ລມຕ.ຍຸດຕິທຳເກົາຫຼີໃຕ້ລາອອກ ເພາະຖືກກົດດັນທີ່ໃຊ້ເສັ້ນສາຍໃຫ້ລູກສາວມີສິດເໜືອຄົນອື່ນ

ລາຍງານ 14 ຕຸລາ 2019, ທ່ານ ໂຊ ກຸກ ລັດຖະມົນຕີກະຊວງຍຸຕິທຳເກົາຫຼີໃຕ້ ຖະແຫຼງລາອອກຈາກຕຳແໜ່ງ ໂດຍກ່າວວ່າ ພາລະກິດປະຕິຮູບຂະບວນການຍຸຕິທຳຕາມແນວທາງຂອງຕົນບັນລຸເປົ້າໝາຍແລ້ວ ຈຶ່ງບໍ່ມີຄວາມຈຳເປັນທີ່ຈະຕ້ອງປະຕິບັດໜ້າທີ່ໃນຕຳແໜ່ງດັ່ງກ່າວອີກຕໍ່ໄປ.

ເຖິງຢ່າງໃດກໍ່ຕາມ, ທ່ານ ໂຊ ກຸກ ນັກວິຊາການດ້ານນິຕິສາດ ອາຍຸ 54 ປີ ເຊິ່ງປະຕິບັດງານໃຫ້ກັບລັດຖະບານພາຍໃຕ້ການນຳຂອງທ່ານປະທານປະເທດ ມູນ ແຈ-ອິນ ມາກວ່າ 2 ປີ ກ່ອນໄດ້ຮັບແຕ່ງຕັ້ງໃຫ້ເປັນລັດຖະມົນຕີກະຊວງຍຸຕິທຳເມື່ອຕົ້ນເດືອນກັນຍາ ທີ່ຜ່ານມາ ກ່າວວ່າຕົນຂໍໃຊ້ໂອກາດນີ້ ຂໍໂທດປະຊາຊົນເກົາຫຼີໃຕ້ທຸກພາກສ່ວນ ຕໍ່ກໍລະນີທາງສັງຄົມກ່ຽວກັບຕົນ ແລະ ສະມາຊິກໃນຄອບຄົວ ແລະ ຕໍ່ຈາກນີ້ຈະທຸ້ມເທເວລາທັງໝົດໃຫ້ກັບທຸກຄົນໃນຄອບຄົວໃຫ້ຫຼາຍຂຶ້ນ ທີ່ກຳລັງປະເຊີນກັບຊ່ວງເວລາແຮງການຖືກກົດດັນ ແລະ ຍາກລຳບາກທີ່ສຸດຄັ້ງໜຶຶ່ງໃນຊີວິດ, ໃນດ້ານຂອງຜູ້ນຳເກົາຫຼີໃຕ້ກ່າວໃນເວລາຕໍ່ມາ ວ່າຕົນໄດ້ລົງນາມຮັບຮອງໜັງສືລາອອກຂອງທ່ານ ໂຊ ກຸກແລ້ວ ແລະ ເສຍໃຈເປັນຢ່າງຍິ່ງທີ່ບັນຫານີ້ໄດ້ສ້າງຄວາມແຕກແຍກຢ່າງໜັກໃຫ້ກັບຫຼາຍຝ່າຍ.

ເຊິ່ງກໍລະນີຂອງທ່ານ ໂຊ ກຸກ ເປັນໜຶ່ງໃນປະເດັນຮ້ອນຂອງສັງຄົມເກົາຫຼີໃຕ້ ນັບຕັ້ງແຕ່ທ່ານມູນ ແຈ-ອິນ ສະເໜີຊື່ໃຫ້ດຳລົງຕຳແໜ່ງລັດຖະມົນຕີກະຊວງຍຸຕິທຳເມື່ອເດືອນສິງຫາ ທີ່ຜ່ານມາ ແລະ ລົງນາມຮັບຮອງເຖິງແມ່ນວ່າຫຼາຍຝ່າຍຄັດຄ້ານ ຈົນເປັນເຫດເຮັດໃຫ້ຄະແນນນິຍົມຂອງຜູ້ນຳເກົາຫຼີໃຕ້ຕົກຕ່ຳທີ່ສຸດໃນປະຫວັດສາດ, ມີການແຖຫົວປະທ້ວງຂອງນັກການເມືອງຝ່າຍຄ້ານຫຼາຍຄົນ ແລະ ປະຊາຊົນຈຳນວນຫຼາຍໄດ້ໂຮມຊຸມນຸມຂັບໄລ່ທ່ານ ໂຊ ກຸກ ຢ່າງຕໍ່ເນື່ອງຈາກບັນຫາທີ່ທ່ານ ໂຊ ກຸກ ໃຊ້ເສັ້ນສາຍຊ່ວຍໃຫ້ລູກສາວໄດ້ເຂົ້າຮຽນໃນມະຫາວິທະຍາໄລຊັ້ນນຳຂອງປະເທດ ແລະ ການຫຼົບລ້ຽງພາສີ, ຂະນະທີ່ຜົນງານວິທະຍານິພົນ ແລະ ການວິໄຈຫຼາຍເລື່ອງຂອງທ່ານ ໂຊ ກຸກ ແລະ ພັນລະຍາ ມີການຂຸດຄຸ້ຍ ແລະ ເປີດໂປງອອກມາວິເຄາະກັນຢ່າງຕໍ່ເນື່ອງວ່າ ເປັນການຄັດລອກຜົນງານຂອງນັກວິຊາການຄົນອື່ນຫຼືບໍ່, ເຊິ່ງພັນລະຍາຂອງທ່ານ ໂຊ ກຸກ ມີກຳນົດເຂົ້າພົບພະນັກງານສືບສວນສອບສວນອີກຄັ້ງ ໃນວັນສຸກ 18 ຕຸລານີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube