ນາຍົກລັດຖະມົນຕີເອທິໂອປີ ໄດ້ຮັບລາງວັນໂນເບວ ສາຂາສັນຕິພາບ, ຈາກການປ່ຽນສັດຕູໃຫ້ເປັນມິດ

ລາຍງານ 12 ຕຸລາ 2019, ທ່ານ ນາງ ເບຣິດ ໄຣສ-ແອນເດີເຊນ ປະທານຄະນະກຳມະການໂນເບວນອກແວ ປະກາດຜູ້ໄດ້ຮັບລາງວັນໂນເບວ ສາຂາສັນຕິພາບ ປະຈຳປີ 2019 ເມື່ອວັນສຸກ 11 ຕຸລາ ທີ່ຜ່ານມາ ໄດ້ແກ່ທ່ານ ອາບີ ອາເໝັດ ອາລີ ນາຍົກລັດຖະມົນຕີເອທິໂອປີ ຈາກຄວາມພະຍາຍາມໃນການສ້າງສັນຕິພາບ ແລະ ສ້າງສາຍພົວພົວການຮ່ວມມືລະຫວ່າງປະເທດ ໂດຍສະເພາະຢ່າງຍິ່ງການຟື້ນຟູສາຍພົວພັນ ແລະ ການແກ້ໄຂຂໍ້ຂັດແຍ່ງເລື່ອງຊາຍແດນກັບເອຣິເຕຣຍ.

ໂດຍພຽງ 6 ເດືອນພາຍຫຼັງຊະນະການເລືອກຕັ້ງ ແລະ ຂຶ້ນສູ່ຕຳແໜ່ງຜູ້ນຳເອທິໂອປີ ເມື່ອເດືອນເມສາ ປີທີ່ຜ່ານມາ ໜຶ່ງໃນວາລະສຳຄັນ ທີ່ລັດຖະບານພາຍໃຕ້ການນຳຂອງທ່ານ ອາບີ ອາເໝັດ ອາລີ ໄດ້ມຸ່ງໝັ້ນແກ້ໄຂເປັນອັນດັບທຳອິດ ຄືການຟື້ນຟູສັນຕິພາບກັບເອຣິເຕຣຍ ປະເທດເພື່ອນບ້ານ ທີ່ແບ່ງແຍກດິນແດນອອກຈາກເອທິໂອປີ ເມື່ອປີ 1993 ເຊິ່ງເປັນຜົນມາຈາກສົງຄາມກາງເມືອງ ທີ່ຍືດເຍື້ອຍາວນານເຖິງ 30 ປີ, ແຕ່ຫຼັງຈາກທີ່ເອຣິເຕຣຍສະຖາປະນາປະເທດໄດ້ພຽງ 5 ປີ ຄືໃນປີ 1998 ການສູ້ຮົບຕາມແນວຊາຍແດນກັບເອທິໂອປີກໍ່ໄດ້ເລີ່ມຕົ້ນຂຶ້ນ ເຮັດໃຫ້ມີປະຊາຊົນຫຼາຍກວ່າ 80,000 ຄົນເສຍຊີວິດ,​ ກ່ອນທີ່ຈະມີການຜ່ອນຄາຍຄວາມຮຸນແຮງ ແລະ ສົງຄາມຍຸຕິເມື່ອປີ 2000 ດ້ວຍຂໍ້ຕົກລົງສັນຕິພາບອານເຊ ເຊິ່ງຜູ້ແທນຂອງທັງສອງປະເທດລົງນາມຮ່ວມກັນ ທີ່ນະຄອນຫຼວງອານເຊ ປະເທດອານເຊຣີ ໂດຍມີສະຫະປະຊາຊາດ (UN) ແລະ ລັດຖະບານອານເຊຣີເປັນຜູ້ນຳໃນການໄກ່ເກ່ຍ, ເຖິງຢ່າງໃດກໍ່ຕາມເອທິໂອປີຍັງຄົງປະຕິເສດທີ່ຈະຍອມຮັບຄຳຕັດສິນຂອງສານໂລກ ແລະ ຍຶດຄອງພື້ນທີ່ທີ່ມີຄວາມຂັດແຍ່ງບາງສ່ວນກັບເອຣິເຕຣຍ.

ເຖິງຢ່າງໃດກໍ່ຕາມ, ທ່ານ ອາບີ ອາເໝັດ ອາລີ ໄດ້ກ່າວເມື່ອກາງປີທີ່ຜ່ານມາ ວ່າລັດຖະບານພາຍໃຕ້ການນຳຂອງຕົນ ຍອມຮັບຄຳຕັດສິນຂອງສານໂລກ ໂດຍຖອນທະຫານອອກຈາກພື້ນທີ່ຄວາມຂັດແຍ່ງກັບເອຣິເຕຣຍ ແລະ ເອທິໂອປີ ແອລາຍ ເຊິ່ງເປັນສາຍການບິນແຫ່ງຊາດຂອງເອທິໂອປີ ກັບມາເປີດເສັ້ນທາງການບິນສູ່ເອຣິເຕຣຍອີກຄັ້ງ ຫຼັງຈາກທີ່ໄດ້ລະງັບໄປກວ່າ 20 ປີ, ຕໍ່ດ້ວຍການເດີນທາງໄປມາຫາສູ່ລະຫວ່າງການນຳລະດັບສູງຂອງທັງສອງປະເທດ ເພື່ອຟື້ນຟູສາຍພົວພັນສອງຝ່າຍ.

ເຊິ່ງຜູ້ນຳເອທິໂອປີ ຈະໄດ້ຮັບໃບປະກາດກຽດຕິຄຸນ, ຫຼຽນລາງວັນໂນເບວ ແລະ ແຊັກເງິນສົດ 9 ລ້ານໂຄຣນາຊູແອດ (ປະມານ 920,000 ໂດລາສະຫະລັດ), ໂດຍພິທີມອບລາງວັນປີນີ້ ຖືເປັນຄັ້ງທີ 100 ຈະໄດ້ຈັດຂຶ້ນພາຍໃນຫໍປະຊຸມ ຫ້ອງວ່າການນະຄອນຫຼວງອອສໂລ ປະເທດນອກແວ ໃນວັນທີ 10 ທັນວານີ້ ເຊິ່ງເປັນວັນຄ້າຍວັນເຖິງແກ່ກຳຂອງທ່ານ ອັນເຟຣດ ໂນເບວ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube