7 ຜູ້ນຳອາຊຽນ ບໍ່ຮ່ວມກອງປະຊຸມອາຊຽນ-ສ.ອາເມຣິກາ ຄັ້ງທີ 7 ທີ່ບາງກອກ

ລາຍງານ 4 ພະຈິກ 2019, ບັນຍາກາດຂອງກອງປະຊຸມອາຊຽນ-ສະຫະລັດ ອາເມຣິກາ ຄັ້ງທີ 7 ທີ່ຈັດຂຶ້ນໃນວັນຈັນນີ້ ທີ່ນະຄອນຫຼວງບາງກອກ ເຊິ່ງເປັນໜຶ່ງໃນກອງປະຊຸມປິ່ນອ້ອມລາຍການສຳຄັນຂອງກອງປະຊຸມສຸດຍອດອາຊຽນ ທີ່ໄທເປັນເຈົ້າພາບໃນປີນີ້ ແຕກຕ່າງຈາກຫຼາຍປີຜ່ານມາ ເນື່ອງຈາກຜູ້ແທນຂອງລັດຖະບານ ສ.ອາເມຣິກາ ບໍ່ແມ່ນປະທານປະເທດ ຫຼື ຮອງປະທານປະເທດ ແຕ່ເປັນຜູ້ແທນພິເສດໃນນາມປະທານປະເທດ ສ.ອາເມຣິກາ ຄືທ່ານ ໂຣເບິດ ໂອໄບຣອັນ ທີ່ປຶກສາດ້ານຄວາມໝັ້ນຄົງແຫ່ງຊາດປະຈຳທຳນຽບຂາວ.

ເຊິ່ງການທີ່ທ່ານ ໂຣເບິດ ໂອໄບຣອັນ ບໍ່ຖືເປັນສະມາຊິກໃນຄະນະລັດຖະບານຊຸດປັດຈຸບັນພາຍໃນການນຳຂອງທ່ານ ໂດໂນ ທຣຳ ສະມາຊິກອາຊຽນເກືອບທັງໝົດ ຈຶ່ງສົ່ງລັດຖະມົນຕີກະຊວງການຕ່າງປະເທດເຂົ້າຮ່ວມການປຶກສາຫາລືແທນ, ໂດຍມີພຽງທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີໄທ ໃນຖານະເຈົ້າພາບ, ທ່ານ ຫງວຽນ ຊວນ ຟຸກ ນາຍົກລັດຖະມົນຕີຫວຽດນາມ ທີ່ຈະເປັນປະທານອາຊຽນໃນປີໜ້າ ແລະ ທ່ານ ທອງລຸນ ສີສຸລິດ ນາຍົກລັດຖະມົນຕີ ສປປ.ລາວ ເທົ່ານັ້ນ ທີ່ເຂົ້າຮ່ວມກອງປະຊຸມດ້ວຍຕົວເອງ.

ເຖິງຢ່າງໃດກໍ່ຕາມ, ທ່ານ ໂຣເບິດ ໂອໄບຣອັນກ່າວຢ້ຳວ່າ ສ.ອາເມຣິກາ ຈະບໍ່ປ່ອຍປະອາຊີຕາເວັນອອກສຽງໃຕ້ ທີ່ກຳລັງຕົກຢູ່ພາຍໃຕ້ການຂົ່ມຂູ່ຄຸກຄາມຈາກຈີນ ໂດຍສະເພາະສະຖານະການໃນທະເລຈີນໃຕ້ ແລະ ໄດ້ອ່ານຈົດໝາຍຂອງທ່ານ ໂດໂນ ທຣຳ ຕໍ່ກອງປະຊຸມ ເຊີນຜູ້ນຳສະມາຊິກອາຊຽນທັງ 10 ປະເທດ ຮ່ວມປະຊຸມວາລະພິເສດ ທີ່ ສ.ອາເມຣິກາໃນຕົ້ນປີໜ້າ ໂດຍທຳນຽບຂາວຈະແຈ້ງກຳນົດການຢ່າງເປັນທາງການອີກຄັ້ງໜຶ່ງ.

ເຖິງຢ່າງໃດກໍ່ຕາມ, ອີງຕາມການລາຍງານຂອງສຳນັກຂ່າວ Kyodo ທີ່ສຳພາດໜຶ່ງໃນຄະນະນັກການທູດທີ່ຕິດຕາມທ່ານ ໂຣເບິດ ໂອໄບຣອັນ ວ່າ: ການທີ່ຜູ້ນຳອາຊຽນເກືອບທັງໝົດບໍ່ເຂົ້າຮ່ວມກອງປະຊຸມດ້ວຍຕົວເອງ ລັດຖະບານ ສ.ອາເມຣິກາ ຕີລາຄາວ່າ ຖືເປັນເຈດຕະນາທີ່ສ້າງຄວາມອັບອາຍໃຫ້ກັບທ່ານ ໂດໂນ ທຣຳ ແລະ ຈະສົ່ງຜົນກະທົບຢ່າງໃຫຍ່ຫຼວງຕໍ່ສາຍພົວພັນພື້ນຖານລະຫວ່າງອາຊຽນ ກັບ ສ.ອາເມຣິກາ ເຫດການທີ່ເກີດຂຶ້ນໜ້າເປັນຫ່ວງຢ່າງຍິ່ງ.

ຂະນະທີ່ແຫຼ່ງຂ່າວດ້ານການທູດໃນກອງປະຊຸມອາຊຽນຄັ້ງນີ້ອີກຫຼາຍຄົນໃຫ້ຂໍ້ມູນກົງກັນວ່າ ການຕັດສິນໃຈເກີດຂຶ້ນລະຫວ່າງການຮັບປະທານອາຫານຄ່ຳ ແລະ ຫາລືຮ່ວມກັນຢ່າງບໍ່ເປັນທາງການລະຫວ່າງລັດຖະບານຕ່າງປະເທດອາຊຽນ ເມື່ອຄືນວັນສຸກ ທີ່ຜ່ານມາ ເຊິ່ງສະມາຊິກທັງ 10 ປະເທດເຫັນດີຮ່ວມກັນວ່າ ເປັນສິ່ງທີ່ບໍ່ຄວນຢ່າງຍິ່ງ ທີ່ທ່ານ ໂດໂນ ທຣຳ ບໍ່ເຂົ້າຮ່ວມກອງປະຊຸມເປັນປີທີ 2 ຕິດຕໍ່ກັນ, ໂດຍເມື່ອປີທີ່ຜ່ານມາໄດ້ສົ່ງຮອງປະທານປະເທດທ່ານ ໄມ ເພນ ເຂົ້າຮ່ວມປະຊຸມແນທີ່ສິງກະໂປ, ຄັ້ງນີ້ອາຊຽນຈຶ່ງຕົກລົງກັນສົ່ງຕົວແທນລະດັບຜູ້ນຳ ເຂົ້າຮ່ວມປະຊຸມກັບທ່ານ ໂຣເບິດ ໂອໄບຣອັນ ເຊິ່ງອາຊຽນຕີລາຄາວ່າຫາກທ່ານ ໂດໂນ ທຣຳ ບໍ່ຕ້ອງການມາ ຢ່າງໜ້ອຍຄວນສົ່ງຜູ້ແທນທີ່ຖືເປັນເຈົ້າໜ້າທີ່ໃນຄະນະລັດຖະບານເຂົ້າຮ່ວມ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube