ສ.ອາເມຣິກາ ຈະໃຊ້ມາດຕະການແຊກແຊງ ຫາກຈີນໃຊ້ກຳລັງທະຫານປາບປາມການປະທ້ວງຮົງກົງ

ລາຍງານ 16 ພະຈິກ 2019, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວເມື່ອວັນສຸກ 15 ພະຈິກ ທີ່ຜ່ານມາ ກ່ຽວກັບສະຖານະການການປະທ້ວງໃນຮົງກົງ ທີ່ທະວີຄວາມຮຸນແຮງຫຼາຍຂຶ້ນຕັ້ງແຕ່ຕົ້ນອາທິດນີ້ ວ່າສິ່ງທີ່ລັດຖະບານ ສ.ອາເມຣິກາກຳລັງປະເຊີນຄືຄວາມທ້າທາຍຈາກພັກຄອມມູນິດຈີນ ທີ່ດຳເນີນນະໂຍບາຍຕໍ່ຮົງກົງບໍ່ສອດຄ່ອງກັບສັນຍາກ່ອນໜ້ານີ້ ໂດຍບໍ່ໄດ້ໃຫ້ລາຍລະອຽດວ່າສັນຍາ ຫຼື ຂໍ້ຕົກລົງລະຫວ່າງທັງສອງປະເທດກ່ຽວກັບຮົງກົງນັ້ນແມ່ນຫຍັງ, ແຕ່ກ່າວວ່າ ສ.ອາເມຣິກາຫວັງເປັນຢ່າງຍິ່ງໃນການທີ່ຈີນຈະຍຶດໝັ້ນ ແລະ ປະຕິບັດຕາມຫຼັກການໜຶ່ງປະເທດ ສອງລະບອບ ເຊິ່ງເປັນພື້ນຖານໃນການບັນຍັດກົດໝາຍທັງໝົດຂອງກົດໝາຍພື້ນຖານຮົງກົງ ທີ່ປຽບດັ່ງລັດຖະທຳມະນູນຂອງຮົງກົງ.

ເຖິງຢ່າງໃດກໍ່ຕາມ, ທ່ານ ໄມ ພອມແພວ ກ່າວຢ່າງກົງໄປກົງມາອີກວ່າ ເຖິງແມ່ນວ່າລັດຖະບານ ສ.ອາເມຣິກາຍັງຄົງເຊື່ອໝັ້ນຕໍ່ແນວທາງການແກ້ໄຂສະຖານະການຂອງຈີນ ວ່າຈະສາມາດຫຼຸດຜ່ອນຄວາມວຸ້ນວາຍໃນຮົງກົງດ້ວຍວິທີທີ່ບໍ່ຮຸນແຮງ ທີ່ອາດສົ່ງຜົນໃຫ້ຕ້ອງມີຜູ້ໄດ້ຮັບບາດເຈັບແດ່ຈຳນວນໜຶ່ງ ແຕ່ກໍ່ບໍ່ປະຕິເສດວ່າ ສ.ອາເມຣິກາ ກຳລັງພິຈາລະນາແນວທາງທຸກຮູບແບບ ແລະ ທ່ານ ໂດໂນ ທຣຳ ປະທານປະເທດ ສ.ອາເມຣິກາ ອາດຕັດສິນໃຈໃຊ້ມາດຕະການຕອບໂຕ້ທີ່ເຂັ້ມງວດຍິ່ງຂຶ້ນ ຫາກລັດຖະບານຈີນໃຊ້ມາດຕະການທາງທະຫານແກ້ໄຂບັນຫາການປະທ້ວງ.

ໃນວັນດຽວກັນ, ທ່ານ ເກິ້ງ ສວງ ໂຄສົກກະຊວງການຕ່າງປະເທດຈີນ ກ່າວວ່າລັດຖະບານຈີນພ້ອມດຳເນີນການທຸກວິຖີທາງຕາມກອບກົດໝາຍ ເພື່ອປົກປ້ອງອະທິປະໄຕ ແລະ ຜືນແຜ່ນດິນອັນຄົບຖ້ວນ ພ້ອມທັງກ່າວເຖິງລາຍງານທີ່ຄະນະກຳມາທິການທົບທວນເສດຖະກິດ ແລະ ຄວາມປອດໄພ ສ.ອາເມຣິກາ-ຈີນ (USCC) ທີ່ສະເໜີໃຫ້ສະພາສູງລະງັບສິດທິພິເສດທາງການຄ້າທີ່ຮົງກົງໄດ້ຮັບເມື່ອປີ 1992 ຫາກລັດຖະບານຈີນລະດົມກຳລັງກອງທັບປົດປ່ອຍປະຊາຊົນຈີນ ຫຼື ກອງກຳລັງຕຳຫຼວດຕິດອາວຸດປະຊາຊົນຈີນຮຸກຮານດ້ານອາວຸດຕໍ່ຮົງກົງ ວ່າເປັນລາຍງານທີ່ເຕັມໄປດ້ວຍອະຄະຕິ ແລະ ບໍ່ມີແກ່ນສານ ພ້ອມທັງລະບຸວ່າ ຈະບໍ່ຂໍເສຍເວລາໃຫ້ຄວາມຄິດເຫັນໃດໆຕໍ່ບັນຫານີ້.

ເຖິງຢ່າງກໍ່ຕາມໂຄສົກກະຊວງການຕ່າງປະເທດຈີນໄດ້ກ່າວເຖິງເຫດການທີ່ທ່ານ ນາງ ເທເຣຊາ ເສິງ ເລຂາທິການຍຸຕິທຳຂອງຄະນະຜູ້ບໍລິຫານຮົງກົງ ຖືກຜູ້ປະທ້ວງຝ່າຍຕໍ່ຕ້ານຫຼາຍສິບຄົນຫຸມລ້ອມ ແລະ ມີການກະທົບກະທັ້ງກັນທາງຮ່າງກາຍໃນລະຫວ່າງທີ່ທ່ານ ນາງ ເດີນທາງຢ້ຽມຢາມນະຄອນຫຼວງລອນດອນ ປະເທດອັງກິດ ເມື່ອວັນພະຫັດ ທີ່ຜ່ານມາວ່າ ເຖິງແມ່ນວ່າເຈົ້າໜ້າທີ່ຮົງກົງຄົນດັ່ງກ່າວຈະສາມາດຜ່າວົງລ້ອມໄປໄດ້ໃນທີ່ສຸດ ແຕ່ທ່ານ ເກິ້ງ ສວງ ກ່າວວ່າຫາກອັງກິດຍັງບໍ່ຢຸດເຕີມເຊື້ອໄຟໃຫ້ຮົງກົງ ລະວັງແປວໄຟນັ້ນຈະຫວນກັບໄປຈູດເຜົາໂຕເອງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube