ກູບາ ແຕ່ງຕັ້ງນາຍົກລັດຖະມົນຕີຄົນທຳອິດ ໃນຮອບ 43 ປີ

ລາຍງານ 22 ທັນວາ 2019, ສະມາຊິກສະພາພະລັງປະຊາຊົນແຫ່ງຊາດກູບາ (National Assembly of People’s Power) ທັງ 605 ສຽງ ມີມະຕິເປັນເອກະພາບໃນກອງປະຊຸມເມື່ອວັນເສົາ 21 ທັນວາ ທີ່ຜ່ານມາ ຮັບຮອງຍັດຕິຂອງທ່ານ ມິເກັນ ດິເອັດສ-ກາແນນ ປະທານປະເທດກູບາ ທີ່ສະເໜີຊື່ທ່ານ ມານູເອວ ມາເຣໂຣ ຄຣູສ ໃຫ້ດຳລົງຕຳແໜ່ງນາຍົກລັດຖະມົນຕີ, ໂດຍກ່ອນໜ້ານີ້ທ່ານ ມານູເອວ ມາເຣໂຣ ຄຣູສ ອາຍຸ 56 ປີ ດຳລົງຕຳແໜ່ງລັດຖະມົນຕີກະຊວງການທ່ອງທ່ຽວຍາວນານເຖິງ 16 ປີ ຫຼື ຕັ້ງແຕ່ສະໄໝຂອງອະດີດປະທານປະເທດທ່ານ ຟີເດວ ຄາສໂຕຣ ແລະ ເປັນຜູ້ມີບົດບາດສຳຄັນໃນການປະຕິຮູບນະໂຍບາຍການທ່ອງທ່ຽວຂອງກູບາ ໃຫ້ກາຍເປັນອຸດສາຫະກຳສຳຄັນທີ່ສ້າງລາຍໄດ້ຫຼັກເຂົ້າປະເທດ ໃນຂະນະທີ່ກຳລັງປະເຊີນກັບມາດຕະການຂວໍ້າບາດຂອງ ສ.ອາເມຣິກາ.

ຂະນະດຽວກັນ, ການແຕ່ງຕັ້ງທ່ານ ມານູເອວ ມາເຣໂຣ ຄຣູສ ໃຫ້ດຳລົງຕຳແໜ່ງນາຍົກລັດຖະມົນຕີ ຍັງຖືເປັນການຟື້ນຟູຕຳແໜ່ງທີ່ເຄີຍມີຄວາມສຳຄັນໃນລັດຖະບານກູບາ ເປັນຄັ້ງທຳອິດໃນຮອບ 43 ປີ ເຊິ່ງຜູ້ດຳລົງຕຳແໜ່ງນາຍົກລັດຖະມົນຕີກູບາຄົນກ່ອນໜ້ານີ້ຄືທ່ານ ຟີເດວ ຄາສໂຕຣ ລະຫວ່າງປີ 1959 ຈົນເຖິງ 1976 ຫຼັງຈາກນັ້ນມີການປັບປຸງໂຄງສ້າງລັດຖະທຳມະນູນ ແລະ ການບໍລິການຂອງລັດຖະບານຄັ້ງໃຫຍ່ ໃຫ້ເປັນແບບສະຫະພາບໂຊວຽດ ຕຳແໜ່ງນາຍົກລັດຖະມົນຕີຈຶ່ງຖືກຍຸບໄປ.

ທ່ານ ມິເກັນ ດິເອັດສ-ກາແນນ ປະທານປະເທດກູບາ

ເຊິ່ງທ່ານ ມິເກັນ ດິເອັດສ-ກາແນນ ກ່າວວ່າ ວາລະການດຳລົງຕຳແໜ່ງຂອງນາຍົກລັດຖະມົນຕີຈະມີອາຍຸການ 5 ປີ, ສະເໜີຊື່ໂດຍປະທານປະເທດ ແລະ ຕ້ອງຜ່ານການອະນຸມັດຈາກສະພາແຫ່ງຊາດ, ສຳລັບໜ້າທີ່ຫຼັກຄືການບໍລິການວຽກງານຂອງລັດໃນແຕ່ລະວັນ ໃນຖານະຫົວໜ້າຄະນະລັດຖະມົນຕີ ເພື່ອແບ່ງເບົາພາລະຂອງປະທານປະເທດ, ພ້ອມທັງໄດ້ກ່າວຊົມເຊີຍທ່ານ ມານູເອວ ມາເຣໂຣ ຄຣູສ ວ່າມີປະສົບການສູງໃນເລື່ອງການທ່ອງທ່ຽວ ແລະ ພັດທະນາຈົນກາຍເປັນພື້ນຖານເສດຖະກິດແຫ່ງຊາດກູບາ.

ທ່ານ ຣາອຸນ ກັສໂຕ ຣູດ ເລຂາທີໜຶ່ງຄະນະບໍລິຫານງານສູນກາງພັກຄອມມູນິດກູບາ (ຄົນໜ້າ) ແລະ ທ່ານ ມານູເອວ ມາເຣໂຣ ຄຣູສ ນາຍົກລັດຖະມົນຕີກູບາ (ຄົນຢືນ)