ມຽນມາ ຮຽກຮ້ອງສານໂລກໃຫ້ຍົກຟ້ອງຄະດີຂ້າລ້າງເຜົ່າພັນໂຣຮິງຢາ ພ້ອມຢືນຢັນວ່ານັ້ນຄືວຽກງານພາຍໃນ

ລາຍງານ 13 ທັນວາ 2019, ທ່ານ ນາງ ອອງ ຊານ ຊູຈີ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດມຽນມາ ກ່າວໃນຕອນໜຶ່ງຂອງການໃຫ້ການວັນສຸດທ້າຍ ຕໍ່ຄະນະຕຸລາການສານຍຸຕິທຳລະຫວ່າງປະເທດ (ICJ) ທີ່ນະຄອນເຮັກ ປະເທດໂຮນລັງ ເມື່ອວັນພະຫັດ 12 ທັນວາ ທີ່ຜ່ານມາ ວ່າຂະບວນການປະນີປະນອມ ແລະ ການສ້າງຄວາມສາມັກຄີໃນລັດຍະໄຂ່ຂອງມຽນມາ ຈະຄອນແຄນຫາກ ICJ ມີມະຕິໃຫ້ເດີນໜ້າການສືບສວນສອບສວນຂໍ້ກ່າວຫາທີ່ລັດຖະບານກຳບີ ຍື່ນຟ້ອງລັດຖະບານມຽນມາລະເມີດສົນທິສັນຍາ ວ່າດ້ວຍການປ້ອງກັນ ແລະ ລົງໂທດຄວາມຜິດອາຍາຖານຂ້າລ້າງເຜົ່າພັນ ສະບັບປີ 1948 ຂອງສະຫະປະຊາຊາດ ຈາກການທີ່ກອງທັບມຽນມາປະຕິບັດການຢ່າງໂຫດຮ້າຍ ແລະ ປ່າເຖື່ອນໃນລັດຍະໄຂ່ ເມື່ອກາງປີ 2017 ສົ່ງຜົນໃຫ້ຊາວໂຣຮິງຢາຫຼາຍກວ່າ 740,000 ຕ້ອງລີ້ໄພໄປຍັງປະເທດບັງກະລາເທດ.

ເຊິ່ງທ່ານ ນາງ ອອງ ຊານ ຊູຈີ ໄດ້ສະແດງພາບຖ່າຍທີ່ເປັນຫຼັກຖານຂອງຄວາມປອງດອງສາມັກຄີ ໃນລັດຍະໄຂ່ຕໍ່ສານ ທີ່ລວມເຖິງການແຂ່ງຂັນບານເຕະມິດຕະພາບ ເພື່ອເພີ່ມນ້ຳໜັກໃຫ້ກັບຄຳກ່າວຂອງທ່ານ ນາງ, ທີ່ໄດ້ຮຽກຮ້ອງເຖິງວິໄສທັດອັນສະຫຼາດສ່ອງໃສຂອງຄະນະຕຸລາການ ໃນການຮ່ວມກັນສ້າງຄວາມເປັນເອກະພາບ ບົນພື້ນຖານຄວາມຫຼາກຫຼາຍທາງເຊື້ອຊາດ ແລະ ສາສະໜາໃນລັດຍະໄຂ່ ພ້ອມທັງຢືນຢັນວ່າລັດຖະບານມຽນມາບໍ່ເຄີຍນິ່ງນອນໃຈ ທີ່ຈະສະແຫວງຫາທາງອອກຂອງຄວາມຂັດແຍ່ງນີ້ ທີ່ເປັນວຽກງານພາຍໃນປະເທດ.

ໃນດ້ານຂອງທ່ານ ຟິລິບ ແຊນສ ທະນາຍຄວາມຂອງລັດຖະບານກຳບີ ກ່າວຖະແຫຼງປິດຄຳໃຫ້ການ ດ້ວຍການປະນາມທ່ານ ນາງ ອອງ ຊານ ຊູຈີ ທີ່ນິ້ງນອນໃຈຕໍ່ບັນຫາ ອັນເປັນສິ່ງທີ່ສຳຄັນຫຼາຍກວ່າຄຳເວົ້າ ແລະ ຕຳນິທີ່ບໍ່ກ່າວເຖິງການລະເມີດສິດທິມະນຸດ ເຊິ່ງເກີດຂຶ້ນຢ່າງເປີດເຜີຍ, ໂດຍການທີ່ກອງທັບປະຕິບັດການໃນລັດຍະໄຂ່ນັ້ນ ແມ່ນມີເຈດຕະນາຂ້າລ້າງເຜົ່າພັນ ແລະ ຄັດຄ້ານການທີ່ທ່ານ ນາງ ອອງ ຊານ ຊູຈີ ຢືນຢັນວ່າກອງທັບມຽນມາຈະຕັ້ງຄະນະກຳມະການສືບສວນສອບສວນຂໍ້ກ່າວຫາທັງໝົດໃນລັດຍະໄຂ່ດ້ວຍຕົນເອງ.

ເຊິ່ງລັດຖະບານກຳບີຮຽກຮ້ອງ ICJ ໃຫ້ປະກາດສະຖານະການຄວາມບໍ່ສະຫງົບໃນລັດຍະໄຂ່ ຄືການຂ້າລ້າງເຜົ່າພັນ ແລະ ອອກມາດຕະການຄຸ້ມຄອງຊາວໂຣຮິງຢາ, ຂະນະທີ່ທ່ານ ນາງ ອອງ ຊານ ຊູຈີ ແລະ ຄະນະຄັດຄ້ານວ່າ ກອງທັບມຽນມາບໍ່ມີເຈດຕະນາເຖິງຂັ້ນນັ້ນ ແລະ ວິຈານການກ່າວຫາຂອງກຳບີວ່າ ບໍ່ມີຫຼັກຖານ ແລະ ຂາດຄວາມເຂົ້າໃຈທີ່ຖືກຕ້ອງແທ້ຈິງຕໍ່ປະຫວັດສາດຂອງມຽນມາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube