ຕວັກກີ ຂູ່ປິດຖານທັບ ສ.ອາເມຣິກາ ຫາກຖືກຂວໍ້າບາດ ເພາະຊື້ S-400 ກັບລັດເຊຍ

ລາຍງານ 16 ທັນວາ 2019, ທ່ານ ເຣເຊບ ເທຢິຍ ເອີໂດກັນ ກ່າວເມື່ອອາທິດ 15 ທັນວາ ທີ່ຜ່ານມາ ວ່າຕວັກກີມີອຳນາດໃນການປິດຖານທັບອິນເຊີລິກ (Incirlik Air Base) ແລະ ຖານທັບຄູເຣຊິກ (Kurecik Radar Station) ເຊິ່ງທັງສອງແຫ່ງເປັນທັງຖານທັບອາກາດ ແລະ ສູນວິໄຈດ້ານນິວເຄຼຍຂອງກອງທັບສະຫະລັດ ອາເມຣິກາ ຕັ້ງຢູ່ທາງຝັ່ງຕາເວັນຕົກສຽງໃຕ້ຂອງປະເທດ ທີ່ຢູ່ບໍ່ຫ່າງຈາກຊາຍແດນຂອງຊີຣີພໍປານໃດ, ໂດຍຖານທັບຄູເຣຊິກຍັງເປັນສະຖານທີ່ຕັ້ງສະຖານີຣາດາຂອງອົງການສົນທິສັນຍາອາກລັງຕິກເໜືອ (NATO) ອີກດ້ວຍ, ພ້ອມທັງກ່າວຢ້ຳວ່າ ລັດຖະບານຕວັກກີພ້ອມໃຊ້ມາດຕະການດັ່ງກ່າວ ຫາກເມື່ອເຖິງຍາມຈຳເປັນ.

ເຊິ່ງລັດຖະບານ ສ.ອາເມຣິກາ ໄດ້ຍົກລະດັບຄຳເຕືອນເປັນໄລຍະເລື່ອງການຂວໍ້າບາດລັດຖະບານຕວັກກີ ຈາກກໍລະນີທີ່ຕວັກກີຊື້ລະບົບປ້ອງກັນໄພທາງອາກາດ S-400 ຈາກລັດເຊຍໃນປີນີ້ ເຊິ່ງມີການມອບ-ຮັບສິນຄ້າເປັນທີ່ຮຽບຮ້ອຍ ແລະ ມີຄວາມເປັນໄປໄດ້ທີ່ຈະສັ່ງຊື້ເພີ່ມອີກຊຸດໜຶ່ງໃນປີໜ້າ.

ເຖິງຢ່າງໃດກໍ່ຕາມ, ຕວັກກີບໍ່ພໍໃຈ ສ.ອາເມຣິກາ ເພີ່ມຂຶ້ນອີກ ເມື່ອສະພາສູງ ສ.ອາເມຣິກາ ມີມະຕິເປັນເອກະພາບ ເມື່ອວັນພະຫັດ 12 ທັນວາ ທີ່ຜ່ານມາ ຮັບຮອງມະຕິເຊີງສັນຍາລັກວ່າ ເຫດການສັງຫານຊາວອາເມນີ 1.5 ລ້ານຄົນໂດຍກອງທັບຈັກກະພັດອອດໂຕມັນ ລະຫວ່າງປີ 1915-1923 ຄືການຂ້າລ້າງເຜົ່າພັນ, ຕໍ່ຈາກນັ້ນພຽງວັນດຽວ ກະຊວງການຕ່າງປະເທດຂອງຕວັກກີ ໄດ້ເຊີນເອກອັກຄະລັດຖະທູດ ສ.ອາເມຣິກາເຂົ້າພົບ ເພື່ອສະແດງຄວາມເປັນຫ່ວງຕໍ່ທ່າທີຂອງສະພາສູງ ສ.ອາເມຣິກາ ຕໍ່ບັນຫາດັ່ງກ່າວ ເຖິງແມ່ນວ່າບໍ່ມີຜົນຜູກພັນທາງກົດໝາຍ ແຕ່ຈະເປັນການສົ່ງຜົນໃຫ້ສາຍພົວພັນລະຫວ່າງ ສ.ອາເມຣິກາ ແລະ ຕວັກກີເຄັ່ງຕຶງຂຶ້ນຕື່ມອີກ.