ຟີຟາ-ອາຊຽນລົງນາມ MOU ເພື່ອກຽມຄວາມພ້ອມອາຊຽນ ສູ່ການເປັນເຈົ້າພາບບານໂລກໃນອະນາຄົດ

ເມື່ອວັນທີ 2 ພະຈິກ 2019 ທີ່ຜ່ານມາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ບັນດາຜູ້ນຳປະເທດສະມາຊິກອາຊຽນ ໄດ້ຮ່ວມກັນເປັນສັກຂີພິຍານໃນພິທີລົງນາມບົດບັນທຶກຄວາມເຂົ້າໃຈ (MOU) ລະຫວ່າງທ່ານ ດາໂຕະ ລິມ ຈອກ ຮອຍ ເລຂາທິການໃຫຍ່ອາຊຽນ ແລະ ທ່ານ ຈີອານນີ ອິນຟານຕີໂນ ປະທານສະຫະພັນບານເຕະນາໆຊາດ ຫຼື FIFA ເພື່ອພັດທະນາຄວາມສາມາດດ້ານກີລາບານເຕະໃນອາຊຽນ ໄປສູ່ລະດັບມາດຕະຖານສາກົນ ແລະ ຍັງເປັນການສະໜັບສະໜູນຄວາມປາຖະໜາຮ່ວມກັນຂອງອາຊຽນ ທີ່ຈະສະເໜີເປັນເຈົ້າພາບຮ່ວມຈັດການແຂ່ງຂັນບານໂລກ 2034.

ເຊິ່ງກ່ອນໜ້ານີ້, ເມື່ອວັນທີ 19 ຕຸລາ 2019 ທີ່ຜ່ານມາ ທ່ານ ຈີອານນີ ອິນຟານຕີໂຕ ພ້ອມດ້ວຍຄະນະກໍ່ໄດ້ເດີນທາງຢ້ຽມຢາມ ສປປ.ລາວ ແລະ ເຂົ້າພົບທ່ານ ທອງລຸນ ສີສຸລິດ ເຊິ່ງທ່ານນາຍົກໄດ້ກ່າວວ່າ: ຫວັງວ່າຈະໄດ້ຮັບການເອົາໃຈໃສ່ສືບຕໍ່ຊ່ວຍເຫຼືອຈາກ FIFA ເພື່ອພັດທະນາທີມກິລາບານເຕະຂອງ ສປປ.ລາວ ທຽບເທົ່າກັບບັນດາປະເທດອາຊຽນ ກໍ່ຄືສາກົນໃນຕໍ່ໜ້າ ແລະ ຫວັງວ່າ FIFA ຈະສະໜັບສະໜູນອາຊຽນ ໃນການເປັນເຈົ້າພາບຈັດການແຂ່ງຂັນບານໂລກໃນອະນາຄົດ.

ທີ່ຜ່ານມາ FIFA ໄດ້ໃຫ້ການຊ່ວຍເຫຼືອ ສະໜັບສະໜູນ ສປປ.ລາວ ຫຼາຍໂຄງການເຊັ່ນ: ໂຄງການກໍ່ສ້າງຫໍພັກນັກກິລາຊາຍ ແລະ ຫ້ອງອາຫານ, ໂຄງການອາຄານພະແນກເຕັກນິກວິທະຍາ ແລະ ພັດທະນາເດີ່ນຟຸດຊໍໃນຮົ່ມ, ອາຄານຫໍພັກນັກກິລາຍິງ, ສະໜາມຫຍ້າທຽມຢູ່ສູນເຝິກຫ້ວຍຫົງ, ອາຄານຫ້ອງການບໍລິການ, ຫໍພັກນັກກິລາ ແລະ ຄູ່ເຝິກທີ່ສະໜາມກິລາແຫ່ງຊາດ, ນອກນັ້ນ FIFA ໄດ້ຊ່ວຍງົບປະມານບໍລິຫານສະຫະພັນບານເຕະແຫ່ງຊາດລາວ ລວມມູນຄ່າການຊ່ວຍເຫຼືອທັງໝົດ 3 ລ້ານກວ່າໂດລາສະຫະລັດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube