ກຳປູເຈຍເຕືອນ ສ.ອາເມຣິກາ ບໍ່ຄວນມາກ່ຽວຂ້ອງກັບຄະດີກະບົດຂອງຫົວໜ້າຝ່າຍຄ້ານກຳປູເຈຍ

ລາຍງານ 14 ທັນວາ 2019, ກະຊວງການຕ່າງປະເທດກຳປູເຈຍອອກຖະແຫຼງການເມື່ອວັນສຸກ 13 ທັນວາ ທີ່ຜ່ານມາ ວ່າການສືບສວນສອບສວນທ່ານ ເກິມ ສຸຂາ ຜູ້ນຳຝ່າຍຄ້ານ ໃນຂໍ້ຫາເປັນກະບົດ ຈະເດີນໜ້າຕໍ່ໄປຕາມຂະບວນການຍຸຕິທຳຂອງສານ ແລະ ເປັນໄປຕາມກົດໝາຍຂອງກຳປູເຈຍ, ສ່ວນກະຊວງຍຸຕິທຳກຳປູເຈຍເປີດເຜີຍວ່າ ສ.ອາເມຣິກາສາມາດສົ່ງຜູ້ແທນເຂົ້າຮ່ວມຮັບຟັງການພິຈາລະນາຄະດີໄດ້ຫາກຕ້ອງການ, ແຕ່ສິ່ງທີ່ສຳຄັນຄືຕົວແທນຂອງລັດຖະບານ ສ.ອາເມຣິກາບໍ່ວ່າຈະເປັນໃຜກໍ່ຕາມ ຕ້ອງບໍ່ສະແດງທ່າທີທີ່ສື່ເຖິງການພະຍາຍາມແຊກແຊງວຽກງານພາຍໃນຂອງກຳປູເຈຍ ທີ່ລວມເຖິງການອອກຄຳສັ່ງໃຫ້ລັດຖະບານຖອນຟ້ອງ.

ທ່ານ ເກິມ ສຸຂາ ແລະ ທ່ານ ແພັດທຣິກ ເມີຟີ ເອກອັກຄະລັດຖະທູດ ສ.ອາເມຣິກາ ປະຈຳກຳປູເຈຍ

ຖະແຫຼງການດັ່ງກ່າວຂອງລັດຖະບານກຳປູເຈຍ ເປັນການຕອບໂຕ້ຖະແຫຼງການຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ທີ່ກ່າວເມື່ອວັນພຸດ 11 ທັນວາ ທີ່ຜ່ານມາ ວ່າລັດຖະບານ ສ.ອາເມຣິກາສະໜັບສະໜູນການຮັກສາໄວ້ເຊິ່ງພື້ນຖານສິດທິມະນຸດຂອງທຸກປະເທດໃນໂລກ ທີ່ແນ່ນນອນວ່າລວມເຖິງກຳປູເຈຍ ແລະ ສ.ອາເມຣິກາຕິດຕາມຄະດີຂອງທ່ານ ເກິມ ສຸຂາຢ່າງໃກ້ຊິດ, ຂະນະທີ່ໃນວັນດຽວກັນກະຊວງການເງິນ ສ.ອາເມຣິກາ ກໍ່ໄດ້ປະກາດຂຶ້ນບັນຊີດຳພົນເອກ ກຸນ ກິມ ອະດີດເສນາທິການໃຫຍ່ກອງທັບປະຊາຊົນກຳປູເຈຍ ແລະ ທ່ານ ໄຕຣ ພາບ ມະຫາເສດຖີນັກທຸລະກິດເຊິ່ງເປັນສະມາຊິກພັກປະຊາຊົນກຳປູເຈຍ ໂດຍທັງສອງຄົນຖືກຈັດຢູ່ໃນກຸ່ມຄົນໃກ້ຊິດກັບສົມເດັດ ຮຸນ ເຊນ ນາຍົກລັດຖະມົນຕີກຳປູເຈຍ.

ທ່ານ ເກິມ ສຸຂາ ຫົວໜ້າພັກກູ້ຊາດກຳປູເຈຍ ຖືກຜູ້ນຳກຳປູເຈຍເປັນໂຈມຍື່ນຟ້ອງຮ້ອງໃນຂໍ້ຫາກະບົດ ເມື່ອເດືອນກັນຍາ 2017 ແລະ ສົ່ງຜົນໃຫ້ທ່ານ ເກິມ ສຸຂາ ຖືກຈັບກຸມ ແລະ ຖືກກັກບໍລິເວນໃຫ້ຢູ່ແຕ່ພາຍໃນເຮືອນ ທີ່ນະຄອນຫຼວງພະນົມເປັນ ແຕ່ຄຳສັ່ງກັກບໍລິເວນໄດ້ຖືກຍົກເລີກໄປເມື່ອເດືອນພະຈິກ ທີ່ຜ່ານມາ.

ເຊິ່ງພັກກູ້ຊາດກຳປູເຈຍ ຫຼື ພັກຝ່າຍຄ້ານຫຼັກຂອງກຳປູເຈຍ ທີ່ຖືກສານສູງສຸດຂອງກຳປູເຈຍຕັດສິນໃຫ້ຍຸບພັກ ເມື່ອເດືອນພະຈິກ 2017 ຈາກຂໍ້ຫາວ່າເປັນກະບົດ ແລະ ສົມຮູ້ຮ່ວມຄິດກັບ ສ.ອາເມຣິກາ ໂຄ່ນລົ້ມອຳນາດລັດຖະບານ ສົ່ງຜົນໃຫ້ສະມາຊິກພັກ 118 ຄົນຖືກສັ່ງຫ້າມຫຼິ້ນການເມືອງ 5 ປີ, ສະມາຊິກພັກທີ່ເປັນສະມາຊິກສະພາ 55 ຄົນຕ້ອງໝົດສະພາບ ແລະ ນັກການເມືອງທ້ອງຖິ່ນຂອງພັກອີກ 489 ຄົນກໍ່ຕ້ອງພົ້ນຈາກຕຳແໜ່ງເຊັ່ນກັນ.

ນອກຈາກນີ້, ການເລືອກຕັ້ງທົ່ວໄປຂອງກຳປູເຈຍ ເມື່ອເດືອນກໍລະກົດ 2018 ພັກປະຊາຊົນກຳປູເຈຍ ພາຍໃຕ້ການນຳຂອງສົມເດັດ ຮຸນ ເຊນ ສາມາດຍາດໄດ້ໄຊຊະນະຄອງສຽງທັງໝົດ 125 ສຽງໃນສະພາຜູ້ແທນປະຊາຊົນ.

HTML tutorial