ປ.ສີ ຮຽກກຸ່ມຜູ້ປະທ້ວງຮົງກົງວ່າ ພວກອາຊະຍາກອນປ່າເຖື່ອນ ທີ່ມີເຈດຕະນາທ້າທາຍ ສປ.ຈີນ

ລາຍງານ 16 ພະຈິກ 2019, ທ່ານ ຢາງ ກວງ ໂຄສົກສຳນັກງານວຽກງານຮົງກົງ ແລະ ມາເກົ້າແຫ່ງ ສປ.ຈີນ (HKMAO) ຖະແຫຼງເມື່ອວັນສຸກ 15 ພະຈິກ ທີ່ຜ່ານມາ ໂດຍຢ້ຳເຖິງຄຳກ່າວຂອງທ່ານ ສີ ຈິ້ນຜິງ ປະທານປະເທດຈີນ ນອກຮອບກອງປະຊຸມ BRISC ເມື່ອວັນພະຫັດ 14 ພະຈິກ ທີ່ຜ່ານມາ ວ່າຄືສັນຍານເຕືອນທີ່ຊັດເຈນທີ່ສຸດແລ້ວ ຈາກລັດຖະບານຈີນ ທີ່ຕ້ອງການໃຫ້ສະຖານະການຄວາມຮຸນແຮງ ແລະ ຄວາມວຸ້ນວາຍໃນຮົງກົງຍຸຕິລົງໂດຍໄວທີ່ສຸດ.

ເຖິງຢ່າງໃດກໍ່ຕາມ, ການທີ່ຜູ້ນຳຈີນຄົນປັດຈຸບັນ ທີ່ເກືອບບໍ່ຄ່ອຍໄດ້ກ່າວສະແດງຄວາມເຫັນໃດໆຢ່າງເປີດເຜີຍຕໍ່ສື່ມວນຊົນ ທຸກຝ່າຍຈິງໃຫ້ຄວາມສຳຄັນ ແລະ ຍັງຄົງຕີຄວາມຄຳເວົ້າຂອງທ່ານ ສີ ຈິ້ນຜິງ ວ່າມີຄວາມໝາຍຄວາມສຳຄັນ ເຊິ່ງຜູ້ນຳຈີນໄດ້ກ່າວໃນຕອນໜຶ່ງວ່າ ການປະທ້ວງຮຸນແຮງໃນຮົງກົງເປັນສີມືຂອງກຸ່ມອາຊະນາກອນປ່າເຖື່ອນ ນັ້ນຖືເປັນເຈດຕະນາທ້າທາຍຢ່າງຮ້າຍແຮງຕໍ່ພື້ນຖານຂອງຫຼັກການໜຶ່ງປະເທດ ສອງລະບອບ, ຂະນະທີ່ທ່ານ ຢາງ ກວງ ກ່າວວ່າໃນສ່ວນຂອງ HKMAO ຈະໃຫ້ການສະໜັບສະໜູນຢ່າງເຕັມທີ່ຕໍ່ທັງຄະນະຜູ້ບໍລິຫານ ແລະ ຕຳຫຼວດຮົງກົງ ໃນການຟື້ນຟູຄວາມສະຫງົບໃຫ້ກັບຄືນສູ່ສັງຄົມ ແລະ ຂະບວນການຂອງຝ່າຍນິຕິບັນຍັດຮົງກົງໃນການລົງໂທດອາຊະນາກອນທີ່ກ່ຽວຂ້ອງກັບການປະທ້ວງຄັ້ງນີ້.

ໃນເວລາດຽວກັນ, ມະຫາວິທະຍາໄລຈີນແຫ່ງຮົງກົງ (CUHK) ໄດ້ເຜີຍແຜ່ຖະແຫຼງການຂອງທ່ານ ຣັອກກີ້ ຕວນ ອະທິການບໍດີ ວ່າ CUHK ບໍ່ແມ່ນສະໜາມຮົບ ແລະ ໂຮງງານຜະລິດອາວຸດ, ພາຍຫຼັງທີ່ມະຫາວິທະຍາໄລແຫ່ງນີ້ເປັນຈຸດປະທະດຸເດືອດທີ່ສຸດເມື່ອຕົ້ນອາທິດນີ້ ລະຫວ່າງຜູ້ປະທ້ວງກັບຕຳຫຼວດປາບຈະລາຈົນ, ແຕ່ CUHK ຜັດຖືກບຸກລຸກ ແລະ ຍຶດຄອງໂດຍກຸ່ມຜູ້ປະທ້ວງຊຸດດຳໃສ່ໜ້າກາກ ທີ່ມີບຸກຄົນພາຍນອກເຂົ້າມາປົນເປ ສົ່ງຜົນໃຫ້ສະຖານະການເກີນຂອບເຂດຂອງການຄວບຄຸມ ແລະ ເກີນກວ່າຈະຮັບໄດ້, ເຊິ່ງ CUHK ປະກາດວ່າຈະຊ່ວຍເຫຼືອນັກສຶກສາ ແລະ ບຸກຄະລາກອນທຸກຄົນໃຫ້ອອກຈາກມະຫາວິທະຍາໄລຢ່າງປອດໄພ, ສ່ວນກຸ່ມຜູ້ປະທ້ວງຊຸດດຳຂໍໃຫ້ອອກຈາກພື້ນທີ່ທັນທີ ບໍ່ດັ່ງນັ້ນມະຫາວິທະຍາໄລອາດຂໍຄວາມຊ່ວຍເຫຼືອຈາກພາກລັດໃນການຂໍຄືນພື້ນທີ່.

ຫຼັງຈາກນັ້ນ, ສຳນັກຂ່າວຫຼາຍແຫ່ງຂອງຮົງກົງລາຍງານວ່າ ກຸ່ມຜູ້ປະທ້ວງຊຸດດຳທີ່ CUHK ໄດ້ເລີ່ມຖອນກຳລັງອອກຈາກປະຕູຫຼັກຂອງມະຫາວິທະຍາໄລ ແຕ່ບໍ່ຊັດເຈນວ່າກຸ່ມຄົນເຫຼົ່ານີ້ຈະເດີນທາງໄປບ່ອນໃດຕໍ່ ແລະ ຍັງເຫຼືອກຸ່ມຜູ້ປະທ້ວງອີກຈຳນວນໜຶ່ງຮັກສາການຢູ່ບໍລິເວນນັ້ນ, ນອກຈາກນີ້ ສື່ທ້ອງຖິ່ນຍັງລາຍງານວ່າມະຫາວິທະຍາໄລຮົງກົງໂພລີເຕັກນິກ ໄດ້ກາຍເປັນສະຖາບັນເຝິກການໃຊ້ອາວຸດ ຫຼັງຈາກມີການເຜີຍແຜ່ພາບກຸ່ມຜູ້ປະທ້ວງຊຸດດຳທົດລອງປະສິດທິພາບຂອງລະເບີດໄຟ, ເຄື່ອງຍິງກ້ອນດິນຈີ່, ການຊ້ອມຍິງທະນູ ແລະ ການໂຮມກຸ່ມກັນຜະລິດອາວຸດອີກຫຼາຍຮູບແບບ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube