ປ.ທຣຳ ລົງນາມກົດໝາຍສະໜັບສະໜູນຜູ້ປະທ້ວງຮົງກົງ, ຈີນເຕືອນຕ້ອງຍອມຮັບກັບສິ່ງທີ່ຈະຕາມມາ

ລາຍງານ 28 ພະຈິກ 2019, ທຳນຽບຂາວເຜີຍແຜ່ຖະແຫຼງການເມື່ອວັນພຸດ 27 ພະຈິກ ທີ່ຜ່ານມາ ວ່າທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ລົງນາມໃຫ້ກົດໝາຍວ່າດ້ວຍ ສິດທິມະນຸດ ແລະ ປະຊາທິປະໄຕຮົງກົງ ທີ່ສະພາສູງມີມະຕິຮັບຮອງກົດໝາຍສະບັບດັ່ງກ່າວ ເມື່ອວັນທີ 20 ພະຈິກ ທີ່ຜ່ານມາ ໃຫ້ມີຜົນບັງຄັບໃຊ້ຕັ້ງແຕ່ວັນທີ 27 ພະຈິກ 2019 ເປັນຕົ້ນໄປ ໂດຍເນື້ອໃນສຳຄັນຂອງກົດໝາຍດັ່ງກ່າວ ຄືກະຊວງການຕ່າງປະເທດ ສ.ອາເມຣິກາ ຕ້ອງເຮັດລາຍງານປະເມີນຢ່າງໜ້ອຍປີລະ 1 ຄັ້ງ ວ່າຮົງກົງຍັງສາມາດຮັກສາສະຖຽນລະພາບ ຂອງການເປັນເຂດບໍລິຫານພິເສດ ແລະ ໜຶ່ງໃນສູນກາງການເງິນຂອງທະວີບອາຊີ ເພື່ອໃຫ້ເປັນໄປຕາມກົດໝາຍນະໂຍບາຍ ສ.ອາເມຣິກາ-ຮົງກົງ 1992 ແລະ ຕັ້ງຢູ່ບົນພື້ນຖານຂອງຫຼັກການໜຶ່ງປະເທດ ສອງລະບອບ ແລະ ລັດຖະບານ ສ.ອາເມຣິກາ ອາດໃຊ້ມາດຕະການຂວໍ້າບາດຕໍ່ເຈົ້າໜ້າທີ່ຜູ້ໃດກໍ່ຕາມຂອງລັດຖະບານຈີນ ທີ່ມີພຶດຕິກຳແຊກແຊງວຽກງານພາຍໃນ ໂດຍສະເພາະເລື່ອງສິດທິມະນຸດພາຍໃນຮົງກົງ.

ຂະນະດຽວກັນ, ທ່ານ ໂດໂນ ທຣຳ ຍັງໄດ້ລົງນາມໃນກົດໝາຍຫ້າມຜູ້ປະກອບການຂອງ ສ.ອາເມຣິກາ ສົ່ງອອກສິນຄ້າທາງທະຫານ ແລະ ອຸປະກອນໃນການຄວບຄຸມຝູງຊົນ ທີ່ລວມເຖິງແກັດນ້ຳຕາ ແລະ ລູກປືນຢາງໃຫ້ແກ່ຕຳຫຼວດຮົງກົງ ເພື່ອປົກປ້ອງສິດທິມະນຸດໃຫ້ແກ່ພົນລະເມືອງຮົງກົງ, ເຊິ່ງຖະແຫຼງການຂອງທຳນຽບຂາວລະບຸວ່າ: ຜູ້ນຳ ສ.ອາເມຣິກາລົງນາມໃຫ້ກົດໝາຍມີຜົນບັງຄັບໃຊ້ ດ້ວຍຄວາມເຄົາລົບຕໍ່ທ່ານ ສີ ຈິ້ນຜິງ ປະທານປະເທດຈີນ ແລະ ປະຊາຊົນຮົງກົງທຸກທົ່ວໜ້າ ແລະ ດ້ວຍຄວາມຫວັງເປັນຢ່າງຍິ່ງວ່າບັນດາຂົ້ວການເມືອງທຸກຝ່າຍໃນ ສປ.ຈີນ ແລະ ຮົງກົງຈະສາມາດເຈລະຈາຍຸຕິຄວາມຂັດແຍ່ງ ເພື່ອນຳໄປສູ່ສັນຕິພາບ ແລະ ຄວາມຈະເລີນຮຸ່ງເຮືອງໃນໄລຍະຍາວສຳລັບທຸກພາກສ່ວນທີ່ກ່ຽວຂ້ອງ.

ໃນດ້ານຂອງຈີນ, ຍັງບໍ່ສະແດງທ່າທີຕໍ່ການທີ່ທ່ານ ໂດໂນ ທຣຳ ລົງນາມໃຫ້ກົດໝາຍກ່ຽວຂ້ອງກັບຮົງກົງມີຜົນບັງຄັບໃຊ້ຢ່າງເປັນທາງການ, ແຕ່ໃນອາທິດນີ້ກະຊວງການຕ່າງປະເທດຂອງຈີນ ໄດ້ເຊີນທ່ານ ເທີຣີ ແບຣນສະແຕັດ ເອກອັກຄະລັດຖະທູດ ສ.ອາເມຣິກາ ເຂົ້າປຶກສາຫາລືແລ້ວຢ່າງໜ້ອຍ 2 ຄັ້ງ ແລະ ພຽງບໍ່ພໍເທົ່າໃດວັນກ່ອນທີ່ຜູ້ນຳ ສ.ອາເມຣິກາລົງນາມໃນກົດໝາຍ ກະຊວງການຕ່າງປະເທດຈີນອອກຖະແຫຼງການວ່າ ລັດຖະບານ ສ.ອາເມຣິກາ ຕ້ອງຍອມຮັບກັບສິ່ງທີ່ຈະເກີດຂຶ້ນຕາມມາ, ເຊິ່ງການລົງນາມຂອງທ່ານ ໂດໂນ ທຣຳ ເກີດຂຶ້ນໃນເວລາດຽວກັບຜູ້ນຳ ສ.ອາເມຣິກາກຳລັງພະຍາຍາມບັນລຸຂໍ້ຕົກລົງການຄ້າຂັ້ນທຳອິດ ກັບລັດຖະບານຈີນໃຫ້ໄດ້ພາຍໃນທ້າຍປີນີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube