ຜູ້ນຳອີຣານ ຢ້ຽມຢາມຍີ່ປຸ່ນຢ່າງເປັນທາງການ ຄັ້ງທຳອິດໃນຮອບ 19 ປີ

ລາຍງານ 21 ທັນວາ 2019, ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ໃຫ້ການຕ້ອນຮັບທ່ານ ຮັສຊັນ ໂຣຮານີ ປະທານປະເທດອີຣານ ທີ່ທຳນຽບນາຍົກລັດຖະມົນຕີ ໃນະຄອນຫຼວງໂຕກຽວ ເມື່ອວັນສຸກ 20 ທັນວາ ທີ່ຜ່ານມາ ໃນໂອກາດທີ່ທ່ານ ຮັສຊັນ ໂຣຮານີ ເດີນທາງຢ້ຽມຢາມຍີ່ປຸ່ນຢ່າງເປັນທາງການ ທີ່ຖືເປັນຄັ້ງທຳອິດ ໃນຮອບ 19 ປີຂອງຜູ້ນຳອີຣານ ນັບຕັ້ງແຕ່ສະໄໝທ່ານ ໂມຮຳໝັດ ຄາຕາມີ ເມື່ອປີ 2000.

ເຖິງແມ່ນວ່າທັງສອງຝ່າຍຕ່າງກໍ່ຢືນຢັນວ່າ ພາລະກິດຄັ້ງນີ້ມີຈຸດປະສົງເພື່ອຍົກລະດັບສາຍພົວພັນທາງເສດຖະກິດເປັນສຳຄັນ ແລະ ບໍ່ເຊື່ອມໂຍງຄວາມຂັດແຍ່ງກັບສະຫະລັດ ອາເມຣິກາ ຈາກການທີ່ລັດຖະບານ ສ.ອາເມຣິກາຖອນຕົວອອກຈາກຂໍ້ຕົກລົງນິວເຄຼຍ ເມື່ອປີທີ່ຜ່ານມາ, ເຖິງຢ່າງໃດກໍ່ຕາມ ທ່ານ ຮັສຊັນ ໂຣຮານີ ກ່າວໃນຕອນໜຶ່ງລະຫວ່າງການພົບປະຫາລືກັບທ່ານ ຊິນໂຊ ອາເບະ ປະນາມເລື່ອງດັ່ງກ່າວອີກຄັ້ງ ແລະ ຮຽກຮ້ອງໃຫ້ຍີ່ປຸ່ນຕະຫຼອດຈົນນານາຊາດຮ່ວມກັນຮັກສາຂໍ້ຕົກລົງນີ້ໄວ້.

ຂະນະທີ່ນາຍົກລັດຖະມົນຕີຍີ່ປຸ່ນ ເຊິ່ງຢ້ຽມຢາມນະຄອນຫຼວງເຕຫະຣານຢ່າງເປັນທາງການເມື່ອເດືອນມິຖຸນາ ທີ່ຜ່ານມາ ກ່າວວ່າຍີ່ປຸ່ນມີຄວາມເປັນຫ່ວງຢ່າງຍິ່ງຕໍ່ການທີ່ສະຖານະການໃນຕາເວັນອອກກາງຍັງຄົງເຄັ່ງຕຶງ ໂດຍສະເພາະລະຫວ່າງເດືອນພຶດສະພາ ເຖິງ ເດືອນກໍລະກົດ ທີ່ເກີດເຫດໂຈມຕີເຮືອບັນທຸກນ້ຳມັນໃນເຂດນ່ານນ້ຳສາກົນໃກ້ກັບຊ່ອງແຄບຮໍມຸສ ແລະ ການທີ່ອີຣານກັບອັງກິດ ມີຄວາມຂັດແຍ່ງເລື່ອງການຢຶດເຮືອນ້ຳມັນຂອງກັນແລະກັນ ສົ່ງຜົນໃຫ້ ສ.ອາເມຣິກາ ຮວບຮວມພັນທະມິດສ້າງຕັ້ງກອງກຳລັງເດີນເຮືອ ເພື່ອຮັກສາຄວາມປອດໄພໃຫ້ກັບເຮືອບັນທຸກສິນຄ້າໃນບໍລິເວນທີ່ມີຄວາມຂັດແຍ່ງ.

ເຊິ່ງຍີ່ປຸ່ນບໍ່ເຂົ້າຮ່ວມພາລະກິດລາດຕະເວນກັບ ສ.ອາເມຣິກາ ແຕ່ຈະຈັດຕັ້ງກອງກຳລັງຂອງຕົນເອງ ເຊິ່ງທ່ານ ຊິນໂຊ ອາເບະໄດ້ໃຫ້ຂໍ້ມູນໃນເບື້ອງຕົ້ນກັບທ່ານ ຮັສຊັນ ໂຣຮານີ ວ່າຈະເນັ້ນການລາດຕະເວນໃນແຖບອ່າວໂອມານ ທາງເໜືອຂອງແຫຼມອາຣັບ ແລະ ອ່າວເອເດນ ໂດຍບໍ່ເຂົ້າໃກ້ຊ່ອງແຄບຮໍມຸສ ເຊິ່ງເປັນເຂດອິດທິພົນຂອງອີຣານ ເຊິ່ງສົ່ງອອກນ້ຳມັນໄປຍັງຍີ່ປຸ່ນເປັນຈຳນວນຫຼາຍ ກ່ອນ ສ.ອາເມຣິກາໄດ້ອອກມາດຕະການຂວໍ້າບາດເມື່ອປີທີ່ຜ່ານມາ.

HTML tutorial