ສ.ອາເມຣິກາ ທົດລອງຂີປະນາວຸດພິໄສກາງ ພາຍຫຼັງຖອນຕົວຈາກ INF ກັບລັດເຊຍ

ລາຍງານ 13 ທັນວາ 2019, ກະຊວງປ້ອງກັນປະເທດສະຫະລັດ ອາເມຣິກາ ອອກຖະແຫຼງການ ເລື່ອງການທົດລອງປະສິດທິພາບຂອງຂີປະນາວຸດຕົ້ນແບບພິໄສກາງ ແບບຍິງຈາກພື້ນດິນ ທີ່ມີພິໄສການຍິງປະມານ 500 ກິໂລແມັດ, ໂດຍການທົດລອງຄັ້ງນີ້ເກີດຂຶ້ນຢູ່ໃນຖານທັບອາກາດແວນແດນເບີກ ທາງທິດໃຕ້ຂອງລັດຄາລິຟໍເນຍ ເມື່ອຕອນເຊົ້າຂອງວັນພະຫັດ 12 ທັນວາ ທີ່ຜ່ານມາ ຕາມເວລາທ້ອງຖິ່ນ, ເຊິ່ງກະຊວງປ້ອງກັນປະເທດ ສ.ອາເມຣິກາ ລະບຸວ່າ ຂໍ້ມູນທັງໝົດຈາກການທົດລອງຄັ້ງນີ້ ຈະມີປະໂຫຍດຫຼາຍຕໍ່ການພັດທະນາໂຄງການຂີປະນາວຸດພິໄສກາງຂອງ ສ.ອາເມຣິກາ ໃນອະນາຄົດ.

ການເຄື່ອນໄຫວດັ່ງກ່າວ ເກີດຂຶ້ນທ່າມກາງອະນາຄົດທີ່ບໍ່ແນ່ນອນຂອງການຮ່ວມມືດ້ານອາວຸດລະຫວ່າງ ສ.ອາເມຣິກາ ແລະ ລັດເຊຍ ເຊິ່ງເຫຼືອສົນທິສັນຍາການຮ່ວມມືທີ່ກ່ຽວຂ້ອງພຽງສະບັບດຽວຄື ສົນທິສັນຍາວ່າດ້ວຍການຫຼຸດຈຳນວນອາວຸດນິວເຄຼຍ ໃນຊື່ New Start ເຊິ່ງຈະຄົບກຳນົດອາຍຸການມີຜົນບັງຄັບໃຊ້ 10 ປີ ໃນເດືອນກຸມພາ 2021 ແລະ ລັດຖະບານ ສ.ອາເມຣິກາ ຍັງບໍ່ມີທ່າທີຈິງຈັງວ່າຈະລົງນາມຕໍ່ອາຍຸສົນທິສັນຍາສະບັບດັ່ງກ່າວ, ເຖິງແມ່ນວ່າລັດຖະບານລັດເຊຍຢືນຢັນວ່າຄວນເກີດຂຶ້ນ ເພື່ອຫຼີກລ້ຽງການເຂົ້າສູ່ສະໜາມການແຂ່ງຂັນດ້ານອາວຸດຄັ້ງໃໝ່ ແຕ່ ສ.ອາເມຣິກາ ມີຂໍ້ສະເໜີວ່າຕ້ອງການໃຫ້ຈີນເຂົ້າຮ່ວມການເຈລະຈາ ເພື່ອຂະຫຍາຍຂອບເຂດຂອງສົນທິສັນຍາສະບັນນີ້.

ໃນດ້ານຂອງຈີນ, ທ່ານ ນາງ ຫົວ ຊຸນຫຍິງ ໂຄສົກກະຊວງການຕ່າງປະເທດຂອງຈີນ ໄດ້ຖະແຫຼງເມື່ອວັນ 11 ທັນວາ ທີ່ຜ່ານມາວ່າ ຈີນຂໍສະແດງຈຸດຢືນທີ່ຊັດເຈນວ່າ ບໍ່ຕ້ອງການເຂົ້າຮ່ວມເປັນສ່ວນໜຶ່ງຂອງກອບການຮ່ວມມືວ່າດ້ວຍການຫຼຸດຈຳນວນອາວຸດນິວເຄຼຍລະຫວ່າງ ສ.ອາເມຣິກາ ແລະ ລັດເຊຍ.

ເຊິ່ງປີນີ້, ສ.ອາເມຣິກາ ແລະ ລັດເຊຍຕ່າງກໍ່ຖອນຕົວອອກຈາກສົນທິສັນຍາອາວຸດນິວເຄຼຍພິໄສກາງ (INF) ທີ່ລົງນາມຮ່ວມກັນເມື່ອປີ 1987 ເຊິ່ງເປັນໄລຍະທ້າຍຂອງສົງຄາມເຢັນ, ໂດຍເນື້ອໃນສຳຄັນຂອງຂໍ້ຕົກລົງ INF ຄືການຫ້າມທັງສອງປະເທດຜະລິດ ແລະ ທົດລອງຂີປະນາວຸດທີ່ມີພິໄສການຍິງລະຫວ່າງ 500-5,500 ກິໂລແມັດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube