ຄົບຮອບ 74 ປີການທູດ ສປປ.ລາວ, ກັບສາຍພົວພັນການທູດ 143 ປະເທດ

ລາຍງານ 11 ຕຸລາ 2019, ກະຊວງການຕ່າງປະເທດເຜີຍແຜ່ບົດຄວາມຫົວຂໍ້ “ການທູດລາວ ສືບຕໍ່ໄປຮັບການຍົກລະດັບຂຶ້ນຢ່າງສະເໝີຕົ້ນສະເໝີປາຍ” ເນື່ອງໃນໂອກາດ ຄົບຮອບ 74 ປີ ວັນການທູດລາວ 12 ຕຸລາ 1945-12 ຕຸລາ 2019.

ມີເນື້ອໃນສຳຄັນບາງຕອນວ່າ: 12 ຕຸລາ 1945 ແມ່ນວັນທີ່ມີຄວາມໝາຍຄວາມສຳຄັນທາງປະຫວັດສາດຂອງຊາດລາວ ເປັນວັນແຫ່ງການປະກາດເອກະລາດຂອງຊາດລາວເຮົາຕໍ່ໂລກ ເພື່ອເຮັດໃຫ້ໂລກໄດ້ຮັບຮູ້ວ່າ ໃນແຜ່ນດິນແຫ່ງນີ້ມີປະເທດລາວ ແມ່ນຄົນລາວເປັນເຈົ້າຂອງປະເທດ ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຕົນ, ເຊິ່ງເປັນໝາກຜົນຂອງການຕໍ່ສູ້ອັນຍືດເຍື້ອຍາວນານຂອງປະຊາຊົນລາວທົ່ງທັງຊາດ ຜ່ານຫຼາຍສະໄໝຕ້ານຈັກກະພັດຮຸກຮານ. ລັດຖະບານລາວອິດສະຫຼະ ໄດ້ຮັບການສ້າງຕັ້ງຂຶ້ນ ແລະ ໄດ້ປະກາດນະໂຍບາຍ 12 ຂໍ້, ໃນນັ້ນໄດ້ປະກາດນະໂຍບາຍການຕ່າງປະເທດ ອອກຢ່າງເປັນທາງການ, ນັບຕັ້ງນັ້ນມາ ວັນທີ 12 ຕຸລາ 1945 ຈຶ່ງໄດ້ກາຍມາເປັນວັນການທູດລາວ.

ໃນທ່າມກາງທີ່ສະພາບພາກພື້ນ ແລະ ສາກົນທີ່ມີການຜັນແປໄປຢ່າງເລິກເຊິ່ງ, ສັບສົນ ແລະ ໄວານີ້ ການປະຕິບັດແນວທາງການຕ່າງປະເທດ, ການເຄື່ອນໄຫວວຽກງານການທູດທີ່ຖືກຕ້ອງ ແລະ ສອດຄ່ອງຍິ່ງມີຄວາມຈຳເປັນ ແລະ ຕ້ອງການກວ່າເວລາໃດໝົດ ເພື່ອສ້າງເງື່ອນໄຂສະພາບແວດລ້ອມພາຍນອກ ທີ່ເອື້ອອຳນວຍໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ນັບມື້ນັບເຂັ້ມແຂງ ກ້າວໄປສູ່ຄວາມສຳເລັດໃນເປົ້າໝາຍ ນຳເອົາປະເທດຊາດຫຼຸດພົ້ນອອກຈາກສະຖານະກາບຄວາມດ້ອຍພັດທະນາ ແລະ ສ້າງປະເທດໃຫ້ເປັນປະເທດທີ່ໝັ້ນຄົງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ.

ມະຕິກອງປະຊຸມໃຫຍ່ ຄັ້ງທີ X ຂອງພັກ ໄດ້ສືບຕໍ່ຢັ້ງຢືນວ່າ: ພວກເຮົາຕ້ອງສືບຕໍ່ຮັກສາມູນເຊື້ອອັນດີງາມໃນການປະຕິບັດບົດບາດໜ້າທີ່ການຕ່າງປະເທດ ພາຍໃຕ້ຄຳຂວັນ “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ພັດທະນາປະເທດຊາດ”, ໂດຍຍຶດໝັ້ນແນວທາງການຕ່າງປະເທດຂອງພັກ: ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປັນເຈົ້າການໃຂ້ການເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາາຄົມອາຊຽນ, ຕາມທິດທາງດ້ານວຽກງານການຕ່າງປະເທດ ທີ່ກອງປະຊຸມໃຫຍ່ ຄັ້ງທີ X ຂອງພັກໄດ້ວາງອອກ.

ວຽກງານການທູດລາວ ໄດ້ມີການເຄື່ອນໄຫວຢ່າງເອົາຈິງເອົາຈັງ ທັງໃນດ້ານການທູດສອງຝ່າຍ ແລະ ຫຼາຍຝ່າຍ, ເປັນເຈົ້າການໃນການປົກປ້ອງສິດ ແລະ ຍາດຜົນປະໂຫຍດອັນຊອບທຳຈາກສາກົນ ມາສູ່ປະເທດຊາດ, ເຄື່ອນໄຫວຢ່າງເປັນເຈົ້າການຢູ່ເວທີພາກພື້ນ ແລະ ສາກົນ, ໄດ້ເຂົ້າເປັນສະມາຊິກຂອງອົງການຈັດຕັ້ງສາກົນຕ່າງໆ, ປະຕິບັດພັນທະສາກົນທາງດ້ານກົດໝາຍຢ່າງຕັ້ງໜ້າ, ປະກອບສ່ວນຕາມພັນທະສາກົນ ໃນຂອບການຮ່ວມມືຂອງບັນດາອົງການຕ່າງໆໃນພາກພື້ນ ແລະ ສາກົນ, ເປັນຕົ້ນແມ່ນ ໃນເວທີອົງການສະຫະປະຊາຊາດ, ອາຊຽນ, ອາເຊັມ, ອົງການການຄ້າໂລກ, ອົງການຝຣັ່ງໂກໂຟນີ, ການເຄື່ອນໄຫວຂອງກຸ່ມ 77, ຂະບວນການບໍ່ຮ່ວມກຸ່ມ, ກຸ່ມບັນດາປະເທດດ້ອຍພັດທະນາ, ກຸ່ມບັນດາປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ ແລະ ອົງການຈັດຕັ້ງສາກົນຕ່າງໆ, ເຂົ້າຮ່ວມແກ້ໄຂບັນຫາລວມຂອງໂລກ, ໄກ່ເກ່ຍບັນຫາສຳຄັນຂອງພາກພື້ນ ແລະ ສາກົນ, ສະໜັບສະໜູນການຕໍ່ສູ້ເພື່ອສັນຕິພາບ, ຕ້ານໄພອັນຕະລາຍຂອງສົງຄາມ, ຕ້ານການຊ່ວຍເສັງກຳລັງປະກອບອາວຸດ, ຕ້ານການກໍ່ການຮ້າຍ, ການແກ້ໄຂບັນຫາສະພາບດິນຟ້າອາກາດ ແລະ ອື່ນໆ.

ໃນ 74 ປີ ທີ່ຜ່ານມາ,​ ການເຄື່ອນໄຫວວຽກງານການທູດລາວ ໄດ້ຮັບຜົນສຳເລັດອັນໃຫຍ່ຫຼວງ, ສປປ.ລາວ ມີຖານະບົດບາດສູງຂຶ້ນ, ເປັນທີ່ຮູ້ຈັກໃນວົງສາຄະນະຍາດໃນເວທີພາກພື້ນ ແລະ ສາກົນ ທີ່ມີເພື່ອນມິດສາກົນຢ່າງກວ້າງຂວາງ, ມາຮອດປັດຈຸບັນ, ສປປ.ລາວ ໄດ້ສ້າງຕັ້ງສາຍພົວພັນທາງການທູດກັບ 143 ປະເທດ, ມີສຳນັກງານຕ່າງໜ້າການທູດຢູ່ຕ່າງປະເທດ 40 ແຫ່ງ, ໃນນີ້ມີສະຖານເອກອັກຄະລັດຖະທູດ 27 ແຫ່ງ, ສຳລັກງານຜູ້ຕ່າງໜ້າຖາວອນ 3 ແຫ່ງ, ສະຖານກົງສຸນໃຫຍ່ 11 ແຫ່ງ, ກົງສຸນກິຕິມະສັກຂອງ ສປປ.ລາວ ຢ່າງຕ່າງປະເທດ 12 ແຫ່ງ, ກົງສຸນກິຕິມະສັກຂອງຕ່າງປະເທດຢູ່ ສປປ.ລາວ 18 ແຫ່ງ; ມີດ່ານສາກົນ 27 ແຫ່ງ; ໄດ້ເພີ່ມທະວີການພົວພັນກັບພັກການເມືອງຕ່າງໆໃນໂລກເກືອບ 140 ພັກ, ໄດ້ສ້າງຕັ້ງສະມາຄົມມິດຕະພາບກັບ 18 ປະເທດ, ເຊິ່ງສົມທຽບໃສ່ປີ 1975 ປະເທດເຮົາມີສາຍພົວພັນການທູດພຽງແຕ່ 44 ປະເທດເທົ່ານັ້ນ.

ນອກຈາກນີ້, ສປປ.ລາວ ກໍ່ໄດ້ມີຜົນສຳເລັດໃນວຽກງານປັກຫຼັກໝາຍຖີ່ ແລະ ບູລະນະຫຼັກໝາຍຊາຍແດນກັບ ສສ.ຫວຽດນາມ, ສປ.ຈີນ ແລະ ສສ.ມຽນມາ, ສືບຕໍ່ສຳຫຼວດປັກຫຼັກໝາຍຊາຍແດນທີ່ຍັງຄົງຄ້າງຈຳນວນໜຶ່ງກັບ ລາຊະອານາຈັກໄທ ແລະ ລາຊະອານາຈັກກຳປູເຈຍ, ພ້ອມທັງໄດ້ສືບຕໍ່ຄຸ້ມຄອງ ແລະ ແກ້ໄຂບັນຫາ ສະພາບປະກົດການຫຍໍ້ທໍ້ຕ່າງໆຢູ່ບໍລິເວນຊາຍແດນຢ່າງເປັນປົກກະຕິ.

ປັດຈຸບັນ, ສປປ.ລາວ ໄດ້ເຊັນຍັນຍາຍົກເວັ້ນວີຊາກັບ 36 ປະເທດ ສຳລັບຜູ້ຖືໜັງສືຜ່ານແດນການທູດ ແລະ ລັດຖະການ, ຍົກເວັ້ນວິຊາສອງຝ່າຍສຳລັບຜູ້ຖືໜັງສືຜ່ານແດນທຳມະດາກັບ 11 ປະເທດ (9 ປະເທດສະມາຊິກອາຊຽນ, ລັດເຊຍ ແລະ ມົງໂກລີ) ແລະ ຍົກເວັ້ນວີຊາຝ່າຍດຽວ ສຳລັບຜູ້ຖືໜັງສືຜ່ານແດນທຳມະດາໃຫ້ກັບ 4 ປະເທດ (ສ.ເກົາຫຼີ (ໃຕ້), ຍີ່ປຸ່ນ, ສະຫະພັນທະລັດສະວິດ ແລະ ຊຸກຊຳບວກ), ໄດ້ດຳເນີນການນຳໃຊ້ E-Visa ຢ່າງເປັນທາງການໃນວັນທີ 9 ກໍລະກົດ 2019 ທີ່ຜ່ານມາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube