ທ່ານນາຍົກ ຮ່ວມກອງປະຊຸມອາຊຽນ-ເກົາຫຼີໃຕ້ ແລະ ກອງປະຊຸມອື່ນໆ ທີ່ປະເທດເກົາຫຼີໃຕ້

ລາຍງານ 25 ພະຈິກ 2019, ໃນໂອກາດທີ່ ທ່ານ ທອງລຸນ ສີສຸລິດນາ ນາຍົກລັດຖະມົນຕີ ເດີນທາງເຂົ້າຮ່ວມກອງປະຊຸມສຸດຍອດອາຊຽນ-ເກົາຫຼີໃຕ້ ສະໄໝພິເສດ ຄັ້ງທີ 3 ແລະ ກອງປະຊຸມຜູ້ນຳກອບການຮ່ວມມືລຸ່ມແມ່ນ້ຳຂອງ ຄັ້ງທີ 1 ລະຫວ່າງວັນທີ 24-27 ພະຈິກ 2019 ທີ່ນະຄອນປູຊານ, ປະເທດເກົາຫຼີໃຕ້. ເມື່ອວັນອາທິດ 24 ພະຈິກ ທີ່ຜ່ານມາ ທ່ານນາຍົກລັດຖະມົນຕີໄດ້ຮ່ວມພິທີເປີດໂຄງການ Busan Eco-Delta Smart City ເຊິ່ງເປັນໂຄງການພັດທະນາເມືອງອັດສະລິຍະລະດັບຊາດ ໂຄງການທຳອິດຂອງເກົາຫຼີໃຕ້ ທີ່ຈະມີການແລກປ່ຽນນະໂຍບາຍ, ເຕັກໂນໂລຊີ, ຂໍ້ມູນ ແລະ ຊັບພະຍາກອນມະນຸດ ລວມທັງສົ່ງເສີມອຸດສາຫະກຳທີ່ກ່ຽວຂ້ອງກັບບັນດາປະເທດສະມາຊິກອາຊຽນ ຕາມຄວາມສົນໃຈຂອງແຕ່ລະຝ່າຍ ເຊິ່ງຈະນຳໄປສູ່ຜົນປະໂຫຍດຮ່ວມກັນ.

ພາບ: ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ໃນພິທີເປີດໂຄງການ Busan Eco-Delta Smart City

ພາບ: ພິທີເປີດໂຄງການ Busan Eco-Delta Smart City

ກອງປະຊຸມສຸດຍອດອາຊຽນ-ເກົາຫຼີໃຕ້ ສະໄໝພິເສດ ຄັ້ງທີ 3 (2019 ASEAN-ROK Commemorative Summit) ເປັນກອງປະຊຸມລະດັບຜູ້ນຳ ລະຫວ່າງຜູ້ນຳອາຊຽນກັບປະທານປະເທດເກົາຫຼີໃຕ້ ໃນໂອກາດການສະເຫຼີມສະຫຼອງ ຄົບຮອບ 30 ປີສາຍພົວພັນອາຊຽນ-ເກົາຫຼີໃຕ້, ໂດຍກອງປະຊຸມສຸດຍອດດັ່ງກ່າວແບ່ງອອກເປັນ 2 ສ່ວນຄື:

– ກອງປະຊຸມຄົບຄະນະ ໂດຍມີ 2 ໄລຍະ, ໄລຍະທີ 1 ຫົວຂໍ້ ASEAN-ROK 30&30 ໂດຍຈະທົບທວນສາຍພົວພັນ ແລະ ການຮ່ວມມືລະຫວ່າງອາຊຽນ ກັບ ເກົາຫຼີໃຕ້ໃນໄລຍະ 30 ປີຜ່ານມາ ແລະ ການກຳນົດທິດທາງໃນອີກ 30 ປີຕໍ່ໜ້າ ແລະ ໄລຍະທີ 2 ຫົວຂໍ້ Enhancing Connectivity toward Prosperity and Sustainbility ໂດຍຈະແລກປ່ຽນຄວາມຄິດຄວາມເຫັນ ໃນບັນຫາການເຊື່ອມໂຍງ ເພື່ອສົ່ງເສີມຄວາມຈະເລີນກ້າວໜ້າ ແລະ ຄວາມຍືນຍົງ.

– ກອງປະຊຸມສຸດຍອດອາຊຽນ-ເກົາຫຼີໃຕ້ ຄັ້ງທີ 3 ຢ່າງບໍ່ເປັນທາງການໃນລະຫວ່າງຮັບປະທານອາຫານທ່ຽງ (Lunch Retreat) ໂດຍຈະແລກປ່ຽນຄວາມຄິດຄວາມເຫັນໃນບັນຫາພູມມິພາກ ແລະ ບັນຫາລະຫວ່າງປະເທດທີ່ມີຄວາມສົນໃຈຮ່ວມກັນ.

ກອງປະຊຸມຜູ້ນຳກອບການຮ່ວມມືລຸ່ມແມ່ນ້ຳຂອງ-ເກົາຫຼີໃຕ້ ຄັ້ງທີ 1 (1st Mekong-ROK Summit) ເປັນການຮ່ວມມືລຸ່ມແມ່ນ້ຳຂອງກັບເກົາຫຼີໃຕ້ (Mekong-ROK) ໂດຍເປັນຂໍ້ລິເລີ່ມຂອງເກົາຫຼີໃຕ້ ປະກອບດ້ວຍສະມາຊິກ 6 ປະເທດຄື: ກຳປູເຈຍ, ສປປ.ລາວ, ມຽນມາ, ຫວຽດນາມ, ໄທ ແລະ ເກົາຫຼີໃຕ້ ໃນກອງປະຊຸມດັ່ງກ່າວ ມີຈຸດປະສົງເພື່ອສົ່ງເສີມການຮ່ວມມືໃນດ້ານການເມືອງ, ເສດຖະກິດ, ສັງຄົມ ແລະ ວັດທະນະທຳ ໂດຍໃຫ້ຄວາມສຳຄັນກັບການຮ່ວມມື ເພື່ອພັດທະນາລຸ່ມແມ່ນ້ຳຂອງຢ່າງຍືນຍົງ, ຈະມີງານຈັດສະແດງການຮ່ວມມື ກ່ຽວກັບຄວາມຫຼາກຫຼາຍທາງຊີວະພາບລະຫວ່າງປະເທດສະມາຊິກລຸ່ມແມ່ນ້ຳຂອງກັບເກົາຫຼີໃຕ້ (Special Exhibition on Biodiversity Cooperation between Mekong Countries and Korea) ອີກດ້ວຍ.

ໃນໂອກາດນີ້ເກົາຫຼີໃຕ້ ໄດ້ຈັດກິດຈະກຳຄູ່ຂະໜານກັບກອງປະຊຸມດັ່ງກ່າວໃນລັກສະນະການຈັດສະແດງ ເພື່ອນຳສະເໜີແນວທາງການພັດທະນາດ້ານດິຈິຕອນ ແລະ ນະວັດຕະກຳທີ່ສຳຄັນເຊັ່ນ: ໂຄງການ Busan Eco-Delta Smart City, ກອງປະຊຸມ ASEAN-ROK CEO Summit, ກອງປະຊຸມ 2019 ASEAN-ROK Culture Innovation Summut, ງານ ASEAN-ROK Innovation Showcaes 2019 ແລະ ກອງປະຊຸມ ASEAN-ROK Startup Summit.

ພາບ: ການຢ້ຽມຊົມໂຄງການ Busan Eco-Delta Smart City ຂອງຜູ້ນຳອາຊຽນ-ເກົາຫຼີໃຕ້

ພາບ: ການຢ້ຽມຊົມໂຄງການ Busan Eco-Delta Smart City ຂອງຜູ້ນຳອາຊຽນ-ເກົາຫຼີໃຕ້

ພາບ: ການຢ້ຽມຊົມໂຄງການ Busan Eco-Delta Smart City ຂອງຜູ້ນຳອາຊຽນ-ເກົາຫຼີໃຕ້


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube