ປ.ປູຕິນ ຖະແຫຼງປະຈຳປີ ຕອບຄຳຖາມສື່ ແລະ ປະຊາຊົນ, ພ້ອມລະບຸ ໝົດຍຸກຂອງໂລກຂົ້ວອຳນາດດຽວ

ລາຍງານ 20​ ທັນວາ 2019, ທ່ານ ວະລາດິເມຍ ປູຕິນ ປະທານປະເທດລັດເຊຍ ຈັດການຖະແຫຼງສົດປະຈຳປີ ຜ່ານສະຖານີໂທລະພາບແຫ່ງຊາດ ເມື່ອວັນພະຫັດ 19 ທັນວາ ທີ່ຜ່ານມາ ໂດຍລາຍການໃນປີນີ້ໃຊ້ເວລາ 4 ຊົ່ວໂມງກັບອີກ 25 ນາທີ ຍາວນານທີ່ສຸດນັບຕັ້ງແຕ່ຜູ້ນຳລັດເຊຍເລີ່ມຈັດລາຍການຖ່າຍທອດສົດປະຈຳປີ ເພື່ອສົນທະນາ ແລະ ຕອບຂໍ້ຊັກຖາມຂອງສື່ມວນຊົນ ແລະ ປະຊາຊົນ.

ເຊິ່ງທ່ານ ປູຕິນ ສົນທະນາ ແລະ ຕອບຄຳຖາມຕັ້ງແຕ່ເລື່ອງທົ່ວໆເຊັ່ນ: ບັນຫາສະພາບອາກາດ ໄປຈົນເຖິງສະຖານະການການເມືອງພາຍໃນສະຫະລັດ ອາເມຣິກາ ທີ່ຜູ້ນຳລັດເຊຍວິຈານຂະບວນການຂອງພັກເດໂມແຄຼດ ທີ່ຄອງສຽງສ່ວນໃຫຍ່ໃນສະພາຜູ້ແທນປະຊາຊົນ (ສະພາລ່າງ) ໃນການພະຍາຍາມຖອດຖອນທ່ານ ໂດໂນ ທຣຳ ປະທານປະເທດ ສ.ອາເມຣິກາ ອອກຈາກຕຳແໜ່ງ ວ່າມາຈາກຂໍ້ກ່າວຫາທີ່ບໍ່ມີຫຼັກຖານທີ່ມີນ້ຳໜັກ ແລະ ໂດຍສ່ວນຕົວບໍ່ເຊື່ອວ່າຜູ້ນຳ ສ.ອາເມຣິກາຄົນປັດຈຸບັນຈະພົ້ນຈາກຕຳແໜ່ງດ້ວຍບັນຫາດັ່ງກ່າວ.

ຂະນະທີ່ປະເດັນເຊິ່ງເປັນທີ່ສົນໃຈຂອງທຸກຝ່າຍໃນລາຍການ ແລະ ມີການຖາມຊ້ຳຫຼາຍຄັ້ງ ຄືການທີ່ປີໜ້າຈະຖືເປັນວາລະຄົບຮອບ 20 ການຂຶ້ນສູ່ອຳນາດສູງສຸດທາງການເມືອງຂອງທ່ານ ປູຕິນ ນັບຕັ້ງແຕ່ບັນຫາທາງການເມືອງພາຍໃນລັດເຊຍ ສົ່ງຜົນໃຫ້ທ່ານ ບໍຣິສ ເຢວຊິນ ອະດີດປະທານປະເທດລາອອກ ແລະ ຖ່າຍໂອນອຳນາດໃຫ້ແກ່ທ່ານ ປູຕິນ ເຊິ່ງຕອນນັ້ນດຳລົງຕຳແໜ່ງຮອງນາຍົກລັດຖະມົນຕີຄົນທີ 1 ເມື່ອປີ 2000 ແລະ ການທີ່ທ່ານ ປູຕິນ ຢູ່ໃນຕຳແໜ່ງຜູ້ນຳລັດເຊຍ 2 ສະໄໝເປັນວາລະທີສອງຕັ້ງແຕ່ປີ 2012 ແລະ ຈະໝົດວາລະໃນປີ 2024 ຈຶ່ງຍັງມີຄວາມສົງໄສວ່າ ທ່ານ ປູຕິນ ຈະລົງສະໝັກເລືອກຕັ້ງອີກຄັ້ງຫຼືບໍ່ ເຊິ່ງໃນເວລານັ້ນທ່ານ ປູຕິນ ຈະມີອາຍຸ 72 ປີ.

ຜູ້ນຳລັດດເຊຍບໍ່ຕອບຊັດເຈນ ວ່າຕົນຈະລົງສະໝັກເລືອກຕັ້ງອີກຄັ້ງຫຼືບໍ່ ແຕ່ໃຊ້ຄຳວ່າ ຕົນ ແລະ ຄະນະທີ່ປຶກສາກຳລັງພິຈາລະນາຂໍ້ກົດໝາຍກ່ຽວກັບບົດບາດຂອງປະທານປະເທດ, ນາຍົກລັດຖະມົນຕີ ແລະ ສະພາ ເຊິ່ງອາດມີການປັບໂຄງສ້າງໃນອະນາຄົດ ແລະ ຕົນສະໜັບສະໜູນການແກ້ໄຂລັດຖະທຳມະນູນໃຫ້ຈຳກັດວາລະການດຳລົງຕຳແໜ່ງປະທານປະເທດໄວ້ສູງສຸດ 2 ສະໄໝ, ເຖິງຢ່າງໃດກໍ່ຕາມ ນັກວິເຄາະຕີລາຄາວ່າ ຜູ້ນຳລັດດເຊຍເຈດຕະນາຕອບໃຫ້ຄຸມເຄືອ ເພື່ອໃຫ້ທຸກຝ່າຍຕີຄວາມໝາຍເອງ.

ທ່ານ ປູຕິນ ຍັງກ່າວເຖິງສາຍພົວພັນກັບຈີນ ທີ່ກຳລັງແໜ້ນແຟ້ນ ວ່າໝົດຍຸກຂອງໂລກຂົ້ວອຳນາດດຽວແລ້ວ ແຕ່ລັດຖະບານລັດເຊຍບໍ່ມີແຜນສ້າງພັນທະມິດທາງທະຫານ ຮ່ວມກັບລັດຖະບານຈີນ.

ເຊິ່ງລາຍການໃນປີນີ້ຈົບລົງແບບອຶ້ມຄຶ້ມເລັກໜ້ອຍ ເມື່ອນັກຂ່າວລັດເຊຍຄົນໜຶຶ່ງຖາມທ່ານ ປູຕິນ ກ່ຽວກັບທຸລະກິດຂອງລູກສາວ 2 ຄົນ ແຕ່ການທີ່ຜູ້ນຳລັດເຊຍເກືອບບໍ່ເວົ້າເຖິງເລື່ອງຄອບຄົວອອກສື່ ແລະ ທຳນຽບເຄຼມລິນບໍ່ເຄີຍຢືນຢັນ ຫຼື ປະຕິບັດວ່າ: ທ່ານ ນາງ ຄາເທຣິນາ ທິໂຄໂນວາ ແລະ ທ່ານ ນາງ ມາເຣຍ ໂວຮອນໂຊວາ ຫຼື ມາເຣຍ ຟາສເຊນ ຄືລູກສາວຂອງທ່ານ ປູຕິນ ຈິງຫຼືບໍ່ ຜູ້ນຳລັດເຊຍຕອບພຽງວ່າ ໃຫ້ທຸກຄົນທີ່ຢາກຮູ້ເລື່ອງນີ້ໄປສຶກສາເອົາເອງ.