UN ປະສົບບັນຫາການເງິນຝືດເຄືອງ ອາດບໍ່ສາມາດຈ່າຍເງິນເດືອນ 11/2019 ໃຫ້ເຈົ້າໜ້າທີ່

ລາຍງານ 14 ຕຸລາ 2019, ທ່ານ ອັນໂຕນິໂອ ກູເຕເຣສ ເລຂາທິການໃຫຍ່ສະຫະປະຊາຊາດ (UN) ໄດ້ສົ່ງໜັງສືວຽນ ທີ່ລົງນາມເມື່ອວັນທີ 11 ຕຸລາ ທີ່ຜ່ານມາ ເຖິງຜູ້ອຳນວຍການ ແລະ ຫົວໜ້າພາກສ່ວນຕ່າງໆທັງໝົດພາຍໃຕ້ສັງກັດຂອງ UN ມີຫົວຂໍ້ວ່າ “ມາດຕະການສຸກເສີນ ທີ່ຈະສົ່ງຜົນຕໍ່ສະພາບການປະຕິບັດງານຂອງເຈົ້າໜ້າທີ່ ແລະ ຄວາມຕໍ່ເນື່ອງຂອງການປະຕິບັດງານທັງໝົດ” ແລະ ລະບຸອີກວ່າ ມາດຕະການເຫຼົ່ານີ້ມີຜົນບັງຄັບໃຊ້ ຈົນກວ່າຈະມີແຈ້ງການໃໝ່ ພ້ອມທັງມີຄຳຊີ້ແຈ້ງຈາກທ່ານ ແຄດເທີຣີນ ພໍລາດ ຜູ້ອຳນວຍການຝ່າຍບໍລິຫານຈັດການງົບປະມານຂອງ UN ອີກວ່າ ນັບຕັ້ງແຕ່ຕົ້ນປີນີ້ຈົນເຖິງວັນທີ 4 ຕຸລາ ມີສະມາຊິກ UN 128 ປະເທດຈ່າຍເງິນຄ່າທຳນຽມປະຈຳປີງົບປະມານປັດຈຸບັນ ລວມກັນ 1,990 ລ້ານໂດລາສະຫະລັດ ໝາຍຄວາມວ່າເຫຼືອອີກ 65 ປະເທດທີ່ຍັງບໍ່ໄດ້ຊຳລະຄ່າທຳນຽມດັ່ງກ່າວ ທີ່ເປັນມູນຄ່າລວມກັນ 1,386 ລ້ານໂດລາສະຫະລັດ ໜຶ່ງໃນນັ້ນຄື ສະຫະລັດ ອາເມຣິກາ ທີ່ຕ້ອງຈ່າຍຫຼາຍເຖິງ 1,000 ລ້ານໂດລາສະຫະລັດ.

Photo: UN

ຂະນະທີ່ມີລາຍງານວ່າ ມາດຕະການປະຢັດ ຕາມຄຳສັ່ງຂອງເລຂາທິການ UN ແມ່ນລວມເຖິງການຍົກເລີກກອງປະຊຸມຫຼາຍລາຍການ ທັງຢູ່ສຳນັກງານໃຫຍ່ ໃນນະຄອນນິວຢອກ ແລະ ຕ່າງປະເທດ, ການຈຳກັດຈຳນວນ ແລະ ງົບປະມານໃນການເດີນທາງໄປປະຕິບັດພາລະກິດຢູ່ຕ່າງປະເທດຂອງເຈົ້າໜ້າທີ່ທຸກລະດັບ ໄປຈົນເຖິງຂະບວນການດ້ານເອກະສານທີ່ອາດຊັກຊ້າກວ່າກຳນົດ ແລະ ການປະຢັດພະລັງງານ ໂດຍສະເພາະການໃຊ້ເຄື່ອງປັບອາກາດທັງຮ້ອນ ແລະ ເຢັນ, ລິບ ແລະ ຂັນໄດເລື່ອນ ຕະຫຼອດຮອດການປິດນ້ຳພຸ ຢູ່ໜ້າສຳນັກງານໃຫຍ່.

ໃນດ້ານລັດຖະບານ ສ.ອາເມຣິກາ ເຊິ່ງເປັນປະເທດຜູ້ບໍລິຈາກລາຍໃຫຍ່ທີ່ສຸດຂອງ UN ຍັງບໍ່ສະແດງທ່າທີ ຕໍ່ວິກິດດ້ານການເງິນຂອງ UN ທີ່ເລຂາທິການໃຫຍ່ຖະແຫຼງເມື່ອອາທິດທີ່ຜ່ານມາ ວ່າຫາກສະຖານະການດ້ານງົບປະມານຂອງ UN ຍັງຝືດເຄືອງແບບນີ້ຕໍ່ໄປ ອາດບໍ່ສາມາດຈ່າຍຄ່າຕອບແທນ ປະຈຳເດືອນພະຈິກ ໃຫ້ກັບເຈົ້າໜ້າທີ່ໄດ້ເຊັ່ນ: ຄ່າຕອບແທນສຳລັບທະຫານຮັກສາສັນຕິພາບ ທີ່ຕົກເດືອນລະ 1,428 ໂດລາສະຫະລັດຕໍ່ຄົນ, ທັງນີ້ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວຕັ້ງແຕ່ໄລຍະເລີ່ມຮັບຕຳແໜ່ງເມື່ອທ້າຍເດືອນມັງກອນ 2017 ວ່າເປັນສິ່ງທີ່ບໍ່ຍຸຕິທຳຢ່າງຍິ່ງ ທີ່ລັດຖະບານ ສ.ອາເມຣິກາ ຕ້ອງເປັນຜູ້ຮັບຜິດຊອບຄ່າໃຊ້ຈ່າຍຂອງ UN ຫຼາຍທີ່ສຸດປະເທດດຽວເປັນເວລາຫຼາຍທົດສະວັດ ອັນສະທ້ອນວ່າ UN ຕ້ອງປະຕິຮູບເພື່ອໃຫ້ສະມາຊິກທຸກປະເທດແບກຮັບ ຫຼື ແບ່ງເບົາຄ່າໃຊ້ຈ່າຍຢ່າງເທົ່າທຽມກັນ.

  • ແທັກ
  • UN

ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube