຂົ້າໂຈມຕີກອງກຳລັງຊາວເຄິດ ຢູ່ພາກເໜືອຂອງຊີຣີ

ລາຍງານ 10 ຕຸລາ 2019, ທ່ານ ເຣເຊບ ເທຢິຍ ເອີໂດກັນ ປະທານປະເທດຕວັກກີ ຖະແຫຼງເມື່ອວັນພຸດ 9 ຕຸລາ ທີ່ຜ່ານມາ ວ່າກອງທັບຕວັກກີໄດ້ເປີດສາກປະຕິບັດການທາງທະຫານທັງທາງບົກ ແລະ ທາງອາກາດຂ້າມຊາຍແດນໄປຍັງພາກເໜືອຂອງຊີຣີຢ່າງເປັນທາງການແລ້ວ ພາຍໃຕ້ລະຫັດປະຕິບັດການ Peace Spring ເຊິ່ງເປົ້າໝາຍຄືກອງກຳລັງປ້ອງກັນຕົນເອງຊາວເຄິດ (YPG) ເຊິ່ງເປັນໜຶ່ງໃນພັນທະມິດຂອງກອງກຳລັງປະຊາທິປະໄຕຊີຣີ (SDF) ທີ່ຍັງຄົງຍຶດຄອງພື້ນທີ່ບໍລິເວນດັ່ງກ່າວ ໂດຍປະຕິບັດການທາງທະຫານຄັ້ງນີ້ ເກີດຂຶ້ນພຽງບໍ່ພໍເທົ່າໃດວັນ ພາຍຫຼັງທີ່ຜູ້ນຳຕວັກກີສົນທະນາທາງໂທລະສັບກັບທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ແລະ ຕໍ່ມາຜູ້ນຳ ສ.ອາເມຣິກາ ປະກາດຖອນກຳລັງ ແລະ ອາວຸດດຂອງກອງທັບ ສ.ອາເມຣິກາ ອອກຈາກຊາຍແດນທາງເໜືອຂອງຊີຣີ ທີ່ລັດຖະບານຕວັກກີຖືວ່າເປັນການເປີດໄຟຂຽວໃຫ້.

ຂະນະດຽວກັນ, ຕວັກກີຕ້ອງການໃຫ້ YPG ຖອນອອກໄປຈາກຊາຍແດນທາງເໜືອຂອງຊີຣີໃຫ້ຫຼາຍທີ່ສຸດ ເນື່ອງຈາກລັດຖະບານຕວັກກີ ຖືວ່າ YPG ເປັນພວກດຽວກັນກັບກອງກຳລັງພັກແຮງງານເຄິດດິສະຖານ (PKK) ທີ່ສູ້ຮົບກັບກອງທັບຕວັກກີຫຼາຍຍາວນານກວ່າ 30 ປີ ເພື່ອແບ່ງແຍກດິນແດນທາງໃຕ້ຂອງປະເທດ ແລະ ໃນໄລຍະຍາວເພື່ອເປັນການເປີດທາງສົ່ງກັບຜູ້ລີ້ໄພຊາວຊີຣີຫຼາຍກວ່າ 3.6 ລ້ານຄົນກັບພູມລຳເນົາ ໂດຍຕວັກກີເປັນປະເທດທີ່ຮັບເບິ່ງແຍງຊາວຊີຣີ ທີ່ລີ້ໄພສົງຄາມໃນປະເທດ ທີ່ແກ່ຍາວກວ່າ 8 ປີຫຼາຍທີ່ສຸດ.

ເຖິງຢ່າງໃດກໍ່ຕາມ, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວວ່າລັດຖະບານຕວັກກີ ມີສິດອັນຊອບທຳດ້ານຄວາມໝັ້ນຄົງ ໃນການປະຕິບັດການທາງທະຫານຕໍ່ກຸ່ມນັກຮົບຊາວເຄິດ ໃນພາກເໜືອຂອງຊີຣີ ແຕ່ບໍ່ໄດ້ໝາຍຄວາມວ່າລັດຖະບານ ສ.ອາເມຣິກາ ອະນຸຍາດໃຫ້ຕວັກກີຮຸກຮານຊີຣີ.

ໃນດ້ານຂອງສະມາຊິກລະດັບສູງຂອງທັງພັກຣີພັບລິກັນ ແລະ ພັກເດໂມແຄຼດ ໃນສະພາສູງ ສ.ອາເມຣິກາ ຕ່າງກໍ່ປະສານສຽງຄັດຄ້ານປະຕິບັດການທາງທະຫານຂອງຕວັກກີໃນຄັ້ງນີ້ ແລະ ເຕືອນວ່າລັດຖະບານຕວັກກີອາດປະເຊີນກັບມາດຕະການຂວໍ້າບາດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube