ທ່ານ ນາງ ຊູຈີ ວ່າມຽນມາບໍ່ໄດ້ຂ້າລ້າງເຜົ່າພັນໂຣຮິງຢາ ເພາະນັ້ນຄືການຮັກສາຄວາມໝັ້ນຄົງຂອງຊາດ

ລາຍງານ 12 ທັນວາ 2019, ທ່ານ ນາງ ອອງ ຊານ ຊູຈີ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດມຽນມາ ໃນຖານະຫົວໜ້າຄະນະຝ່າຍກົດໝາຍຂອງລັດຖະບານມຽນມາ ໃຫ້ການຕໍ່ຄະນະຕຸລາການສານຍຸຕິທຳລະຫວ່າງປະເທດ (ICJ) ທີ່ນະຄອນເຮັກ ປະເທດໂຮນລັງ ເມື່ອວັນພຸດ 11 ທັນວາ ທີ່ຜ່ານມາ ໃນຄະດີທີ່ລັດຖະບານກຳບີຍື່ນຟ້ອງ ໃນນາມລັດສະມາຊິກອົງການການຮ່ວມມືອິດສະລາມ (OIC) ແລະ ໃນຖານະຕົວແທນຂອງຊາວໂຣຮິງຢາ ວ່າລັດຖະບານມຽນມາລະເມີດອະນຸສັນຍາ ວ່າດ້ວຍການປ້ອງກັນ ແລະ ລົງໂທດຄວາມຜິດອາຍາຖານຂ້າລ້າງເຜົ່າພັນ ທີ່ສະມາຊິກສະຫະປະຊາຊາດ ລວມເຖິງກຳບີ ແລະ ມຽນມາຮ່ວມລົງນາມ ເມື່ອເດືອນທັນວາ 1948 ຈາກການທີ່ກອງທັບມຽນມາປະຕິບັດການຢ່າງໂຫດຮ້າຍ ແລະ ປ່າເຖື່ອນໃນລັດຍະໄຂ່ ເມື່ອກາງປີ 2017 ສົ່ງຜົນໃຫ້ຊາວໂຣຮິງຢາຫຼາຍກວ່າ 740,000 ຄົນຕ້ອງລີ້ໄພໄປຍັງປະເທດບັງກະລາເທດ.

ກຳບີ ເຊິ່ງເປັນຝ່າຍໂຈດ ໄດ້ກ່າວເມື່ອວັນອັງຄານ 10 ທັນວາ ທີ່ຜ່ານມາ ວ່າລັດຖະບານ ແລະ ກອງທັບມຽນມາຢູ່ເບື້ອງຫຼັງ ການເຂັ່ນຂ້າພົນລະເມືອງຕົນເອງໃນລັດຍະໄຂ່ ແລະ ຮຽກຮ້ອງໃຫ້ ICJ ປະກາດວ່າສະຖານະການຄວາມຮຸນແຮງ ແລະ ຄວາມບໍ່ສະຫງົບທີ່ເກີດຂຶ້ນຄືດັ່ງກ່າວຂອງມຽນມາ ອັນສົ່ງຜົນກະທົບຕໍ່ຊາວໂຣຮິງຢາໂດຍກົງເປັນການຂ້າລ້າງເຜົ່າພັນ.

ເຖີງຢ່າງໃດກໍ່ຕາມ, ທ່ານ ນາງ ອອງ ຊານ ຊູຈີ ກ່າວຕໍ່ສານໂດຍມີເນື້ອໃນສຳຄັນຕອນໜຶ່ງວ່າ ທ່ານ ນາງ ຍອມຮັບວ່າກອງທັບມຽນມາອາດມີການໃຊ້ກຳລັງທີ່ບໍ່ເໝາະສົມແດ່ ແຕ່ກໍ່ເພື່ອຮັກສາສະຖຽນລະພາບຂອງຊາດ ຈຶ່ງບໍ່ອາດນຳມາອ້າງເປັນຫຼັກຖານທີ່ສາມາດພິສູດໄດ້ວ່າ ກອງທັບມຽນມາມີເຈດຕະນາກວາດລ້າງຊາວໂຣຮິງຢາ ເຖິງຂັ້ນຂ້າລ້າງເຜົ່າພັນ, ທ່ານ ນາງ ກ່າວຕໍ່ໄປອີກວ່າ ເປັນເລື່ອງທີ່ໜ້າເສົ້າໃຈຢ່າງຍິ່ງ ທີ່ລັດຖະບານກຳບີຍື່ນຟ້ອງລັດຖະບານມຽນມາຕໍ່ສານ ດ້ວຍຄວາມເຂົ້າໃຈທີ່ຄາດເຄື່ອນ ແລະ ບໍ່ຄົບຖ້ວນຕໍ່ສະຖານະການທີ່ແທ້ຈິງໃນລັດຍະໄຂ່.

ຂະນະດຽວຍກັນ, ທ່ານ ນາງ ອອງ ຊານ ຊູຈີ ກ່າວອີກວ່າ ທັງລັດຖະບານ ແລະ ກອງທັບຕ່າງກໍ່ຈັດຕັ້ງຄະນະປະຕິບັດງານອິດສະຫຼະ ເພື່ອສືບສວນສອບສວນຂໍ້ກ່າວຫາທັງໝົດ ທີ່ກ່ຽວຂ້ອງກັບສະຖານະການໃນລັດຍະໄຂ່ ດ້ວຍຄວາມເປັນທຳ ແລະ ພາກລັດມີນະໂຍບາຍເນັ້ນການສ້າງຄວາມສາມັກຄີລະຫວ່າງກຸ່ມຊົນຊາດຊົນເຜົ່າຕະຫຼອດມາ, ພ້ອມທັງກ່າວຕໍ່ວ່າ ລັດຖະບານກຳບີກ່າວຫາວ່າກອງທັບ ແລະ ລັດຖະບານມຽນມາລະເມີດອະນຸສັນຍາ ວ່າດ້ວຍການປ້ອງກັນ ແລະ ລົງໂທດຄວາມຜິດອາຍາຖານຂ້າລ້າງເຜົ່າພັນ ສະບັບປີ 1948 ແຕ່ໃນທາງກັບກັນ ICJ ເຊິ່ງກໍ່ຕັ້ງກອ່ນການບັນຍັດສົນທິສັນຍາສະບັບນີ້ພຽງ 2 ປີ ບໍ່ເຄີຍຢືນຢັນວ່າສົງຄາມຢູໂກສະລາວີ ແລະ ສົງຄາມໂຄໂຊໂວ ເຊິ່ງມີຜູ້ເສຍຊີວິດລວມກັນຫຼາຍກວ່າ 100,000 ຄົນເປັນການຂ້າລ້າງເຜົ່າພັນ.