ສ.ອາເມຣິກາ-ຈີນ ບັນລຸຂໍ້ຕົກລົງຂັ້ນທຳອິດ ໃນການລະງັບການຂຶ້ນພາສີສິນຄ້າລະຫວ່າງກັນ

ລາຍງານ 14 ທັນວາ 2019, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ປະກາດເມື່ອວັນສຸກ 13 ທັນວາ ທີ່ຜ່ານມາ ລະງັບການຂຶ້ນພາສີ 15% ຕໍ່ສິນຄ້າຈາກຈີນ ມູນຄ່າ 160,000 ລ້ານໂດລາສະຫະລັດ ເຊິ່ງຕາມກຳນົດຈະມີຜົນບັງຄັບໃຊ້ໃນວັນອາທິດ 15 ທັນວານີ້ ແລະ ຫຼຸດກຳແພງພາສີຕໍ່ສິນຄ້າຈາກຈີນມູນຄ່າ 120,000 ລ້ານໂດລາສະຫະລັດ ຈາກ 15% ເຊິ່ງມີຜົນບັງຄັບໃຊ້ເມື່ອວັນທີ 15 ກັນຍາ ທີ່ຜ່ານ ລົງມາ 7.5%, ຂະນະດຽວກັນ ທ່ານ ໂດໂນ ທຣຳ ຍັງກ່າວອີກວ່າຈີນຈະເພີ່ມການນຳເຂົ້າສິນຄ້າກະສິກຳຂອງ ສ.ອາເມຣິກາເປັນຈຳນວນມະຫາສານ ໂດຍແນວທາງດັ່ງກ່າວເປັນໄປຕາມຂໍ້ຕົກລົງເບື້ອງຕົ້ນ ໃນການຫຼຸດຜ່ອນຄວາມຮຸນແຮງຕໍ່ຂໍ້ຂັດແຍ່ງທາງການຄ້າລະຫວ່າງທັງສອງປະເທດ ທີ່ແກ່ຍາວມາໄດ້ເກືອບ 2 ປີແລ້ວ.

ການປະກາດຂອງທ່ານ ໂດໂນ ທຣຳ ເກີດຂຶ້ນພາຍຫຼັງທີ່ທ່ານ ຫຼຽວ ໝິນ ລັດຖະມົນຕີກະຊວງການຄ້າຂອງຈີນ ຖະແຫຼງວ່າຈີນຈະລະງັບການຕັ້ງກຳແພງພາສີເພີ່ມເຕີມຕໍ່ສິນຄ້າຂອງ ສ.ອາເມຣິກາ ທີ່ກຽມປະກາດໃຊ້ໃນວັນທີ 15 ທັນວານີ້ເຊັ່ນກັນ ແລະ ການເຫັນດີຮ່ວມກັນໃນຫຼັກການກັບລັດຖະບານ ສ.ອາເມຣິກາ ໃນເລື່ອງການຍົກລະດັບກົດໝາຍປົກປ້ອງຊັບສິນທາງປັນຍາ, ການຂະຫຍາຍຂອບເຂດຕະຫຼາດເສລີ ແລະ ການປົກປ້ອງສິດທິພື້ນຖານໃນການເຮັດທຸລະກິດຂອງບໍລິສັດຕ່າງປະເທດໃນຈີນ, ເຖິງຢ່າງໃດກໍ່ຕາມ ລັດຖະບານຈີນຍັງບໍ່ໄດ້ໃຫ້ຂໍ້ມູນທີ່ຊັດເຈນ ວ່າຈະຫຼຸດກຳແພງພາສີປັດຈຸບັນຕໍ່ສິນຄ້າຂອງ ສ.ອາເມຣິກາຫຼືບໍ່ ແລະ ລາຍລະອຽດຂອງການສັ່ງຊື້ສິນຄ້າກະສິກຳຂອງ ສ.ອາເມຣິກາ ແຕ່ສື່ທ້ອງຖິ່ນຫຼາຍແຫ່ງໃນອາເມຣິກາລາຍງານວ່າ ຈີນກຽມເພີ່ມປະລິມານການນຳເຂົ້າສິນຄ້າກະສິກຳຈາກ ສ.ອາເມຣິກາ ອີກ 50,000 ລ້ານໂດລາສະຫະລັດ.

ເຊິ່ງທ່ານ ໂດໂນ ທຣຳ ກ່າວອີກວ່າ ການເຈລະຈາການຄ້າ “ຂັ້ນທີສອງ” ລະຫວ່າງ ສ.ອາເມຣິກາ ກັບ ຈີນຈະເດີນໜ້າຕໍ່ທັນທີ, ເຖິງແມ່ນວ່າຂໍ້ຕົກລົງຂັ້ນທຳອິດ ຈະຍັງບໍ່ໄດ້ລົງນາມກໍ່ຕາມ, ແຕ່ລັດຖະບານຈີນຍັງຮັກສາທ່າທີດ້ວຍການກ່າວວ່າ ການເຈລະຈາຂັ້ນຕໍ່ໄປຈະເປັນແບບໃດນັ້ນ ຂຶ້ນຢູ່ກັບໝາກຜົນຂອງຂໍ້ຕົກລົງຂັ້ນທຳອິດ ເຊິ່ງໃນຕອນນີ້ຈີນຕີລາຄາວ່າຍັງເປັນໄປຕາມເປົ້າໝາຍຂອງຕົນຢູ່ ໃນການເພີ່ມການເປີດເສລີທາງເສດຖະກິດ ໂດຍສະເພາະກັບສິນຄ້າອຸດສາຫະກຳ ແລະ ສິນຄ້າເຕັກໂນໂລຊີຂັ້ນສູງ ຕາມແຜນຍຸດທະສາດ “Made in China 2025” ທີ່ຕ້ອງການປ່ຽນປະເທດຈາກການເປັນໂຮງງານຜະລິດສິນຄ້າຕົ້ນທຶນຕ່ຳ ໃຫ້ກາຍເປັນແຫຼ່ງຜະລິດສິນຄ້ານະວັດຕະກຳຂອງໂລກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube