ສ.ອາເມຣິກາ ຂຶ້ນບັນຊີດຳ 2 ບຸກຄົນໃກ້ຊິດສົມເດັດ ຮຸນ ເຊນ ນາຍົກລັດຖະມົນຕີກຳປູເຈຍ

ລາຍງານ 12 ທັນວາ 2019, ລັດຖະບານສະຫະລັດ ອາເມຣິກາຂຶ້ນບັນຊີດຳ 2 ບຸກຄົນໃກ້ຊິດສົມເດັດ ຮຸນ ເຊນ ນາຍົກລັດຖະມົນຕີກຳປູເຈຍ, ໂດຍກະຊວງການເງິນ ສ.ອາເມຣິກາ ອອກຖະແຫຼງການເມື່ອວັນອັງຄານ 10 ທັນວາ ທີ່ຜ່ານມາ ຂຶ້ນບັນຊີດຳພົນເອກ ກຸມ ກິມ ອະດີດເສນາທິການໃຫຍ່ກອງທັບປະຊາຊົນກຳປູເຈຍ ຈາກການໃຊ້ອິດທິພົນທາງທະຫານ ເພື່ອສ້າງຜົນປະໂຫຍດສ່ວນຕົວ ໃນໂຄງການດ້ານອະສັງຫາລິມະຊັບ ທີ່ແຂວງເກາະກົງ ທາງພາກຕາເວັນຕົກສຽງໃຕ້ຂອງປະເທດ ແລະ ການມີຄວາມສຳພັນທາງທຸລະກິດທີ່ມີເງື່ອນງຳ ກັບລັດວິສາຫະກິດດ້ານອະສັງຫາລິມະຊັບຂອງຈີນ ທີ່ໄດ້ຮັບສຳປະທານໃຫ້ພັດທະນາໂຄງການດັ່ງກ່າວ, ໂດຍລາຍງານຂອງລັດຖະບານ ສ.ອາເມຣິກາ ລະບຸອີກວ່າ ພົນເອກ ກຸນ ກິມ ຖືກປົດອອກຈາກຕຳແໜ່ງໃນເວລາຕໍ່ມາ ບໍ່ແມ່ນດ້ວຍເຫດຜົນກ່ຽວຂ້ອງກັບວຽກງານທາງລັດຖະການ ແຕ່ເປັນເພາະການຂັດຜົນປະໂຫຍດກັບເຈົ້າໜ້າທີ່ໃນລັດຖະບານຂອງສົມເດັດ ຮຸນ ເຊນ.

ເຊິ່ງມາດຕາການຂວໍ້າບາດຕໍ່ພົນເອກ ກຸນ ກິມ ຄວບຄຸມໄປເຖິງສະມາຊິກໃນຄອບຄົວຂອງທະຫານຊັ້ນຜູ້ໃຫຍ່ອີກ 3 ຄົນ ແລະ ບໍລິສັດອີກ 5 ແຫ່ງ, ນອກຈາກນີ້ ກະຊວງການເງິນ ສ.ອາເມຣິກາ ຍັງຂຶ້ນບັນຊີດຳທ່ານ ໄຕຣ ພາບ ມະຫາເສດຖີນັກທຸລະກິດທີ່ເປັນສະມາຊິກພັກປະຊາຊົນກຳປູເຈຍ ແລະ ສະຖານປະກອບການອີກ 11 ແຫ່ງທີ່ຈົດທະບຽນໃນຊື່ທ່ານ ໄຕຣ ພາບ ຖືກຂຶ້ນບັນຊີດຳເຊັ່ນກັນ.

ຂະນະທີ່ບຸກຄົນທັງສອງຍັງບໍ່ອອກມາສະແດງຄວາມຄິດເຫັນຢ່າງເປັນທາງການ ຕໍ່ກັບສິ່ງທີ່ເກີດຂຶ້ນ ແຕ່ກະຊວງການຕ່າງປະເທດກຳປູເຈຍອອກຖະແຫຼງການປະນາມວ່າ ເປັນການລ່ວງລະເມີດພື້ນຖານຄວາມສຳພັນລະຫວ່າງປະເທດຢ່າງຮ້າຍແຮງ ດ້ວຍການແຊກແຊງຄວາມເທົ່າທຽມແຫ່ງລັດ ແລະ ວຽກງານພາຍໃນຂອງລັດອະທິປະໄຕ, ໃນດ້ານຂອງທ່ານ ສົກ ອີສານ ໂຄສົກພັກປະຊາຊົນກຳປູເຈຍ ກ່າວວ່າມາດຕະການຂວ້ຳບາດດັ່ງກ່າວ ບໍ່ມີຜົນໃນທາງປະຕິບັດ ແລະ ເປັນການສະໜັບສະໜູນຝ່າຍຕໍ່ຕ້ານລັດຖະບານເທົ່ານັ້ນ.

ນອກຈາກນີ້, ການເຄື່ອນໄຫວຂອງ ສ.ອາເມຣິກາ ຍັງເກີດຂຶ້ນກ່ອນຄົບກຳນົດເສັ້ນຕາຍ 30 ວັນ ເຊິ່ງຄະນະກຳມາທິການເອີຣົບ ປະກາດເມື່ອວັນທີ 12 ພະຈິກ ທີ່ຜ່ານມາ ໃຫ້ລັດຖະບານກຳປູເຈຍແກ້ໄຂບັນຫາສິດທິມະນຸດໃນປະເທດ ໃຫ້ຢູ່ໃນລະດັບທີ່ໜ້າເພິ່ງພໍໃຈ ເພື່ອຮັກສາສະຖານະພິເສດທາງການຄ້າກັບສະຫະພາບເອີຣົບໄວ້ຕໍ່ໄປ ເຊິ່ງມີທ່າອ່ຽງສູງທີ່ກຳປູເຈຍຈະສູນເສຍສິດທິພິເສດດັ່ງກ່າວ.