ລັດຖະບານສິງກະໂປ ໃຊ້ກົດໝາຍຕໍ່ຕ້ານຂ່າວປອມຢ່າງເຂັ້ມງວດ ກັບບັນດາຝ່າຍຄ້ານ

ລາຍງານ 16 ທັນວາ 2019, ກະຊວງແຮງງານສິງກະໂປ ອອກຖະແຫຼງການ ວ່າໄດ້ຍື່ນຄຳຮ້ອງໄປຍັງສູນປະຕິບັດການ ພາຍໃຕ້ກົດໝາຍປ້ອງກັນການເຜີຍແຜ່ຂໍ້ມູນປອມ ແລະ ການຄຸ້ມຄອງສື່ອອນລາຍແຫ່ງຊາດ ເມື່ອທ້າຍອາທິດທີ່ຜ່ານມາ ເພື່ອຂໍໃຫ້ກວດສອບການລົງຂໍ້ຄວາມອອນລາຍທັງໃນເວັບໄຊ ແລະ ໜ້າ facebook ຂອງພັກປະຊາທິປະໄຕສິງກະໂປ ເຊິ່ງເປັນໜຶ່ງໃນພັກການເມືອງຝ່າຍຄ້ານຂອງປະເທດ ທີ່ລະບຸວ່າມະນຸດເງິນເດືອນ ບໍ່ວ່າຈະເປັນລະດັບພະນັກງານ, ຜູ້ບໍລິຫານ ແລະ ຜູ້ຊ່ຽວຊານສະເພາະດ້ານ ລວມໄປເຖິງຜູ້ຊ່ຽວຊານທາງເຕັກນິກວ່າງງານຫຼາຍຂຶ້ນ.

ເຊິ່ງກະຊວງແຮງງານໄດ້ສະແດງຂໍ້ມູນທາງສະຖິຕິຕອບໂຕ້ ວ່າອັດຕາການຈ້າງງານຂອງກຸ່ມແຮງງານດັ່ງກ່າວໃນສິງກະໂປນັ້ນ ເພີ່ມຂຶ້ນຢ່າງຕໍ່ເນື່ອງຕັ້ງແຕ່ປີ 2015, ຂະນະທີ່ສູນຕໍ່ຕ້ານຂ່າວປອມຂອງລັດຖະບານສິງກະໂປ ສັ່ງໃຫ້ພັກປະຊາທິປະໄຕສິງກະໂປ ຂຶ້ນຄຳເຕືອນປະກອບການລົງຂໍ້ຄວາມຕໍ່ບັນຫາດັ່ງກ່າວໃນທຸກຊ່ອງທາງຂອງພັກວ່າເປັນ “ຂໍ້ມູນທີ່ບໍ່ມີມູນຄວາມຈິງ” ແລະ ເພີ່ມລິ້ງໄປຍັງເວັບໄຊຂອງກະຊວງແຮງງານ ເພື່ອການເຂົ້າເຖິງຂໍ້ມູນທີ່ຖືກຕ້ອງ.

ໃນດ້ານຂອງພັກປະຊາທິປະໄຕສິງກະໂປ ອອກຖະແຫຼງການໃນເວລາຕໍ່ມາ ວ່າໄດ້ປະຕິບັດຕາມຄຳສັ່ງແລ້ວ ແຕ່ຈະມີການຍື່ນອຸທອນໃນພາຍຫຼັງ, ຂະນະທີ່ແຫຼ່ງຂ່າວໃນກະຊວງແຮງງານເປີດເຜີຍວ່າ ເມື່ອໃດກໍ່ຕາມທີ່ພັກປະຊາທິປະໄຕສິງກະໂປຍື່ນຄຳຮ້ອງເຂົ້າມາ ຈະມີການກວດສອບຢ່າງລະອຽດ, ນີ້ຖືເປັນຄັ້ງທຳອິດທີ່ລັດຖະບານສິງກະໂປໃຊ້ອຳນາດຕາມກົດໝາຍຕໍ່ຕ້ານຂ່າວປອມກັບພັກການເມືອງ.

ນອກຈາກນີ້, ກະຊວງສຶກສາທິການຂອງສິງກະໂປ ຍັງໄດ້ຍື່ນຄຳຮ້ອງຜ່ານສູນຕໍ່ຕ້ານຂ່າວປອມເຊັ່ນກັນ ຂໍໃຫ້ມີການອອກຄຳສັ່ງໃຫ້ທ່ານ ລິ້ມ ທຽນ ໜຶ່ງໃນນັກການເມືອງຝ່າຍຄ້ານ ແກ້ໄຂຂໍ້ຄວາມທີ່ລົງໃນ facebook ຕົນເອງ ທີ່ອ້າງວ່ານັກຮຽນ ແລະ ນັກສຶຶກສາຕ່າງປະເທດໄດ້ຮັບເງິນສະໜັບສະໜູນຈາກພາກລັດຫຼາຍກວ່ານັກຮຽນ ແລະ ນັກສຶກສາສິງກະໂປເອງ.

ເຖິງຢ່າງໃດກໍ່ຕາມ, ອົງກອນນັກຂ່າວໄຮ້ພົມແດນ (RSF) ແລະ ສະຫະພັນອິນເຕີເນັດແຫ່ງອາຊີ (AIC) ອອກຖະແຫຼງການວິຈານກົດໝາຍຕໍ່ຕ້ານຂ່າວປອມຂອງສິງກະໂປວ່າ ເປັນການເປີດໂອກາດໃຫ້ລັດໃຊ້ອຳນາດຕໍ່ບັນຫາດັ່ງກ່າວຢ່າງໄຮ້ຂອບເຂດ ເຊິ່ງເຂົ້າຂ່າຍຜະເດັດການ ແລະ ຮຽກຮ້ອງໃຫ້ລັດຖະບານສິງກະໂປຈັດຕັ້ງປະຊາພິຈານກ່ຽວກັບກົດໝາຍນີ້ ທີ່ມີຜົນບັງຄັບໃຊ້ມາແຕ່ເດືອນຕຸລາ ທີ່ຜ່ານມາ, ໂດຍບົດລົງໂທດສູງສຸດຄືການຖືກຕັດອິດສະຫຼະພາບ 10 ປີ ຫຼື ປັບໃໝ 1 ລ້ານໂດລາສິງກະໂປ.

HTML tutorial