ສ.ອາເມຣິກາ ເຕືອນເກົາຫຼີເໜືອ ໃຫ້ຢຸດເຊົາສະແດງທ່າທີອັນແຂງກະດ້າງທີ່ບໍ່ຈຳເປັນ

ລາຍງານ 16 ທັນວາ 2019, ທ່ານ ສະຕີເຟນ ບີກັນ ຜູ້ແທນພິເສດດ້ານການເຈລະຈາກັບເກົາຫຼີເໜືອຂອງສະຫະລັດ ອາເມຣິກາ ກ່າວໃນລະຫວ່າງການເດີນທາງຢ້ຽມຢາມນະຄອນຫຼວງໂຊ ປະເທດເກົາຫຼີໃຕ້ ກ່ຽວກັບທ່າທີ ແລະ ຄວາມຕ້ອງການຂອງເກົາຫຼີເໜືອ ວ່າລັດຖະບານ ສ.ອາເມຣິກາຮັບຮູ້ທັງໝົດ ແຕ່ເປັນສິ່ງທີ່ໜ້າຜິດຫວັງ ທີ່ລັດຖະບານເກົາຫຼີເໜືອສະແດງອອກຢ່າງເປັນປໍລະປັກໂດຍບໍ່ຈຳເປັນຕໍ່ ສ.ອາເມຣິກາ ແລະ ພັນທະມິດ ເຊິ່ງລວມເຖິງເກົາຫຼີໃຕ້, ຍີ່ປຸ່ນ ແລະ ອີກຫຼາຍປະເທດໃນເອີຣົບ.

ຂະນະດຽວກັນ, ທ່ານ ສະຕີເຟນ ບີກັນ ຍັງກ່າວອີກວ່າ ສ.ອາເມຣິກາມີພຽງເປົ້າໝາຍ ແຕ່ບໍ່ມີເສັ້ນຕາຍ ທີ່ສື່ໃຫ້ຮູ້ວ່າເປັນການປະຕິເສດຂໍ້ຮຽກຮ້ອງຂອງທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ທີ່ກ່າວຕັ້ງແຕ່ຊ່ວງກາງປີນີ້ ວ່າ ສ.ອາເມຣິກາຕ້ອງປ່ຽນແປງພຶດຕິກຳພາຍໃນທ້າຍປີນີ້ ແລະ ຫາກລັດຖະບານ ສ.ອາເມຣິກາຕົກລົງເພີ່ມຄວາມຫົດຢືດດ້ານນະໂຍບາຍຕໍ່ເກົາຫຼີເໜືອ ແຕ່ຂໍ້ສະເໜີຂອງອີກຝ່າຍບໍ່ເປັນທີ່ໜ້າເພິ່ງພໍໃຈ ລັດຖະບານເກົາຫຼີເໜືອຈະໃຊ້ມາດຕະການໃໝ່ຕາມແບບຂອງຕົນເອງ. ເຖິງຢ່າງໃດກໍ່ຕາມ ທ່ານ ສະຕີເຟນ ບີກັນ ກ່າວປິດທ້າຍວ່າ ສ.ອາເມຣິກາຍັງຕ້ອງການໃຫ້ເກົາຫຼີເໜືອກັບມາເຈລະຈາກັນອີກຄັ້ງ ພາຍຫຼັງທີ່ຂະບວນການຕ້ອງຢຸດລົງ ນັບຕັ້ງແຕ່ສິ້ນສຸດການປຶກສາຫາລືກັນຢ່າງເປັນທາງການຄັ້ງທີ 2 ລະຫວ່າງທ່ານ ຄິມ ຈອງ-ອຶນ ກັບ ທ່ານ ໂດໂນ ທຣຳ ປະທານປະເທດ ສ.ອາເມຣິກາ ທີ່ນະຄອນຫຼວງຮ່າໂນ້ຍ ປະເທດຫວຽດນາມ ເມື່ອທ້າຍເດືອນກຸມພາ ທີ່ຜ່ານມາ.

ເຊິ່ງເກົາຫຼີເໜືອເອງກໍ່ໄດ້ເດີນໜ້າທົດລອງອາວຸດຢ່າງຕໍ່ເນື່ອງຕັ້ງແຕ່ເດືອນພຶດສະພາທີ່ຜ່ານມາ ເຊິ່ງສ່ວນໃຫຍ່ເປັນການຍິງຂີປະນາວຸດພິໄສໃກ້ລົງທະເລ ແຕ່ໃນເດືອນນີ້ລັດຖະບານເກົາຫຼີເໜືອ ປະກາດການທົດລອງສຳຄັນຢ່າງໜ້ອຍ 2 ຄັ້ງ ທີ່ສະຖານີອະວະກາດໂຊແຮ ທາງຕາເວັນຕົກສຽງເໜືອຂອງປະເທດ ເຊິ່ງເຄີຍລະບຸວ່າໄດ້ທຳລາຍໄປແລ້ວ ພາຍຫຼັງການປະຊຸມລະດັບຜູ້ນຳ ສ.ອາເມຣິກາ-ເກົາຫຼີເໜືອ ທີ່ສິງກະໂປ ເມື່ອເດືອນມິຖຸນາ 2018, ນອກຈາກນີ້ ລັດຖະບານເກົາຫຼີເໜືອ ຍັງປະກາດວ່າຄວາມສຳເລັດຂອງການທົດລອງທັງສອງຄັ້ງຈະກໍ່ໃຫ້ເກີດການປ່ຽນແປງຄັ້ງສຳຄັນໃນຍຸດທະສາດຂອງເກົາຫຼີເໜືອອີກດ້ວຍ.

HTML tutorial