ທ່ານ ນາງ ອອງ ຊານ ຊູຈີ ນຳມຽນມາຂຶ້ນສານໂລກ ທີ່ຖືກຟ້ອງຄະດີຂ້າລ້າງເຜົ່າພັນໂຣຮິງຢາ

ລາຍງານ 11 ທັນວາ 2019, ຄະນະຕຸລາການສານຍຸຕິທຳລະຫວ່າງປະເທດ (ICJ) ທີ່ນະຄອນເຮັກ ປະເທດໂຮນລັງ ໄດ້ທຳການສືບສວນສອບສວນແບບເປີດເຜີຍນັດທຳອິດ ເມື່ອວັນຈັນ 10 ທັນວາ ທີ່ຜ່ານມາ ໃນຄະດີທີ່ລັດຖະບານກຳບີຍື່ນຟ້ອງ ເມື່ອວັນທີ 11 ພະຈິກ ທີ່ຜ່ານມາ ໃນນາມລັດສະມາຊິກອົງການການຮ່ວມມືອິດສະລາມ (OIC) ແລະ ໃນຖານະຕົວແທນຂອງຊາວໂຣຮິງຢາ ວ່າລັດຖະບານມຽນມາລະເມີດອະນຸສັນຍາ ວ່າດ້ວຍການປ້ອງກັນ ແລະ ລົງໂທດຄວາມຜິດອາຍາຖານຂ້າລ້າງເຜົ່າພັນ ທີ່ສະມາຊິກສະຫະປະຊາຊາດ ລວມເຖິງກຳບີ ແລະ ມຽນມາຮ່ວມລົງນາມ ເມື່ອເດືອນທັນວາ 1948 ຈາກການທີ່ກອງທັບມຽນມາປະຕິບັດການຢ່າງໂຫດຮ້າຍ ແລະ ປ່າເຖື່ອນ ຢູ່ລັດຍະໄຂ່ ເມື່ອກາງປີ 2017 ສົ່ງຜົນໃຫ້ຊາວໂຣຮິງຢາຫຼາຍກວ່າ 740,000 ຄົນຕ້ອງລີ້ໄພໄປຍັງປະເທດບັງກະລາເທດ.

ເຊິ່ງການສືບສວນສອບສວນຈະໃຊ້ເວລາ 3 ວັນ ໂດຍເມື່ອວັນຈັນ ທີ່ຜ່ານມາເປັນມື້ທຳອິດ ເປັນກຳນົດການທີ່ກຳບີເຊິ່ງເປັນຝ່າຍໂຈດໄດ້ຊີ້ແຈງກ່ອນ ເຊິ່ງທ່ານ ອາບູບາຄາ ທຳບາດູ ລັດຖະມົນຕີກະຊວງຍຸຕິທຳຂອງກຳບີ ໃນຖານະຫົວໜ້າຝ່າຍກົດໝາຍຂອງລັດຖະບານກຳບີ ກ່າວວ່າມຽນມາຕ້ອງຍຸຕິເຂັ່ນຂ້າຜູ້ອື່ນຢ່າງເຢັນຊາ ແລະ ໄຮ້ສະຕິ ແລະ ຍຸຕິຂ້າລ້າງເຜົ່າພັນພົນລະເມືອງຂອງຕົນເອງ ພ້ອມທັງຮຽກຮ້ອງໃຫ້ ICJ ປະກາດວ່າສະຖານະການດ້ານຄວາມໝັ້ນຄົງໃນລັດຍະໄຂ່ ເປັນການຂ້າລ້າງເຜົ່າພັນ, ຂະນະທີ່ທ່ານ ແອນດຣູ ເລີເວນສະຕາຍ ທະນານຄວາມຂອງລັດຖະບານກຳບີ ສະແດງຫຼັກຖານທີ່ລວມເຖິງບົດສົນທະນາກັບຜູ້ລີ້ໄພຊາວໂຣຮິງຢາ ວ່າກອງທັບມຽນມາກຳທະກຳຢ່າງໂຫດຮ້າຍ ແລະ ປ່າເຖື່ອນຕໍ່ຊາວໂຣຮິງຢາ ທີ່ເຂົ້າຂ່າຍເປັນການຂ້າລ້າງເຜົ່າພັນໂດຍເຈດຕະນາ.

ຂະນະທີ່ຊ່ວງສຳຄັນຂອງການພິຈາລະນາຄະດີນີ້ຢູ່ທີ່ວັນພຸດ 11 ທັນວານີ້ ຕາມເວລາທ້ອງຖິ່ນ ເຊິ່ງເປັນກຳນົດການທີ່ລັດຖະບານມຽນມາຈະໃຫ້ການຕໍ່ໜ້າຄະນະຕຸລາການຂອງ ICJ ນຳໂດຍທ່ານ ນາງ ອອງ ຊານ ຊູຈີ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດມຽນມາ ເຊິ່ງທຸກຝ່າຍເຊື່ອວ່າທ່ານນາງ ຈະກ່າວຫຼັກລ້າງການກ່າວຫາທັງໝົດຂອງຝ່າຍໂຈດ.

ເຊິ່ງສະຖານະການທີ່ ICJ ເກີດຂຶ້ນໃນວັນດຽວກັບກະຊວງການເງິນຂອງສະຫະລັດ ອາເມຣິກາ ປະກາດເພີ່ມມາດຕະການຂວໍ້າບາດຕໍ່ເຈົ້າໜ້າທີ່ລະດັບສູງ 4 ທ່ານຂອງກອງທັບມຽນມາ ແລະ ປະຊາຊົນອີກ 14 ຄົນຖານມີສ່ວນກ່ຽວຂ້ອງກັບການລະເມີດສິດທິມະນຸດຊາວໂຣຮິງຢາ ໃນລັດຍະໄຂ່, ເຊິ່ງໜຶ່ງໃນຜູ້ທີ່ມີລາຍຊື່ປາກົດໃນບັນຊີດຳຄືທ່ານ ພົນເອກ ມິນ ອ່ອງ ຫຼ່າຍ ຜູ້ບັນຊາການທະຫານສູງສຸດຂອງມຽນມາ ທີ່ເຄີຍຖືກລັດຖະບານ ສ.ອາເມຣິກາ ຂວ້ຳບາດຄັ້ງທຳອິດ ເມື່ອເດືອນກໍລະກົດ ທີ່ຜ່ານມາ.

ເຖິງຢ່າງໃດກໍ່ຕາມປະຊາຊົນມຽນມາກຳນວນຫຼາຍ ກໍ່ໄດ້ຮ່ວມກັນເດີນຂະບວນໄປຕາມຖະໜົນຫົນທາງ ໃນນະຄອນຫຼວງເນປີດໍ ແລະ ຫົວເມືອງສຳຄັນໂດຍການຊູຮູບພາບ ແລະ ປ້າຍຂໍ້ຄວາມສະໜັບສະໜູນທ່ານ ນາງ ອອງ ຊານ ຊູຈີ ເພື່ອໃຫ້ກຳລັງໃຈ, ເຊິ່ງກິດຈະກຳດັ່ງກ່າວ ໄດ້ເກີດຂຶ້ນມາຢ່າງຕໍ່ເນື່ອງຕັ້ງແຕ່ທ້າຍເດືອນທີ່ຜ່ານມາ.