ຜູ້ນຳຈີນກ່າວ ໃຜທີ່ຈະແບ່ງແຍກດິນແດນ ຕ້ອງພົບກັບຈຸດຈົບ ດ້ວຍການຖືກບີບບົດຈົນຮາບກ້ຽງ

ລາຍງານ 14 ຕຸລາ 2019, ທ່ານ ສີ ຈິ້ນຜິງ ປະທານປະເທດຈີນ ກ່າວລະຫວ່າງພິທີງານລ້ຽງອາຫານຄ່ຳ ທີ່ຈັດໂດຍລັດຖະບານເນປານ ເພື່ອຕ້ອນຮັບເນື່ອງໃນໂອກາດເດີນທາງຢ້ຽມຢາມເນປານຢ່າງເປັນທາງການ ທີ່ນະຄອນຫຼວງກາດມານດຸ ເມື່ອວັນອາທິດ 13 ຕຸລາ ທີ່ຜ່ານມາ ມີເນື້ອໃນສຳຄັນຕອນໜຶ່ງວ່າ ບຸກຄົນໃດກໍ່ຕາມທີ່ພະຍາຍາມແບ່ງແຍກດິນແດນສ່ວນໃດສ່ວນໜຶ່ງອອກຈາກ ສປ.ຈີນ ຈະຕ້ອງພົບກັບຈຸດຈົບ ດ້ວຍການຖືກບີບບົດຈົນຮາບກ້ຽງ, ສ່ວນກອງກຳລັງພາຍນອກ ທີ່ເປັນທໍ່ນ້ຳລ້ຽງຢູ່ເບື້ອງຫຼັງນັ້ນ ລັດຖະບານຈີນຂໍປະກາດວ່າ ການສະໜັບສະໜູນແບ່ງແຍກດິນແດນສ່ວນໃດກໍ່ຕາມຂອງ ສປ.ຈີນ ເປັນໄດ້ແຕ່ພຽງຄວາມຝັນລົມໆແລ້ງໆ.

ເຊິ່ງຜູ້ນຳຈີນບໍ່ໄດ້ກ່າວເຖິງລັດຖະບານປະເທດໃດ ແລະ ກຸ່ມບຸກຄົນໃດໂດຍກົງ ແຕ່ຫຼາຍຝ່າຍເຊື່ອວ່າອັນດັບທຳອິດ ທ່ານ ສີ ຈິ້ນຜິງ ຕ້ອງການສື່ເຖິງກຸ່ມນັກເຄື່ອນໄຫວຊາວຕີເບດ ທີ່ລີ້ໄພໃນເນປານເປັນຈຳນວນຫຼາຍ ແລະ ມີລາຍງານວ່າລັດຖະບານເນປານ ໄດ້ຈັບກຸ່ມຜູ້ປະທ້ວງຊາວຕີເບດຈຳນວນຫຼາຍ ກ່ອນທີ່ຜູ້ນຳຈີນ ແລະ ຄະນະຈະເດີນທາງມາເຖິງ, ແຕ່ໃນເວລາດຽວກັນ ຄວາມໝາຍທີ່ແຝງຢູ່ໃນຄຳເວົ້າຂອງຜູ້ນຳຈີນ ກໍ່ຄວບຄຸມໄປເຖິງສາຍພົວພັນຂ້າມຊ່ອງແຄບກັບໄຕ້ຫວັນ ແລະ ສະຖານະການຄວາມບໍ່ສະຫງົບທາງການເມືອງ ແລະ ສັງຄົມໃນຮົງກົງ ທີ່ແກ່ຍາວມາກວ່າ 4 ເດືອນແລ້ວ, ພ້ອມທັງເປັນການຢ້ຳວ່າ ຈີນບໍ່ມີທາງເປັນຝ່າຍຍອມອ່ອນຂໍ້ໃຫ້ກັບໃຜໃນກໍລະນີຄວາມຂັດແຍ່ງເລື່ອງດິນແດນ ບໍ່ວ່າໃນຮູບແບບໃດກໍ່ຕາມ.

ເຊິ່ງການກ່າວຂອງຜູ້ນຳຈີນ ເກີດຂຶ້ນໃນວັນກັນກັບທີ່ສະຖານະການການປະທ້ວງໃນຮົງກົງ ກ້າວເຂົ້າສູ່ອາທິດທີ 18 ແລະ ກຸ່ມຜູ້ປະທ້ວງຫົວຮຸນແຮງຍັງຄົງເລາະທຳລາຍຊັບສິນສາທາລະນະ ໂດຍສະເພາະສະຖານີລົດໄຟໃຕ້ດິນທີ່ເປັນເປົ້າໝາຍຫຼັກ ແລະ ທຸລະກິດທີ່ກ່ຽວຂ້ອງກັບ ສປ.ຈີນ ລວມເຖິງສາຂາຫຼາຍແຫ່ງຂອງທະນາຄານແຫ່ງ ສປ.ຈີນ ແລະ ຮ້ານຈຳໜ່າຍສິນຄ້າຂອງຫົວເຫວີ່ຍ ທີ່ຖືກທຸບ ແລະ ຈູດເຜົາທຳລາຍ.

ຂະນະທີ່ຕຳຫຼວດປາບຈະລາຈົນທັງໃນ ແລະ ນອກເຄື່ອງແບບໄດ້ກະຈາຍກຳລັງລົງພື້ນທີ່ ເພື່ອຄວບຄຸມສະຖານະການ ໂດຍມີການຍິງແກັດນ້ຳຕາ ແລະ ຈັບກຸມຜູ້ກໍ່ຄວາມຮຸນແຮງໄດ້ຫຼາຍສິບຄົນ, ເຖິງຢ່າງໃດກໍ່ຕາມ ໄດ້ເກີດເຫດເຈົ້າໜ້າທີ່ຄົນໜຶ່ຶງຖືກລອບແທງຄໍທາງດ້ານຫຼັງ ໃນລະຫວ່າງຄວບຄຸມສະຖານະການຄວາມບໍ່ສະຫງົບຢູ່ສະຖານີລົດໄຟໃຕ້ດິນກວນຕົງ ເຊິ່ງໜ່ວຍກູ້ໄພກໍ່ໄດ້ເລັ່ງນຳຕົວສົ່ງໂຮງໝໍໃກ້ຄຽງທີ່ສຸດ ແລະ ຜູ້ຕ້ອງສົງໄສກໍ່ເຫດ 2 ຄົນ ຖືກຈັບກຸມໄດ້ຢ່າງທັນທ່ວງທີ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube