ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ຢ້ຽມຢາມປະເທດຝຣັ່ງ

ອີງຕາມການລາຍງານຂອງກະຊວງການຕ່າງປະເທດໃຫ້ຮູ້ວ່າ: ເພື່ອເປັນການຮັດແໜ້ນສາຍພົວພັນມິດຕະພາບ ລາວ-ຝຣັ່ງ, ທ່ານ ສະ​ເຫຼີມ​ໄຊກົມ​ມະ​ສິດ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ພ້ອມ​ດ້ວຍ​ຄະ​ນະ ໄດ້ເດີນທາງຢ້ຽມ​ຢາມສາທາລະນະລັດຝຣັ່ງ ໃນວັນ​ທີ 17-18 ທັນວາ 2019, ເຊິ່ງເປັນ​ນິ​ມິດ​ໝາຍ​ອັນໃໝ່​ໃນ​ການ​ເສີມ​ຂະ​ຫຍາຍ​ສາຍ​ພົວ​ພັນ​ມິດ​ຕະ​ພາບແລະການ​ຮ່ວມ​ມື​ອັນ​ດີ​ລະ​ຫວ່າງ ສ​ປ​ປ.ລາວ ແລະ ຝຣັ່ງ ໃຫ້​ນັບມື້ນັບແໜ້ນແຟ້ນ ແລະ ແຕກດອກ​ອອກ​ຜົນ​ຍິ່ງໆ​ຂຶ້ນ.

ໃນ​​ວັນ​ທີ17ທັນວາ 2019, ທ່ານ ສະ​ເຫຼີມ​ໄຊ ກົມ​ມະ​ສິດ ໄດ້ພົບ​ປະ​ສອງ​ຝ່າຍກັບທ່ານ ຊັງອີວວ໌ ເລີດຣຽງ (H.E. Mr. Jean-Yves Le Drian) ​ລັດ​ຖະມົນ​ຕີກິດຈະການເອີຣົບ ແລະ ​ການ​ຕ່າງ​ປະ​ເທດຝຣັ່ງ ທີ່ ກະຊວງການຕ່າງປະເທດຝຣັ່ງ, ເຊິ່ງໄດ້​ດຳ​ເນີນ​ໄປພາຍ​ໃຕ້​ບັນ​ຍາ​ກາດ​ອັນ​ອົບອຸ່ນ​ແລະສ້າງສັນ, ເຊິ່ງໃນນັ້ນສອງ​ຝ່າຍ ໄດ້​ຕີ​ລາ​ຄາ​ສູງ​ຕໍ່​ສາຍ​ພົວ​ພັນ​ມິດ​ຕະ​ພາບ ແລະ ການ​ຮ່ວມ​ມື​ທີ່​ດີລະ​ຫວ່າງ ສປປ.ລາວ ແລະ ຝຣັ່ງ.

ພ້ອມກັນນັ້ນ,​ ກໍ່ໄດ້ທົບທວນຄືນການ​ຊ່ວຍ​ເຫຼືອ​ຂອງຝຣັ່ງແກ່ ສ​ປ​ປ.ລາວ, ລວມມູນຄ່າການຊ່ວຍເຫຼືອໂດຍສະເລ່ຍປະມານ 25 ລ້ານເອີໂຣຕໍ່ປີໃນດ້ານຕ່າງໆເປັນຕົ້ນແມ່ນການສຶກສາ, ສາທາລະນະສຸກ, ກະສິກຳ, ກົດໝາຍ-ການປົກຄອງ, ຍຸຕິທຳ, ການເງິນ, ວັດທະນະທຳແລະອື່ນໆ, ​ໃນ​ໂອ​ກາດນີ້, ທ່ານ​ລັດ​ຖະ​ມົນ​ຕີ​ ໄດ້​ຕາງໜ້າໃຫ້ລັດຖະບານສະ​ແດງ​ຄວາມຂອບໃຈຕໍ່​ການ​ຊ່ວຍ​ເຫຼືອ​ອັນ​ລ້ຳ​ຄ່າ ຂອງ​ລັດ​ຖະ​ບານ ແລະ ປະ​ຊ​າ​ຊົນ​ຝຣັ່ງໃຫ້ແກ່ ສປປ.ລາວ ໃນດ້ານຕ່າງໆ, ອັນເປັນການປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງປະຊາຊົນລາວບັນດາເຜົ່າ ໃຫ້ດີຂຶ້ນຢ່າງບໍ່ຢຸດຢັ້ງ.

ພ້ອມ​ກັນ​ນັ້ນ, ສອງ​ຝ່າຍ ​ກໍ່ໄດ້​ປຶກ​ສາ​ຫາ​ລື​ທິດ​ທາງ​ແຜນ​ການ​ຮ່ວມ​ມື​ໃນ​ຕໍ່​ໜ້າ​, ລວມທັງ​ ການ​ຮ່ວມ​ມື​ລະ​ຫວ່າງ​ສອງ​ກະ​ຊວງ​ການ​ຕ່າງ​ປະ​ເທດ ​ລ​າວ-ຝຣັ່ງ ເຊິ່ງຝ່າຍ​ຝຣັ່ງກໍ່ໄດ້​ຢືນ​ຢັນ​ທີ່​ຈະ​ສືບ​ຕໍ່ໃຫ້​ການ​ຊ່ວຍ​ເຫຼືອ​​ເພີ່ມ​ຕື່ມເພື່ອເຮັດໃຫ້ ສ​ປ​ປ.ລາວ ​ສາມາດຫຼຸດ​ພົ້ນ​ອອກ​ຈາກ​ສະ​ຖາ​ນະ​ພາບ​ດ້ອຍ​ພັດ​ທະ​ນາໃນປີ 2024 ແລະ ບັນ​ລຸ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ​ເທື່ອ​ລະ​ກ້າວ. ນອກຈາກນັ້ນ, ສອງ​ຝ່າຍ​ຍັງ​ໄດ້​ແລກ​ປ່ຽນ​ທັດ​ສະ​ນະກ່ຽວ​ກັບ​ບັນ​ຫາ​ພາກ​ພື້ນ ແລະ ສາ​ກົນທີ່​ຕ່າງ​ຝ່າຍ​ຕ່າງ​ມີ​ຄວາມ​ສົນ​ໃຈຮ່ວມກັນ. ທ່ານລັດຖະມົນຕີເຮົາ ໄດ້ຖືໂອກາດນີ້ ເຊື້ອເຊີນ ທ່ານ ຊັງ ອີວວ໌ ເລີດຣຽງ, ​ລັດ​ຖະມົນ​ຕີກິດຈະການເອີຣົບ ແລະ ​ການ​ຕ່າງ​ປະ​ເທດ​ຝຣັ່ງ ມາຢ້ຽມຢາມ ສປປ.ລາວ ໃນເວລາທີ່ເໝາະສົມ, ເຊິ່ງເພິ່ນກໍ່ໄດ້ຕອບຮັບດ້ວຍຄວາມຍິນດີ.

ໃນໂອກາດການຢ້ຽມຢາມຄັ້ງນີ້, ທ່ານ ລັດຖະມົນຕີເຮົາ ຍັງໄດ້ພົບປະກັບປະທານຄະນະມິດຕະພາບລັດຖະສະພາລາວ-ຝຣັ່ງ ແລະ ໄດ້ເຂົ້າຮ່ວມກອງປະຊຸມໂຕະມົນ ໃນຫົວຂໍ້: ‘‘ການທ່ອງທ່ຽວແບບຍືນຍົງ’’ ຮ່ວມກັບຄະນະມິດຕະພາບລັດຖະສະພາຝຣັ່ງ-ລາວ ທີ່ ສະພາແຫ່ງຊາດຝຣັ່ງ, ເຊິ່ງໃນນັ້ນ ທ່ານລັດຖະມົນຕີ ກໍ່ໄດ້ສະເໜີໃຫ້ຄະນະມິດຕະພາບລັດຖະສະພາ ລາວ-ຝຣັ່ງ ແລະ ຝຣັ່ງ-ລາວ ເພີ່ມທະວີການພົວພັນຮ່ວມມືກັນ ໃຫ້ກວ້າງຂວາງຕື່ມໃນຕໍ່ໜ້າ ພ້ອມທັງຖືໂອກາດນີ້ຢໍ້າຄືນຄໍາເຊີນຂອງປະທານຄະນະມິດຕະພາບລັດຖະສະພາລາວ-ຝຣັ່ງ ໃຫ້ຄະນະຜູ້ແທນ ຄະນະມິດຕະພາບລັດຖະສະພາຝຣັ່ງ-ລາວ ເດີນທາງໄປຢ້ຽມຢາມ ສປປ.ລາວ ໃນວັນເວລາທີ່ເຫັນວ່າສະດວກ ແລະ ເໝາະສົມ ອີກດ້ວຍ.

ໃນວັນທີ 18 ທັນວາ 2019, ທ່ານ ລັດຖະມົນຕີ ໄດ້ພົບປະກັບນັກທຸລະກິດຝຣັ່ງ ຈຳນວນໜຶ່ງທີ່ໄດ້ເຄີຍໄປລົງທຶນຢູ່ ສປປ.ລາວ, ເຊິ່ງທັງສອງຝ່າຍໄດ້ມີການປຶກສາຫາລືກັນກ່ຽວກັບໂອກາດ ແລະ ເງື່ອນໄຂການລົງທຶນຢູ່ ສປປ.ລາວ ແນໃສ່ຂົນຂວາຍດຶງດູດເອົາບັນດານັກທຸລະກິດຝຣັ່ງ ເຂົ້າມາລົງທຶນໃນ ສປປ.ລາວ ໃຫ້ຫຼາຍຂຶ້ນ. ຄຽງຄູ່ກັນນັ້ນ, ທ່ານລັດຖະມົນຕີເຮົາ ກໍ່ໄດ້ຊີ້ແຈງອະທິບາຍທ່າແຮງ, ນະໂຍບາຍ ແລະ ສິ່ງອຳນວຍສະດວກຕ່າງໆ ທີ່ລັດຖະບານລາວເຮົາສາມາດສະໜອງໃຫ້ນັກລົງທຶນຕ່າງປະເທດ ອີກດ້ວຍ.

ນອກຈາກການເຄື່ອນໄຫວທາງການແລ້ວ, ທ່ານ ລັດຖະມົນຕີ ກະຊວງການຕ່າງປະເທດ ກໍ່ໄດ້ມີໂອກາດພົບປະໂອ້ລົມກັບ ພີ່ນ້ອງຊາວລາວ ທີ່ດຳລົງຊີວິດຢູ່ປະເທດຝຣັ່ງ ເຊິ່ງຈັດຂຶ້ນທີ່ສະຖານເອກອັກຄະລັດຖະທູດລາວ ທີ່ ປາຣີ ເພື່ອແຈ້ງໃຫ້ຊາບກ່ຽວກັບສະພາບອັນພົ້ນເດັ່ນ ໃນການສ້າງສາພັດທະນາເສດຖະກິດ-ສັງຄົມ ຢູ່ ສປປ.ລາວ ແລະ ຢໍ້າຄືນເຖິງນະໂຍບາຍອັນສະເໝີຕົ້ນສະເໝີປາຍຂອງລັດຖະບານລາວ ຕໍ່ພີ່ນ້ອງເຊື້ອຊາດລາວຢູ່ຕ່າງປະເທດ ແນໃສ່ຊຸກຍູ້ໃຫ້ເຂົາເຈົ້າຫັນໜ້າກັບຄືນສູ່ບ້ານເກີດນອນ ແລະ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດໃຫ້ຫຼາຍຍິ່ງຂຶ້ນໃນອະນາຄົດ.

- Advertisement -