ສ.ອາເມຣິກາ ຈະລະງັບສິດທິພິເສດທາງການຄ້າ ຕໍ່ສິນຄ້າບາງລາຍການທີ່ນຳເຂົ້າຈາກໄທ

ລາຍງານ 26 ຕຸລາ 2019, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ລົງນາມປະກາດ ເມື່ອວັນສຸກ 25 ຕຸລາ ທີ່ຜ່ານມາ ຟື້ນຟູສິດທິພິເສດທາງການຄ້າ (GSP) ທີ່ບັງຄັບໃຊ້ແບບສະເພາະເຈາະຈົງມາຫຼາຍປີກັບສິນຄ້າຂອງອູແກຣນ ເນື່ອງຈາກລັດຖະບານອູແກຣນ ມີພັດທະນາການທີ່ດີຂຶ້ນໃນດ້ານການປົກປ້ອງສິດທິແຮງງານໃຫ້ຢູ່ໃນມາດຕະຖານລະດັບສາກົນ, ເຊິ່ງຂໍ້ມູນສຳນັກງານຜູ້ແທນການຄ້າຂອງລັດຖະບານ ສ.ອາເມຣິກາ (USTR) ລະບຸວ່າຖືເປັນການຄືນຜົນປະໂຫຍດມູນຄ່າ 36 ລ້ານໂດລາສະຫະລັດ ໃຫ້ອູແກຣນ ຫຼື 1 ໃນ 3 ຂອງລາຍໄດ້ທີ່ສູນເສຍໄປຈາການຖືກລະງັບ GSP ຕະຫຼອດໄລຍະທີ່ຜ່ານມາຂອງອູແກຣນ.

ເຖິງຢ່າງໃດກໍ່ຕາມ, ໃນປະກາດອີກສະບັບໜຶ່ງ ທີ່ທ່ານ ໂດໂນ ທຣຳ ສົ່ງເຖິງທ່ານ ໄມ ເພນ ຮອງປະທານປະເທດ ສ.ອາເມຣິກາ ທີ່ຖືເປັນປະທານສະພາສູງໂດຍຕຳແໜ່ງ ແລະ ທ່ານ ນາງ ແນນຊີ ເປໂລຊີ ປະທານສະພາລ່າງ ລະບຸເລື່ອງການກຽມລະງັບ GSP ແກ່ສິນຄ້າສົ່ງອອກບາງປະເພດຈາກໄທ ເນື່ອງຈາກລັດຖະບານ ແລະ ໜ່ວຍງານທີ່ກ່ຽວຂ້ອງຂອງໄທ ຍັງບໍ່ສາມາດຍົກລະດັບສິດທິແຮງງານໃຫ້ເທົ່າທຽບມາດຕະຖານສາກົນໄດ້ ເຊິ່ງເນື້ອໃນຈົດໝາຍຂອງທ່ານ ໂດໂນ ທຣຳ ບໍ່ໄດ້ລົງລາຍລະອຽດລາຍການສິນຄ້າ ແຕ່ລະບຸພຽງວ່າຄິດເປັນມູນຄ່າລວມປະມານ 1,300 ລ້ານໂດລາສະຫະລັດ.

ໃນດ້ານຂອງ USTR ໃຫ້ຂໍ້ມູນເພີ່ມເຕີມວ່າ ມາດຕະການດັ່ງກ່າວຕໍ່ໄທ ຈະມີຜົນບັງຄັບໃຊ້ພາຍໃນ 6 ເດືອນ ແລະ ຈະຄວບຄຸມສິນຄ້າຂອງໄທປະມານ 1 ໃນ 3 ທີ່ໄດ້ຮັບສິດທິພິເສດນີ້ຕະຫຼອດໄລຍະທີ່ຜ່ານມາ, ແຕ່ໃນສ່ວນຂອງສິນຄ້າອາຫານທະເລທຸກປະເພດຈະຖືກລະງັບ GSP ເນື່ອງຈາກບັນຫາສິດທິ ແລະ ສະຫວັດດີການແຮງງານ.

ນອກຈາກນີ້, ຖະແຫຼງການຂອງ GSP ຍັງລະບຸການພິຈາລະນາສະຖານະການແຮງງານໃນອີກຫຼາຍປະເທດ ລວມມີອາແຊກໄບຊານ, ໂບລີວີ, ອິຣັກ ແລະ ອຸດສະເບກິດສະຖານ ເຊິ່ງອາດນຳໄປສູ່ການລະງັບ GSP ໃນອະນາຄົດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube