ປາອົງຄະຊາດຈຳນວນຫຼາຍ ເກີຍຫາດຕາຍທີ່ ສ.ອາເມຣິກາ ພາຍຫຼັງຖືກພາຍຸພັດ

ລາຍງານ 14 ທັນວາ 2019, ໃນສື່ອອນລາຍຕ່າງປະເທດມີການເລີຍແຜ່ພາບ “ປາອົງຄະຊາດ” ຂຶ້ນມາເກີຍຫາດທະເລຕາຍເປັນຈຳນວນຫຼາຍໃນສະຫະລັດ ອາເມຣິກາ.

ອີງຕາມການລາຍງານຂອງສື່ຕ່າງປະເທດໃຫ້ຮູ້ວ່າ: ສິ່ງມີຊີວິດຊະນິດດັ່ງກ່າວເປັນໜອນທະເລຊະນິດໜຶ່ງ ມີຊື່ພາສາອັງກິດວ່າ fat innkeeper worms ແຕ່ຄົນນິຍົມຮຽກວ່າ “ປາອົງຄະຊາດ” ເພາະມີລັກສະນະຄ້າຍຄືກັບອະໄວຍະວະເພດຊາດ, ເຊິ່ງພວກມັນຖືກພາຍຸພັດ ຂຶ້ນມາເກີຍຫາດຕາຍ ທີ່ຫາດເດຼັກ ລັດຄາລິຟໍເນຍ ເມື່ອວັນທີ 6 ທັນວາ 2019 ທີ່ຜ່ານມາ.

ປາ ຫຼື ໝອນຊະນິດນີ້ແມ່ນສາມາດກິນໄດ້ ແລະ ຊາວອາຊີຕາເວັນອອກແມ່ນນິຍົມນຳມາປະກອບອາຫານ ໂດຍສະເພາະແມ່ນຈີນ, ຍີ່ປຸ່ນ ແລະ ເກົາຫຼີ ເພາະເຊື່ອວ່າຊ່ວຍເສີມສ້າງສະມັດທະພາບທາງເພດ.