ອິດທິພົນພາຍຸໄຕ້ຝຸ່ນຮາກິບິສ ເຮັດໃຫ້ຄົນຍີ່ປຸ່ນເສຍຊີວິດແລ້ວກວ່າ 10 ຄົນ ແລະ ສູນຫາຍຈຳນວນຫຼາຍ

ລາຍງານ 13 ຕຸລາ 2019, ອີງຕາມການລາຍງານຂອງສະຖານີໂທລະພາບ NHK ລະບຸວ່າຈຳນວນຜູ້ເສຍຊີວິດຈາກອິດທິພົນຄວາມຮຸນແຮງຂອງພາຍຸໄຕ້ຝຸ່ນຮາກິບິສ ເຊິ່ງເປັນພາສາຕາກາລັອກໝາຍຄວາມວ່າ “ຄວາມໄວ” ເພີ່ມຂຶ້ນເປັນຢ່າງໜ້ອຍ 11 ຄົນ ໄດ້ຮັບບາດເຈັບປະມານ 100 ຄົນ ແລະ ຍັງສູນຫາຍອີກຫຼາຍສິບຄົນ ເນື່ອງຈາກສ່ວນຕາຂອງພາຍຸໄດ້ຂຶ້ນຝັ່ງຢູ່ບໍລິເວນແຫຼມອິຊຸ ເກາະຮອນຊູ ເມື່ອຕອນຄ່ຳຂອງວັນເສົາທີ່ຜ່ານມາ ຕາມເວລາທ້ອງຖິ່ນ ດ້ວຍຄວາມໄວລົມສູງສຸດໃກ້ຈຸດສູນກາງ 216 ກິໂລແມັດຕໍ່ຊົ່ວໂມງ ແລະ ຖືເປັນພາຍຸໝຸນທີ່ມີຄວາມໄວລົມຮຸນແຮງທີ່ສຸດທີ່ນະຄອນຫຼວໂຕກຽວໄດ້ຮັບຜົນກະທົບໂດຍກົງ ນັບຕັ້ງແຕ່ພາຍຸໄຕ້ຝຸ່ນອິດະ ເມື່ອປີ 1958 ທີ່ເຮັດໃຫ້ມີຜູ້ເສຍຊີວິດຫຼາຍກວ່າ 1,200 ຄົນ.

ຂະນະທີ່ສຳນັກງານອຸຕຸນິຍົມວິທະຍາແຫ່ງຊາດຍີ່ປຸ່ນ (JMA) ຍັງຄົງຮັກສາລະດັບການເຕືອນໄພສີແດງ ເຊິ່ງເປັນຂັ້ນສູງສຸດໃນບາງພື້ນທີ່ ໃຫ້ປະຊາຊົນກຽມພ້ອມຮັບມືກັບມວນນ້ຳ ທີ່ຈະຖ້ວມຢ່າງກະທັນຫັນ ແລະ ດິນເຈື່ອນ ໂດຍສະເພາະໃນເຂດນອກເມືອງ ເຖິງແມ່ນວ່າພາຍຸຈະອ່ອນກຳລັງລົງຫຼາຍເມື່ອເຂົ້າສູ່ແຜ່ນດິນ ແຕ່ຍັງສົ່ງອິດທິພົນໃຫ້ເກີດຝົນຕົກໜັກ.

ໃນດ້ານກອງກຳລັງປ້ອງກັນຕົນເອງຍີ່ປຸ່ນ (ກອງທັບຍີ່ປຸ່ນ: SDF) ໄດ້ກະຈາຍກຳລັງເຈົ້າໜ້າທີ່ເກືອບ 20,000 ຄົນ ລົງພື້ນທີ່ຊ່ວຍເຫຼືອຜູ້ປະສົບໄພ ທັງການອົບພະຍົບ ແລະ ການທຳຄວາມສະອາດບ້ານເຮືອນປະຊາຊົນ, ສ່ວນບໍລິການຂົນສົ່ງສາທາລະນະບໍ່ວ່າຈະເປັນລົດປະຈຳທາງ, ລົດໄຟຫົວລູກປືນຊິນກັນເຊັນ ແລະ ຖ້ຽວບິນ ຍັງຄົງໃຫ້ບໍລິການໄດ້ຢ່າງຈຳກັດ ແລະ ເຈົ້າໜ້າທີ່ປະເມີນສະຖານະການຕະຫຼອດເວລາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube