ທ່ານ ນາງ ຍິ່ງລັກ ອະດີດນາຍົກລັດຖະມົນຕີຂອງໄທ ບໍ່ພໍໃຈທີ່ຖືກລັດປະກາດຂາຍຊັບສິນຂອງຕົນ

ລາຍງານ 16 ທັນວາ 2019, ທ່ານ ນາງ ຍິ່ງລັກ ຊິນນະວັດ ອະດີດນາຍົກລັດຖະມົນຕີຂອງໄທ ທີ່ຖືກຍຶດອຳນາດໂດຍທະຫານ ພາຍໃຕ້ການນຳຂອງທ່ານ ພົນເອກ ປຣະຍຸດ ຈັນໂອຊາ ເມື່ອເດືອນພຶດສະພາ 2014, ໄດ້ລົງຂໍ້ຄວາມຜ່ານ facebook ສະແດງຄວາມບໍ່ພໍໃຈວ່າ: ຕົນຕ້ອງສູນເສຍເຮືອນ, ຊັບສິນ, ບັນຊີທະນາຄານ ລວມເຖິງຊັບສົມບັດສ່ວນຕົວທີ່ຕົນເອງຫາມາໄດ້ຕັ້ງແຕ່ຍັງບໍ່ທັນໄດ້ດຳລົງຕຳແໜ່ງນາຍົກລັດຖະມົນຕີ.

ທ່ານ ນາງ ຍັງໄດ້ລະບຸອີກວ່າ: “ຂ້າພະເຈົ້າສູນເສຍເຮືອນ ທີ່ຖືກຍຶດ ແລະ ຂະນະນີ້ຊັບສິນຂອງຂ້າພະເຈົ້າກຳລັງຖືກປະມູນຂາຍ, ເຖິງຈະຕໍ່ສູ້ທາງກົດໝາຍທຸກຮູບແບບແລ້ວແຕ່ກໍ່ບໍ່ສາມາດຈະຢຸດຢັ້ງໄວໄດ້ ເພາະທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີຂອງໄທ ໄດ້ໃຊ້ອຳນາດທາງກົດໝາຍ ມາດຕາ 44 ຄຸ້ມຄອງເຈົ້າໜ້າ ເພື່ອເລັ່ງດຳເນີນຄະດີກັບຂ້າພະເຈົ້າ ໂດຍບໍ່ຄຳນຶງເຖິງຄວາມຖືກຕ້ອງຕາມຫຼັກຂອງກົດໝາຍ… ພ້ອມທັງກ່າວປິດທ້າຍວ່າ ມາດຕາ 44 ກົດໝາຍເລືອກຂ້າງ”.

ເຊິ່ງພາຍຫຼັງຖືກຍຶດອຳນາດ ທ່ານ ນາງ ຍິ່ງລັກ ຊິນນະວັດ ກໍ່ຖືກຟ້ອງຄະດີທີ່ປ່ອຍປະໃຫ້ມີການສໍ້ໂກງ ໃນໂຄງການຈຳນຳເຂົ້າ ທີ່ເປັນນະໂຍບາຍຂອງລັດຖະບານ ໃນສະໄໝທີ່ທ່ານ ນາງ ເປັນນາຍົກລັດຖະມົນຕີ, ເຊິ່ງທ່ານ ນາງ ໄດ້ຫຼົບນີ້ອອກຈາກປະເທດເມື່ອເດືອນສິງຫາ 2017 ໃນນາທີສຸດທ້າຍກ່ອນທີ່ສານຈະຕັດສິນຄະດີ.

ຕໍ່ມາໃນເດືອນກັນຍາ 2017 ສານໄດ້ອ່ານຄຳຕັດສິນ ໃຫ້ທ່ານ ນາງ ຍິ່ງລັກ ຊິນນະວັດ ຮັບໂທດຕັດອິດສະຫຼະພາບເປັນເວລາ 5 ປີ ແລະ ໄດ້ອອກໝາຍຈັບເພື່ອຂໍນຳຕົວກັບມາຮັບໂທດ, ແຕ່ເຖິງຢ່າງໃດກໍ່ຕາມທ່ານ ນາງ ໄດ້ຂໍລີ້ໄພທາງການເມືອງໄປຍັງປະເທດອັງກິດ ແລະ ປັດຈຸບັນຄາດວ່າອາໄສຢູ່ກັບທ່ານ ທັກສິນ ຊິນນະວັດ ອະດີດນາຍົກລັດຖະມົນຕີຂອງໄທ ແລະ ທັງເປັນອ້າຍ ທີ່ຖືກຍຶດອຳນາດເຊັ່ນກັນ ທີ່ນະຄອນດູໄບ, ສະຫະນະຄອນ ເອເມຣັດ ອາຣັບ (UAE).

HTML tutorial