ໄຊຍະບູລີຍັງຢູ່ໃນຄວາມສັ່ນໄຫວ ນັບໄດ້ 79 ຄັ້ງແລ້ວ, ສ່ວນເຂື່ອນນ້ຳຂອງຖະແຫຼງວ່າປອດໄພ

ລາຍງານ 22 ພະຈິກ 2019, ອີງຕາມການລາຍງານຂອງກົມອຸຕຸນິຍົມ ແລະ ອຸທົກກະສາດປະເທດໄທ, ນັບແຕ່ເວລາ 23:49 ນາທີ, ວັນທີ 20 ພະຈິກ ທີ່ເກີດແຜ່ນດິນໄຫວຄັ້ງທຳອິດຢູ່ແຂວງໄຊຍະບູລີ ຂະໜາດ 2.9 ຣິກເຕີ ເຖິງ ຕອນເຊົ້າວັນທີ 22 ພະຈິກນີ້ ໄດ້ເກີດການສັ່ນໄຫວຂອງແຜ່ນດິນຢ່າງຕໍ່ເນື່ອງເຖິງ 79 ຄັ້ງແລ້ວ, ໂດຍຄັ້ງຫຼ້າສຸດຂະໜາດ 2.2 ຣິກເຕີ ເກີດຂຶ້ນເມື່ອເວລາ 07:56 ນາທີ ມື້ນີ້.

ຄັ້ງທີ່ຮຸນແຮງທຳອິດ ທີ່ສາມາດຮັບຮູ້ໄດ້ເຖິງແຮງສັ່ນສະເທືອນຢ່າງຊັດເຈນ ເກີດຂຶ້ນເມື່ອເວລາ 04:03 ນາທີ, ວັນທີ 21 ພະຈິກ 2019 ຂະໜາດ 5.9 ຣິກເຕີ ແລະ ຕໍ່ດ້ວຍຄວາມຮຸນແຮງທີ່ສຸດຂອງການສັ່ນໄຫວເຖິງ 6.4 ຣິກເຕີ ເມື່ອເວລາ 06:50 ນາທີ, ວັນທີ 21 ພະຈິກ 2019 ແຮງສັ່ນສະເທືອນໄດ້ແຜ່ອອກໄປຫຼາຍຮ້ອຍກິໂລແມັດ ເຮັດໃຫ້ສາມາດຮັບຮູ້ເຖິງແຮງສັ່ນໄດ້ເຖິງຫົວເມືອງໃຫຍ່ໆທັງພາຍໃນ ແລະ ປະເທດອ້ອມຂ້າງ.

ໄພແຜ່ນດິນໄຫວຄັ້ງນີ້ ຖືວ່າໄດ້ສ້າງຄວາມເສຍຫາຍແກ່ຊັບສິນປະຊາຊົນໄຊຍະບູລີສົມຄວນ ໂດຍສະເພາະສິ່ງປຸກສ້າງທີ່ເພພັງ ແຕ່ກໍ່ຍັງບໍ່ມີການລາຍງານຕົວເລກຄວາມເສຍຫາຍຢ່າງເປັນທາງການເທື່ອ, ນອກຈາກນີ້ ປະຊາຊົນໄຊຍະບູລີ ແມ່ນຍັງຢູ່ໃນຄວາມແຕກຕື່ນ ແລະ ບໍ່ກ້າເຂົ້ານອນໃນເຮືອນ ເຊິ່ງໄດ້ພາກັນອອກມານອນຢູ່ກາງເດີ່ນໂລ່ງແຈ້ງ ແລະ ຕາມເດີນກິລາ.

ນອກນັ້ນຫຼາຍຝ່າຍຍັງໃຫ້ຄວາມສົນໃຈເຖິງຄວາມປອດໄພຂອງເຂື່ອນໄຟຟ້າໄຊຍະບູລີ (ເຂື່ອນແມ່ນ້ຳຂອງ) ແລະ ໂຮງໄຟຟ້າຖ່ານຫິນຫົງສາ ເຊິ່ງທັງສອງແມ່ນຕັ້ງຢູ່ແຂວງໄຊຍະບູລີ ກໍ່ໄດ້ອອກຖະແຫຼງການແລ້ວດັ່ງນີ້:

– ບໍລິສັດ ຊີເຄ ພາວເວີ ຈຳກັດ (ມະຫາຊົນ) ຖະແຫຼງ 21 ພະຈິກ 2019: ຈາກການສຳຫຼວດເບື້ອງຕົ້ນ ໂຄງສ້າງໂຮງໄຟຟ້າພະລັງງານນ້ຳໄຊຍະບູລີ ບໍ່ໄດ້ຮັບຜົນກະທົບຈາກເຫດແຜ່ນດິນໄຫວ ຍັງຄົງເດີນເຄື່ອງຈັກຜະລິດ ແລະ ຈ່າຍໄຟຟ້າໃຫ້ກັບການໄຟຟ້າຝ່າຍຜະລິດແຫ່ງປະເທດໄທ ແລະ ລັດວິສາຫະກິດໄຟຟ້າລາວຕາມສັນຍາຢ່າງຕໍ່ເນື່ອງຕາມປົກກະຕິ, ພ້ອມທັງລະບຸວ່າ ຈະມີການຕິດຕາມສະຖານະການ ແລະ ຜົນກະທົບຈາກເຫດການແຜ່ນດິນໄຫວຢ່າງໃກ້ຊິດ ທັງນີ້ໂຄງສ້າງ ແລະ ອຸປະກອນທຸກສ່ວນຂອງໂຮງໄຟຟ້າ ເປັນໄປຕາມຂໍ້ກຳນົດ ແລະ ມາດຕະຖານຄວາມປອດໄພສູງສຸດ.

– ບໍລິສັດ ໄຟຟ້າ ຫົງສາ ຈຳກັດ ຖະແຫຼງ 21 ພະຈິກ 2019: ຈາກເຫດແຜ່ນດິນໄຫວ ພ້ອມກັບມີການໄຫວຊ້ອນມາອີກຫຼາຍຄັ້ງ ລະບົບການປ້ອງກັນຄວາມເສຍຫາຍຈາກແຮງສັ່ນສະເທືອນຂອງອຸປະກອນຫຼັກໃນໂຮງໄຟຟ້າໄດ້ເຮັດວຽກຕາມຂັ້ນຕອນປົກກະຕິ ເພື່ອຢຸດການເດີນເຄື່ອງຂອງໂຮງໄຟຟ້າ, ເຊິ່ງຂະນະນີ້ ບໍລິສັດໄດ້ຢຸດການເດີນເຄື່ອງໂຮງໄຟຟ້າເປັນການຊົ່ວຄາວ ແລະ ໄດ້ເລີ່ມເຂົ້າໄປກວດສອບຄວາມເສຍຫາຍຂອງໂຮງໄຟຟ້າ, ລະບົບສາຍສົ່ງ, ບໍ່ແຮ່ຖ່ານຫິນ, ບໍ່ແຮ່ຫິນປູນ, ເຂື່ອນນ້ຳເລືອກ ແລະ ເຂື່ອນນ້ຳແກ່ນ ໃນເບື້ອງຕົ້ນບໍ່ພົບຄວາມເສຍຫາຍຂອງໂຄງສ້າງຫຼັກຂອງສິ່ງປຸກສ້າງທີ່ຈຳເປັນການໃນການດຳເນີນງານ ແລະ ບໍ່ມີ ຜູ້ໄດ້ຮັບບາດເຈັບ ພົບເຫັນແຕ່ຄວາມເສຍຫາຍບາງສ່ວນຂອງພື້ນຜິວສິ່ງປຸກສ້າງເຫຼົ່ານັ້ນ, ພ້ອມທັງລະບຸວ່າ ຄາດວ່າຈະໃຊ້ເວລາປະມານ 24 ຊົ່ວໂມງ ໃນການກວດສອບເບື້ອງຕົ້ນ ແລະ ຈະແຈ້ງຄວາມຄືບໜ້າ ແລະ ຄວາມເສຍຫາຍຈາກເຫດການດັ່ງກ່າວໃຫ້ທຸກທ່ານໄດ້ຮັບຊາບຕໍ່ໄປ.

ຕາຕະລາງລາຍລະອຽດແຜ່ນດິນໄຫວແຕ່ລະຄັ້ງ


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube