ຈີນປະນາມ ສ.ອາເມຣິກາວ່າ ມີເຈດຕະນາຮ້າຍ ແລະ ໜ້າລັງກຽດ ທີ່ສະໜັບສະໜູນຜູ້ປະທ້ວງຮົງກົງ

ລາຍງານ 28 ພະຈິກ 2019, ພຽງບໍ່ພໍເທົ່າໃດຊົ່ວໂມງ ພາຍຫຼັງທີ່ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ລົງນາມໃຫ້ກົດໝາຍວ່າດ້ວຍ ສິດທິມະນຸດ ແລະ ປະຊາທິປະໄຕຮົງກົງ ທີ່ສະພາສູງມີມະຕິຮັບຮອງເມື່ອວັນທີ 20 ພະຈິກ ທີ່ຜ່ານມາ ໃຫ້ມີຜົນບັງຄັບໃຊ້ຕັ້ງແຕ່ວັນທີ 27 ພະຈິກ 2019 ເປັນຕົ້ນໄປ, ລັດຖະບານຈີນ ມີປະຕິກິລິຍາຕອບໂຕ້ຕາມຄວາມຄາດໝາຍ ໂດຍກະຊວງການຕ່າງປະເທດຂອງຈີນ ອອກຖະແຫຼງການໃນວັນພະຫັດ 28 ພະຈິກນີ້ ມີເນື້ອໃນລະບຸວ່າ ລັດຖະບານຈີນພ້ອມດຳເນີນມາດຕະການຕອບໂຕ້ທີ່ໜັກແໜ້ນ ຕໍ່ທ່າທີດັ່ງກ່າວຂອງລັດຖະບານ ສ.ອາເມຣິກາ ທີ່ບໍ່ສາມາດຕີຄວາມໝາຍເປັນຢ່າງອື່ນໄດ້ ນອກຈາກເປັນເຈດຕະນາຮ້າຍ ແລະ ເປັນສິ່ງທີ່ໜ້າລັງກຽດຢ່າງຍິ່ງ.

ຂະນະດຽວກັນ, ການເຄື່ອນໄຫວຂອງ ສ.ອາເມຣິກາ ຍັງເປັນການລະເມີດກົດໝາຍລະຫວ່າງປະເທດຢ່າງຮ້າຍແຮງ ແລະ ຈະສົ່ງຜົນກະທົບຕໍ່ພື້ນຖານຂອງສາຍພົວພັນລະຫວ່າງປະເທດ ຈາກການທີ່ລັດຖະບານ ສ.ອາເມຣິກາສະໜັບສະໜູນໃຫ້ອາຊະຍາກອນຫົວຮຸນແຮງສ້າງຄວາມປັ່ນປວນ ແລະ ກໍ່ຄວາມວຸ້ນວາຍທີ່ເປັນອັນຕະລາຍຕໍ່ສັງຄົມ.

ໃນດ້ານຂອງສຳນັກງານຄະນະຜູ້ບໍລິຫານຮົງກົງ ອອກຖະແຫຼງການສະແດງຄວາມຜິດຫວັງເຊັ່ນກັນ ແລະ ເຕືອນວ່າກົດໝາຍສະບັບດັ່ງກ່າວຈະສົ່ງຜົນກະທົບຕໍ່ສາຍພົວພັນລະຫວ່າງ ສ.ອາເມຣິກາ-ຮົງກົງ ຈາກການທີ່ລັດຖະບານ ສ.ອາເມຣິກາ ອ້າງອີງກົດໝາຍນະໂຍບາຍ ສ.ອາເມຣິກາ-ຮົງກົງ ສະບັບປີ 1992 ເຊິ່ງເປັນພື້ນຖານຂອງການຮ່ວມມືລະຫວ່າງທັງສອງຝ່າຍໃນຫຼາຍດ້ານ ໂດຍສະເພາະການຄ້າ ທີ່ບໍ່ຈຳເປັນຕ້ອງຂຶຶ້ນກັບ ສປ.ຈີນ.

ເຊິ່ງສະພາສູງ ສ.ອາເມຣິກາ ຜ່ານຮ່າງກົດໝາຍດັ່ງກ່າວ ເມື່ອວັນທີ 20 ພະຈິກ ທີ່ຜ່ານມາ ມີເນື້ອໃນສຳຄັນຄືການທີ່ກະຊວງການຕ່າງປະເທດ ສ.ອາເມຣິກາ ຕ້ອງເຮັດລາຍງານປະເມີນຢ່າງໜ້ອຍປີລະ 1 ຄັ້ງ ວ່າຮົງກົງຍັງສາມາດຮັກສາສະຖານະຂອງການເປັນເຂດບໍລິຫານພິເສດ ແລະ ເປັນໜຶ່ງໃນສູນກາງການເງິນຂອງທະວີບອາຊີ ແລະ ຕັ້ງຢູ່ບົນພື້ນຖານຂອງຫຼັງການໜຶ່ງປະເທດ ສອງລະບອບ, ຫາກບໍ່ເປັນໄປຕາມນັ້ນ ລັດຖະບານ ສ.ອາເມຣິກາ ອາດໃຊ້ມາດຕະການຂວໍ້າບາດຕໍ່ເຈົ້າໜ້າທີ່ຜູ້ໃດກໍ່ຕາມຂອງລັດຖະບານຈີນ ທີ່ມີພຶດຕິກຳແຊກແຊງວຽກງານພາຍໃນຂອງຮົງກົງ ໂດຍສະເພາະເລື່ອງສິດທິມະນຸດ, ນອກຈາກນີ້ ຍັງຫ້າມຜູ້ປະກອບການຂອງ ສ.ອາເມຣິກາ ສົ່ງອອກສິນຄ້າທາງທະຫານ ແລະ ອຸປະກອນຄວບຄຸມຝູງຊົນ ທີ່ລວມເຖິງແກັດນ້ຳຕາ ແລະ ລູກປືນຢາງໃຫ້ແກ່ຕຳຫຼວດຮົງກົງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube