ເຮືອນ້ຳມັນອີຣານ ຖືກໂຈມຕີທີ່ທະເລແດງ ສົ່ງຜົນໃຫ້ລາຄານ້ຳມັນຕະຫຼາດໂລກເພີ່ມສູງຂຶ້ນ

ລາຍງານ 11 ຕຸລາ 2019, ສຳນັກຂ່າວ IRNA ຂອງທາງການອີຣານ ລາຍງາຍໂດຍອ້າງການເປີດເຜີຍຂອງຜູ້ບໍລິຫານບໍລິສັດ National Iranian Tanker Company (NITC) ເຈົ້າຂອງເຮືອບັນທຸກນ້ຳມັນ SABITI ວ່າເຮືອຖືກຍິງດ້ວຍວັດຖຸລະເບີດ ເຊິ່ງຕ້ອງສົງໄສເປັນຂີປະນາວຸດ 2 ລູກ ຖືກບໍລິເວນລຳເຮືອ ເມື່ອຕອນສວາຍຂອງວັນສຸກ 11 ຕຸລານີ້ ຂະນະທີ່ເຮືອແລ່ນຢູ່ໃນທະເລແດງ ຫ່າງຈາກຝັ່ງເມືອງເຈດດາ ຂອງອາຣັບບີ ຊາອູດິດ ປະມານ 130 ກິໂລແມັດ.

ທາງດ້ານຖະແຫຼງການຂອງທ່ານ ອັບບາສ ມູຊາວີ ໂຄສົກກະຊວງການຕ່າງປະເທດອີຣານ ຢືນຢັນວ່າເຮືອບັນທຸກນ້ຳມັນ SATIBI ຂອງອີຣານ ຖືກໂຈມຕີໃນນ່ານນ້ຳທະເລແດງ ແລະ ເຮືອໄດ້ຮັບຄວາມເສຍຫາຍ, ທ່ານ ມູຊາວີ ກ່າວອີກວ່າ ຜູ້ທີ່ຢູ່ເບື້ອງຫຼັງການສ່ຽງໄພອັນຕະລາຍນີ້ ຈະຕ້ອງຮັບຜິດຊອບຕໍ່ໝາກຜົນທີ່ເກີດຂຶ້ນ ລວມທັງມົນລະພິດອັນຕະລາຍຕໍ່ສິ່ງແວດລ້ອມ ຈາກການຮົ່ວໄຫຼຂອງນ້ຳມັນລົງສູ່ທະເລ.

ເຫດການໂຈມຕີດັ່ງກ່າວ ໄດ້ສົ່ງຜົນໃຫ້ລາຄານ້ຳມັນໃນຕະຫຼາດໂລກ ປັບຕົວສູງຂຶ້ນ 1.6% ຢູ່ທີ່ 60.05 ໂດລາສະຫະລັດຕໍ່ຖັງ ແລະ ຍັງເຮັດໃຫ້ຄວາມເຄັ່ງຕຶງລະຫວ່າງອີຣານ ກັບ ສ.ອາເມຣິກາ ເພີ່ມທະວີສູງຂຶ້ນ ພາຍຫຼັງເກີດເຫດການໂຈມຕີຫຼາຍຄັ້ງໃນພູມມິພາກອ່າວເປີເຊຍ ລວມທັງການໂຈມຕີເຮືອບັນທຸກນ້ຳມັນໃນຊ່ອງແຄບຮໍມຸສ ທີ່ຍັງບໍ່ຮູ້ຜູ້ລົງມືກໍ່ເຫດ ແລະ ອີຣານຍິງໂດຣນສອດແນມຂອງກອງທັບ ສ.ອາເມຣິກາຕົກ ແລະ ຫຼ້າສຸດກ່ອນໜ້ານີ້ ໄດ້ມີການໂຈມຕີໂຮງກັ່ນນ້ຳມັນ ແລະ ບໍ່ນ້ຳມັນຂອງອາຣັບບີ ຊາອູດິດ ທາງພາກຕາເວັນອອກ ດ້ວຍໂດຣນຕິດລະເບີດ ແລະ ຂີປະນາວຸດນຳວິຖີ ເຊິ່ງ ສ.ອາເມຣິກາ ແລະ ພັນທະມິດ ລວມທັງອາຣັບບີ ຊາອູດິດລະບຸວ່າເປັນການກະທຳຂອງອີຣານ ເຖິງແມ່ນວ່າອີຣານຈະປະຕິເສດກ ແລະ ກຸ່ມກະບົດຮູຕີໃນເຢເມນ ທີ່ອີຣານໃຫ້ການສະໜັບສະໜູນຈະອອກມາປະກາດວ່າເປັນຜູ້ລົງມືກໍ່ເຫດກໍ່ຕາມ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube