ແຜ່ນດິນໄຫວ 6.4 ຣິກເຕີ ທີ່ໄຊຍະບູລີ ມີມູນຄ່າຄວາມເສຍຫາຍກວ່າ 2 ຕື້ກີບ

ລາຍງານ 27 ພະຈິກ 2019, ອີງຕາມການລາຍງານຂອງກົມສື່ມວນຊົນໃຫ້ຮູ້ວ່າ: ທ່ານ ໜູພອນ ໄຊປັນຍາຈິດ ຫົວໜ້າພະແນກແຮງງານ ແລະ ສະຫວັດດີການສັງຄົມ, ກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ໄດ້ລາຍງານຕໍ່ທີມຂ່າວແຂວງໄຊຍະບູລີ ຕໍ່ກັບຄວາມເສຍຫາຍຈາກເຫດແຜ່ນດິນໄຫວ 6.4 ຣິກເຕີ ເມື່ອວັນທີ 21 ພະຈິກ 2019 ທີ່ຜ່ານມາ ວ່າໄດ້ສ້າງຄວາມເສຍຫາຍໃຫ້ແກ່ຊັບສິນຂອງລັດ ແລະ ພໍ່ແມ່ປະຊາຊົນຫຼາຍກວ່າມູນຄ່າຫຼາຍກວ່າ​ 2 ຕື້ກວ່າກີບ.

ໃນນັ້ນເມືອງຫົງສາມີຜົນກະທົບ 17 ບ້ານ 134 ຄອບຄົວ, ມີເຮືອນເສຍຫາຍ 71 ຫຼັງ, ເຄື່ອງໃຊ້ຄົວເຮືອນເສຍຫາຍ 24 ຄອບຄົວ, ເຮືອນເສຍຫາຍບໍ່ສາມາດແປງຄືນໄດ້ 7 ຫຼັງ, ເສຍຫາຍເລັກໜ້ອຍປະກອບມີ ໂຮງງານ 11 ຫຼັງ, ວັດ 12 ແຫ່ງ, ໂຮງໝໍຊຸມຊົນ 1 ຈຸດ, ຄົນໄດ້ຮັບບາດເຈັບເລັກໜ້ອຍ 7 ຄົນ, ຍິງ 5 ຄົນ, ມູນຄ່າເສຍຫາຍ 1 ຕື້ 141 ລ້ານກີບ.

ສ່ວນເມືອງໄຊສະຖານໄດ້ຮັບຜົນກະທົບ 18 ບ້ານມີ 169 ຄອບ, ສຳນັກງານອົງການຂອງລັດ ຈຳນວນ 8 ຫຼັງ, ມີຜູ້ໄດ້ຮັບບາດເຈັບເລັກໜ້ອຍ 3 ຄົນ, ມີເຮືອນເສຍຫາຍບໍ່ສາມາດຢູ່ອາໄສໄດ້ 16 ຫຼັງ, ເສຍຫາຍປານກາງ 29 ຫຼັງ, ເສຍຫາຍເລັກໜ້ອຍ 124 ຫຼັງ, ມີເສັ້ນທາງແຕກຍະຈຳນວນ 18 ຈຸດ ຍາວປະມານ 1 ກິໂລແມັດກວ່າ, ມີດິນສຳນັກງານຫ້ອງການ ດິນປຸກສ້າງແຕກຍະ 8 ຈຸດ, ລວມມູນຄ່າຄວາມເສຍຫາຍ 976 ລ້ານກວ່າກີບ.

ສຳລັບການຊ່ວຍເຫຼືອເບື້ອງຕົ້ນ, ທາງອົງການປົກຄອງເມືອງ ກໍ່ຄືຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ, ຂັ້ນເມືອງໄດ້ນຳເອົາກຳລັງ ປກຊ-ປກສ ພະນັກງານເຂົ້າໃຫ້ການຊ່ວຍເຫຼືອ, ສ້ອມແປງເຮືອນຊານໃຫ້ຄອບຄົວທີ່ໄດ້ຮັບຜົນກະທົບ ເພື່ອໃຫ້ເຂົາເຈົ້າໄດ້ມີທີ່ຢູ່ຊົ່ວຄາວ, ປັດຈຸບັນຕ້ອງການເຄື່ອງຊ່ວຍເຫຼືອທີ່ຈຳເປັນໃນເບື້ອງຕົ້ນເຊັ່ນ: ດິນບັອກ ຫຼື ດິນຈີ່, ຊີມັງ, ກະເບື້ອງ, ເຫຼັກເສັ້ນ, ເຫັກຕາປູ, ຫິນແຮ່ ແລະ ຊາຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube