ໄຊຍະບູລີຍັງມີແຜ່ນດິນໄຫວຕາມຕໍ່ເນື່ອງ 157 ຄັ້ງແລ້ວ, 25 ພະຈິກ 2019 ມີເຖິງຂະໜາດ 4.2 ຣິກເຕີ

ລາຍງານ 25 ພະຈິກ 2019, ໂດຍອີງຕາມການລາຍງານຂອງກົມອຸຕຸນິຍົມວິທະຍາ ປະເທດໄທ ເມື່ອເວລາ 16 ໂມງ 00 ນາທີ 25 ພະຈິກ 2019, ນັບຕັ້ງແຕ່ເຫດການແຜ່ນດິນໄຫວຢູ່ແຂວງໄຊຍະບູລີ ເມື່ອວັນທີ 20 ພະຈິກ 2019 ເວລາ 23:49 ນາທີ ມີເຫດແຜ່ນດິນໄຫວເກີດຈຳນວນ 13 ຄັ້ງ ຈົນເຖິງເວລາ 06 ໂມງ 50 ນາທີ ຂອງວັນທີ 21 ພະຈິກ 2016 ເກີດແຜ່ນດິນໄຫວຂະໜາດ 6.4 ຣິກເຕີ ຄວາມເລິກປະມານ 3 ກິໂລແມັດ ແລະ ໄດ້ເກີດມີແຜ່ນດິນໄຫວຕາມ (Aftershock) ຂະໜາດ 1.5-4.8 ຈຳນວນຫຼາຍກວ່າ 143 ຄັ້ງ ໃຫ້ເຮັດມີຍອດລວມການສັ່ນໄຫວແລ້ວກວ່າ 157 ຄັ້ງ.

ນອກຈາກນີ້, ເມື່ອເວລາ 13 ໂມງ 58 ນາທີ ຂອງວັນທີ 25 ພະຈິກ 2019 ນີ້, ຍັງໄດ້ມີແຜ່ນດິນໄຫວຕາມ ຂະໜາດ 4.2 ຣິກເຕີ, ຄວາມເລິກ 3 ກິໂລແມັດ ອີກດ້ວຍ.

ສຳລັບຄວາມເສຍຫາຍຕໍ່ເຫດການດັ່ງກ່າວ ຍັງບໍ່ມີລາຍງານຢ່າງເປັນທາງການເພີ່ມເຕີມເທື່ອ, ນອກຈາກ ຕາມໜັງສືລາຍງານຂອງເຈົ້າແຂວງໄຊຍະບູລີ ລະບັບເລກທີ 162/ຈຂ.ຊຍ, ລົງວັນທີ 21 ພະຈິກ 2019 ທີ່ລະບຸວ່າ: ສຳລັບຄວາມເສຍຫາຍຢູ່ບັນດາເມືອງເບື້ອງຕົ້ນມີດັ່ງນີ້: ເມືອງຫົງສາ ມີຄົນບາດເຈັບເລັກໜ້ອຍ 7 ຄົນ, 14 ບ້ານ, 89 ຫຼັງຄາເຮືອນ, ໃນນີ້ເປ່ເພສົມຄວນ 4 ຫຼັງ, ເປ່ເພເລັກໜ້ອຍ 85 ຫຼັງ, ໂຮງຮຽນເປ່ເພເລັກໜ້ອຍ 3 ແຫ່ງ, ໂຮງໝໍ 1 ແຫ່ງ, ອາຄານ 1 ແຫ່ງ, ຕະຫຼາດ 1 ແຫ່ງ, ວັດ 5 ແຫ່ງ, ເປ່ເພສົມຄວນມີຮ້ານບັນເທີງ 1 ແຫ່ງ, ເສັ້ນທາງປູຢາງແຕກແຫງ 1 ຈຸດ. ຢູ່ເມືອງໄຊສະຖານມີ 11 ບ້ານ ແລະ ສຸກສາລາ 1 ແຫ່ງ, ນອກນີ້, ຍັງມີສຳນັກງານຂອງແຂວງ ຈຳນວນໜຶ່ງໄດ້ຮັບຜົນກະທົບຈາກເຫດການດັ່ງກ່າວ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube